«Խլածը չեն ներում, վերադարձնում են». «Փաստ»

«Փաստ» օրաթերթը գրում է.

ՀՀԿ խմբակցության նախկին պատգամավոր Աշոտ Աղաբաբյանը, ով այս անգամ թերևս ՀՀԿ–ի որոշմամբ չառաջադրվեց, պետական կառույցների հետ պայքարի մեջ է մի քանի ուղղությամբ: Նախ՝ մոտ 2 տարի առաջ ՊԵԿ ստուգումների արդյունքում Աղաբաբյանի տնօրինման ներքո գտնվող «Հրազդան կենտրոնական մարզադաշտը» տուգանվեց մոտ 60 մլն դրամի չափով, ինչի արդյունքում Աղաբաբյանը ՊԵԿ–ին մեղադրեց իրեն միտումնավոր սնանկության տանելու մեջ: Թեև առաջին ատյանում ՀՀԿ–ական գործարարը հաղթեց ՊԵԿ–ին ու դատարանը չհիմնավորված համարեց տուգանքը, ՊԵԿ–ն այդ որոշումն այժմ բողոքարկում է Վերաքննիչ դատարանում: Բացի դա՝ Աղաբաբյանը դատական վեճի մեջ է Ֆուտբոլի ֆեդերացիայի հետ:

Սրան գումարած, ինչպես հայտնի է, կառավարությունը որոշեց վաճառքի հանել «Հրազդան մարզահամալիր» ՓԲԸ–ն, որը «Հրազդան կենտրոնական մարզադաշտ»–ի պահուստային մարզադաշտն է համարվում:

Նշենք, որ 2 տարի առաջ «Հրազդան կենտրոնական մարզադաշտ» ՓԲԸ–ն սնանկ ճանաչվեց Երևանի Կենտրոն և Նորք–Մարաշ վարչական շրջանների ընդհանուր իրավասության դատարանի վճռով: Գույքի ընդհանուր արժեքը կազմում է 50 մլն դոլար: Աշոտ Աղաբաբյանը չի կարող գնել այն: Վերջինս արդեն մամուլում հայտարարել է, որ «Հրազդան մարզահամալիր» ՓԲԸ–ի վաճառքն անթույլատրելի է:

«Փաստը» մի քանի հարց ուղղեց Աշոտ Աղաբաբյանին:

– Պարոն Աղաբաբյան, ի՞նչ եք պատրաստվում անել, եթե, չնայած Ձեր հորդորներին, կառավարությունը որոշի վաճառել «Հրազդան մարզահամալիր» ՓԲԸ–ն:

– Նախ՝ դիմելու եմ կառավարություն, քանի որ անպայման դա հարկավոր է մասնավորեցման ցուցակից հանել, որովհետև 50 տարով մենք արենդայով վերցրել ենք, 18 տարվա վարձավճարներ ունենք մուծած, դրամական ներդրումներ արած: Ուղղակի թյուրիմացության մեջ են գցել կառավարությանը, կառավարությունը հանել է վաճառքի: Բացատրելու ենք, որ «Հրազդան մարզահամալիր» ՓԲԸ–ն, որը մարզահամալիրի պահուստային դաշտն է, ստադիոնի անբաժանելի մասն է:

– Պարոն Աղաբաբյան, հայտնի է սակայն, որ «Հրազդան մարզադաշտը» արդեն իսկ սնանկ է ճանաչվել:

– Հրազդան մարզադաշտը սնանկ է ճանաչվել, սակայն սպասում է դատարանի վերջնական որոշմանը, որ անցնենք առողջացման ծրագրին:

– Ի վերջո՝ այսօր որքա՞ն է մարզադաշտի պարտքի ընդհանուր գումարը:

– Ունենք 5–6 պարտատեր, նաև՝ կոլեկտիվի աշխատավարձը: Մենք դա կարող ենք մի երկու տարվա մեջ փակենք, եթե ինչ–որ բան չվաճառենք, միանգամից չփակենք: Մոտ 3 մլն դոլար, որը մնացել է Հայաստան–Թուրքիա խաղին պատրաստվելու համար վերցված 4,5 մլն վարկից, տոնավաճառի քանդվելուց հետո չկարողացանք վարկը մարել, ընկանք մեծ կրիզիսի մեջ: Կա հարկայինի հայցը, կա ֆուտբոլի ֆեդերացիայի հայցը: Ընդհանուր պարտքը կլինի երևի 4 մլն դոլարի չափ:

– Իսկ այս ընթացքում Ձեզ հաջողվե՞լ է որևէ մասով մարել պարտքը:

– Դեռ դատական պրոցեսների մեջ ենք, գոյություն ունի սնանկության կառավարիչ, ինքը դրանով զբաղվում է: Մինչև դատական պրոցեսները չավարտվեն, գումարի վերջնական չափը չորոշվի, մարելու մասին դեռ խոսք չի կարող լինի:

– Պարոն Աղաբաբյան, ՊԵԿ–ը Ձեզ տուգանել էր 60 մլն դրամով և Դուք հաղթեցիք ՊԵԿ–ին դատարանում, կարելի է ասել՝ այդ տուգանքը Ձեզ ներվեց:

– Չի ներվել: Խլածը չեն ներում, այլ վերադարձնում են: Մենք հաղթել ենք առաջին ատյանում, բայց գործը դեռ դատական պրոցեսի մեջ է, այժմ Վերաքննիչում է:

 Շարունակությունը` «Փաստ» օրաթերթի այսօրվա համարում: