Պետերբուրգյան ընկերությունները հետաքրքրված են հայկական շուկայով

ՏՆՏԵՍՈՒԹՅՈՒՆ 31 Մայիս, 2017 14:07

Երկու օր առաջ տնտեսական զարգացման և ներդրումների նախարար Սուրեն Կարայանը հանդիպել էր Սանկտ Պետերբուրգի գործարար շրջանակներից կազմված պատվիրակությանը՝ քննարկելու համագործակցության հեռանկարները։ Այս մասին տեղեկանում ենք նախարարության պաշտոնական կայքի էջից:

Այցը կազմակերպվել էր Սանկտ Պետերբուրգի Արտաքին կապերի կոմիտեի նախաձեռնությամբ։ Պատվիրակության կազմում էին ընդգրկված պետերբուրգյան մի քանի ընկերությունների ներկացուցիչներ, ինչպես «Возрождение», «Петербургский тракторный завод», «Герофарм», «Агрополис» և այլն:

Գյուղմթերքի պահեստավորման և իրացման «Агрополис» կենտրոնի ներկայացուցիչը նախարարին էր ներկայացրել իրենց գործունեությունը ՌԴ–ում և նշել, որ իրենք հետաքրքրված են հայաստանյան ընկերությունների հետ համագործակցությամբ, մասնավորապես՝ գյուղմթերքի և վերամշակված սննդի ոլորտում։

Դեղորայքի մշակմամբ և արտադրությամբ զբաղվող «Герофарм» ընկերության ներկայացուցիչը նախարարի հետ հանդիպման ժամանակ նշել էր, որ իրենց ընկերությունը հետաքրքրված է Մեղրիի Ազատ տնտեսական գոտում արտադրության հիմնմամբ։

Մնացած ռուսական ընկերությունների ներկայացուցիչների հետ նույնպես քննարկվել էին հետագա համագործակցության հնարավորությունները, ձեռք բերվել կոնկրետ պայմանավորվածություններ՝ դրանք իրագործելու նպատակով:

Նշված չորս ընկերություններից «Возрождение»–ն երկար տարիների պատմություն ունեցող ընկերություն է: Այն հիմնվել է մոտ 30 տարի առաջ՝ 1989 թ: Ընկերությունն ի սկզբանե կենտրոնացած էր սալիկների և շինարարական նյութերի արտադրությամբ: Սակայն տարեց տարի ավելացնելով իր մասնաճյուղերի թիվը Ռուսաստանի այլ քաղաքներում ևս՝ այն կայուն հիմքերով հաստատվեց ռուսական շինարարական շուկան սպասարկող ընկերությունների կողքին:

1999 թ. սկսած ընկերությունը գործունեության մեկ այլ ճյուղի է անցում կատարում՝ ճանապարհատրանսպորտային շինարարություն: Ընկերության պաշտոնական կայքում կարդում ենք, որ վերջինս բավական շատ աշխատանքներ է իրականացրել թե՛ Սանկտ Պետերբուրգում, թե՛ Դաշնության այլ մեծ քաղաքներում և թե՛ Ռուսաստանի սահմաններից դուրս: Մասնավորապես կառուցվել են ճանապարհային կոմպլեքսներ, էստակադաներ, կամուրջներ:

Մյուս ընկերությունը՝ «Петербургский тракторный завод»–ը, պարզվում է ավելի վաղեմի պատմություն ունի: Ոչ ավելի, ոչ պակաս այն մոտ 90 տարվա հետագիծ ունի: Տրակտորների արտադրությամբ զբաղվող գործարանի ստաժը համարակալվում է 1924 թ.–ից, երբ արտադրվել էր առաջին՝ «Фордзон–Путиловец» անունը կրող տրակտորը:

Դեղագործությամբ զբաղվող «Герофарм»–ը համեմատաբար նոր ընկերություն է նախորդ երկու ընկերությունների կողքին. այն կազմավորվել է 2001 թ.: Ընկերության պաշտոնական կայքում կարդում ենք, որ այն բավական արագ տեմպերով առաջ գնացող ընկերություն է, քանի որ միայն 2016 թ. 2015 թ.–ի նկատմամբ ունեցած շահույթի աճը կազմել է 35%:

Միասին դեպի լավագույն կյանք նշանաբանով առաջնորդվող «Агрополис»–ը, որը այս ընկերությունների շարքում միակն է, որ զբաղվում է գյուղատնտեսական նշանակության մթերքների մշակմամբ, ինչպես նաև ջերմոցների պատրաստմամբ, իր պաշտոնական կայքէջում գրել է, որ ընկերության հաջողությունը ուղիղ կերպով կախված է նրանից, ինչպես են ընթանում իրենց հաճախորդների գործերը:

Ինչ խոսք, նման պատմություն, նման սկզբունքներ ունեցող ընկերությունների՝ Հայաստանում ներդրումներ կատարելու անգամ փորձերն են հուսադրող: Իսկ այն, որ հայկական շուկայի մթերքը կարող է ավելի մեծ պահանջարկ ունենալ ռուսական շուկայում ոչ միայն հուսադրող է, այլև՝ խոստումնալից:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ