Միշտ ցանկացել եմ մանկական ներկայացումներում խաղալ. Արամ Ավետիսյան

Սիթքոմներից և այլ նախագծերից հայտնի դերասան Արամ Ավետիսյանը Past.am-ի հետ զրույցում նշեց, որ կուզեր ունենալ մի տղա մի աղջիկ, բայց, ըստ նրա, իր տարիքում դեռ վաղ է այդ մասին մտածել:

Այսօր՝ Երեխաների պաշտպանության օրը, Արամն առանձնակի ուրախությամբ խոսեց մանկությունից: «Մանկությունից խոսելն ինձ համար շատ հաճելի է, ժպտում եմ, երբ խոսում եմ մանկությունից: Համեմատել այսօրվա երեխաների հետ կարող եմ, բայց պետք է ասեմ, որ մեր ժամանակներն ավելի լավն էին ու հետաքրքիր: Ես հիշում եմ դպրոցական տարիները, երբ դպրոցից տուն էինք գալիս, ամենասկզբում դասերն էինք պատրաստում, կարդում, գրում, սովորում, որ ժամը 5-ից դրսում խաղանք: Հիմա, կարծում եմ, այդպես չէ: Հիմա երեխաներն ավելի շատ համացանցում են, քան փողոցում խաղալիս:

Շատ-շատ եմ կարոտում եմ դպրոցական հանդեսները, որտեղ ես միշտ կայի: Կարոտում եմ բակի խաղերը` թաքնվոցի, գույներ, օղակ կոճակ, որսորդն ու բադերը և այդպես շարունակ: Երբեմն մանկությունս երեխաների միջոցով եմ փորձում գտնել: Երեխաներին շատ եմ սիրում, համեստություն չեմ անի ու կասեմ, որ երեխաններն էլ ինձ: Գրկում եմ համբուրում, ամեն ինչ անում եմ, որ ժպիտ պարգևեմ երեխաներին: Իսկապես երեխաներից անմեղ մարդիկ չկան աշխարհում»,-նշեց նա:

Հարցին՝ երեխաների համար ներկայացման կամ որևէ նախագծում հանդես եկե՞լ է, դերասանը պատասխանեց. «Եթե անկեղծ, ապա միշտ ցանկացել եմ մանկական ներկայացումներում խաղալ: Պետք է ասել, որ փոքրիկների համար խաղալն այդքան էլ հեշտ չէ: Կուզենայի մանկական նախագծերում հանդես գալ, չգիտեմ՝ ինչն է պատճառը, գուցե այն որ երեխաներ շատ եմ սիրում»:

Վերջում մեր զրուցակիցը հավելեց. «Շատ կուզենամ, որպեսզի աշխարհի բոլոր փոքրիկները լինեն առողջ: Բոլորին անհոգ մանկություն եմ մաղթում: Այս օրվա առթիվ ցանկանում եմ նաև շնորհավորել մեզ բոլերիս, քանի որ մենք բոլորս երեխա ենք»:

Լևոն Փանոսյան