Վերահսկիչ պալատը բացահայտել է մի շարք կառույցների կողմից ավելորդ ծախսեր անելու փաստը

ՀԱՍԱՐԱԿՈՒԹՅՈՒՆ 2 Հունիս, 2017 20:14

Օրերս Վերահսկիչ պալատը հրապարակել է 2016 թ–ին իրականացրած գործունեության տարեկան հաշվետվությունը: Ըստ այս հաշվետվության՝ նախորդ տարի թերացումներ են ունեցել մի շարք պետական գերատեսչություններ, այդ թվում Կրթության և գիտության նախարարությունը, Տրանսպորտի և կապի նախարարությունը, Սփյուռքի նախարարությունը, Գյուղատնտեսության նախարարության ջրային տնտեսության պետական կոմիտեն և այլն: Ամբողջական ցանկը, թերևս, բավական ծավալուն է: Ընդհանուր առմամբ՝ Վերահսկիչ պալատը 2016 թ. ընթացքում բացթողումներ է գտել թվով 22 պետական հիմնարկի, կառույցի, համայնքի և կամ կազմակերպության աշխատելաոճում: Այս հոդվածում կանդրադառնանք Կրթության և գիտության նախարարության և Տնտեսական մրցակցության պաշտպանության պետական հանձնաժողովի կողմից կատարված խախտումներին:

Ինչ վերաբերում է Կրթության և գիտության նախարարությանը, ապա վերահսկողությունն իրականացվել է նախարարության կողմից իրականացվող «Բարձրագույն մասնագիտական կրթության գնահատման համակարգի բարեփոխումներ», «Կրթության բովանդակային և մեթոդական սպասարկում և հանրապետության հանրակրթական դպրոցների ուսուցիչների վերապատրաստում», «Նախնական մասնագիտական և միջին մասնագիտական կրթության և ուսուցման բարեփոխումներ» ծրագրերում: Վերահսկողության օբյեկտ են հանդիսացել Կրթության և գիտության նախարարությունը, «Կրթության ազգային ինստիտուտ» ՓԲԸ–ն և «Ակադեմիական փոխճանաչման և շարժունության ազգային տեղեկատվական կենտրոն» հիմնադրամը:

«Բարձրագույն մասնագիտական կրթության գնահատման համակարգի բարեփոխումներ» ծրագրի մասով պարզվել է, որ նախարարությունը շրջանցելով կառավարության «Պետության կողմից դրամաշնորհի ձևով տրամադրվող ֆինանսական աջակցության գումարների օգտագործման մասին» պայմանագրի օրինակելի ձևը, «Կրթության ազգային ինստիտուտ» ՓԲԸ–ի հետ կնքել է հանձնարարության պայմանագիր, որի հետևանքով վերոնշյալ ծրագրով նախատեսված միջոցներից 58 միլիոն 382 հազար դրամի աշխատանքներն ու ծառայություններն իրականացվել են առանց «Գնումների մասին» օրենքով սահմանված ընթացակարգերի ապահովման: Սրանից բացի պայմանագրի շրջանակներում 2015 թ. կատարված 4 միլիոն 445 հազար դրամի ծախսը առնչություն չի ունեցել ծրագրի նպատակի հետ: Պարզվում է նաև, որ ՓԲԸ–ի կողմից նախարարություն ներկայացված հաշվետվություններով փաստացի ծախսերը չեն համապատասխանել իրականությանը: Նախարարության կողմից հաշվետվությունն ընդունվել և ֆինանսավորումն իրականացվել է առանց պայմանագրով նախատեսված հաշվետվության հետ պահանջվող ծախսը հիմնավորող փաստաթղթերի առկայության:

«Կրթության բովանդակային և մեթոդական սպասարկում ու հանրապետության հանրակրթական դպրոցների ուսուցիչների վերապատրաստում» ծրագրի մասով պարզվել է, ոչ հստակեցված չեն պայմանագրի հավելվածով նախատեսված գործողությունների արժեքային և քանակական ցուցանիշները: Ծրագրով սահմանված վերապատրաստվող ուսուցիչների թիվը՝ ոչ ֆինանսական ցուցանիշը, չի ապահովվել: 2015 թ. փաստացի վերապատրաստվել է 8 հազար 77 մանկավարժական մասնագետ՝ սահմանված 10 հազարի փոխարեն:

Վերահսկիչ պալատը նաև բացահայտել է, որ ծրագրի բյուջետային հայտով առանձին ծախսային հոդվածներով նախատեսվել են անհրաժեշտ միջոցներից ավելի միջոցներ, որոնք բաշխվել են նախահաշվի այլ հոդվածների վրա և օգտագործվել ոչ նպատակային գնումների համար: Այսպես բջջային հեռախոսակապի համար ծախս չի նախատեսվել, սակայն փաստացի կատարվել է 6 միլիոն 783 հազար դրամի ծախս: Միաժամանակ միջոցներ չեն նախատեսվել կապիտալ ծախսերի համար, սակայն կատարվել է 22 միլիոն 515 հազար դրամի ծախս: Սակայն ՓԲԸ–ն իրավասու չէր կատարելու ինչպես կապիտալ, այնպես էլ բջջային հեռախոսակապի ծախս:

Վերահսկիչ պալատը խախտումներ է արձանագրել նաև Տնտեսական մրցակցության պաշտպանության պետական հանձնաժողովի աշխատանքում: Այսպես, գների ուսումնասիրության համար 2015 թ. հանձնաժողովի երկու աշխատող 14 օրով գործուղվել են Սյունիքի մարզ: Սակայն գործուղման հաշվետվության, կատարված աշխատանքների տեղեկանքի և գիշերավարձի ծախսը հիմնավորող փաստաթղթերի համաձայն` աշխատողները գործուղման վայրում գտնվել են 9 օր:

Բացի այս, 2014 և 2015 թթ. դեկտեմբերի 31–ի դրությամբ «Հատուկ նպատակային այլ ծախսեր» հոդվածով դրամարկղի կանխիկ դրամի մնացորդները` համապատասխանաբար 305 հազար և 45 հազար դրամը հանձնաժողովը չի փոխանցել պետական բյուջե:

Հանձնաժողովի խախտումների թվում կա բավական հետաքրքիրը: Մասնավորապես հանձնաժողովը «իրենով» է արել աշխատանքի արդյունքում գնված կահույքը: Այսպես, 2015 թ. հանձնաժողովի «թեժ» գիծ ներկայացվել է բողոք, որ կահույքի երեք սրահներում ապրանքի կանխիկ և փոխանցումով վաճառքը տարբեր գներ ունի: Այդ սրահներից կատարվել են բազկաթոռների և պահարանների հսկիչ գնումներ, որի համար դրամարկղից հատկացվել է 2 միլիոն 250 հազար դրամ կանխիկ գումար: Հանձնաժողովի «Հսկիչ գնումների արդյունքում ձեռք բերված ապրանքների տնօրինման կարգը հաստատելու մասին» որոշման կարգի 8–րդ կետի ա) ենթակետի համաձայն` գնված կահույքը 2016 թ. հունվարին հաշվառվել է իրենց հաշվեկշռում: Արդյունքում, հանձնաժողովը «Հատուկ նպատակային այլ ծախսեր» հոդվածով հսկիչ գնումների համար հատկացված միջոցների հաշվին իր կարիքների համար ձեռք է բերել գրասենյակային կահույք այն դեպքում, երբ 2015 թ. պետական բյուջեից կահույք գնելու համար վերջինիս գումար նախատեսված չէր: