Խնդիրներ առկա են բոլոր համակարգերում, դա ցանկացած առողջ աշխատանքային գործընթացի անմաբաժենլի մաս է. Վահե Դավթյան

Հեռուստատեսության եւ ռադիոյի ազգային հանձնաժողովի անդամների թափուր պաշտոններ զբաղեցնելու համար անց է կացվում մրցույթ:

Past.am-ը զրուցել է մրցույթի մասնակից, քաղաքական գիտությունների թեկնածու, դոցենտ Վահե Դավթյանի հետ.

- Պարոն Դավթյան, ինչո՞վ է պայմանավորված մրցույթին մասնակցելու Ձեր որոշումը:

- Մի շարք հանգամանքներով: Նախեւառաջ, նշված մրցույթը ժողովրդավարական գործընթաց է, որին կարող է մասնակցել ցանակցած քաղաքացի, եթե, իհարկե, համապատասխանում է պահանջներին: Պահանջները բավականին օբյեկտիվ են: Ինքս երբեք չեմ զբաղվել քաղաքական գործունեությամբ եւ փոխկապակցված չեմ որեւէ քաղաքական ուժի հետ, չեմ ղեկավարել որեւէ լրատվամիջոց եւ, փառք Աստծո, չունեմ դատվածություն: Մյուս կողմից, վերջին մոտ տասը տարիների ընթացքում զբաղվել եմ այնպիսի գործունեությամբ, որն այս կամ այն կերպ առնչվել է մեդիադաշտի հետ. բավականին երկար ժամանակ աշխատել եմ Հարավկովկասյան երկաթուղու հանրային կապերի ղեկավար, զբաղվել եմ ու շարունակում եմ զբաղվել ակադեմիական գործունեությամբ՝ դասավանդելով քաղաքագետներին ու լրագրողներին: Ի վերջո, ունեմ նաեւ լրագրողական կրթություն: Մի խոսքով, մտածեցի, որ ունեմ մրցույթին դիմելու որոշակի համեստ հիմքեր:

- Լուրեր են շրջանառվում, որ հաղթողների անուններն արդեն որոշված են:

- Նման լուրեր միշտ էլ շրջանառվում են: Դա արդեն դարձել է մի կարծրատիպ, որը մենք բացարձականացնում ենք: Իհարկե, այպնես չէ, որ դրա համար չկան հիմքեր, բայց սեփական փորձից ելնելով՝ կարող եմ ասել, որ միշտ չէ, որ ամեն բան ընթանում է ըստ նախապես նախագծված սցենարի: 7 հոգի է դիմել, եւ որքանով ես կարող եմ դատել՝ բոլորն էլ արժանի են ՀՌԱՀ-ի անդամ լինել: Բայց սա մրցույթ է, եւ անցնելու են ընդամենը երկուսը: Վստահ եմ, որ հանձնաժողովը ճիշտ որոշում կկայացնի:

- Այսօր ՀՌԱՀ-ում առկա են բազմաթիվ խնդիրներ: Ինչի՞ վրա կկենտրոնանաք հանձնաժողովի անդամ դառնալու դեպքում:

- Խնդիրներ առկա են բոլոր համակարգերում, եւ դա ցանկացած առողջ աշխատանքային գործընթացի անմաբաժենլի մաս է կազմում: ՀՌԱՀ-ի ներքին խնդիրներից այսօր դժվարանում եմ խոսել, քանի որ դրանից կարող է քաղաքական պոպուլիզմի հոտ գալ: Սակայն եթե անդրադառնանք ՀՌԱՀ-ի նշանակությանը երկրի մեդիահամակարգի առողջացման գործում, ապա պետք է կիսվեմ իմ այն դիտարկման հետ, որ հանրային ուշադրությունը դեպի հանձնաժողով ակտիվանում է միայն ընտրական գործընթացների ժամանակ: Միեւնույն ժամանակ ակնհայտ է, որ ՀՌԱՀ-ը առանցքային նշանակության ինստիտուտ է, որի գործունեության արդյունավետությունից կախված են ոչ միայն քաղաքական, այլ նաեւ հասարակական, մշակութային եւ ինչ-որ չափով տնտեսական գործընթացները: Այս առումով ՀՌԱՀ-ն լուրջ պատասխանատվություն է կրում հանրության առաջ, հատկապես հաշվի առնելով դրա նշանակությունը նոր սերնդի մտածելակերպի ձեւավորման, դաստիարակության գործում: Սա լրջագույն գործառույթ է: Ինքս հայր եմ, եվ չափազանց շահագրգռված եմ, որպեսզի երեխաներս վաղը ստանան արժանի մեդիակոնտենտ:

Սոսե Չանդոյան