ՄԻՊ գրասենյակը «Գոլդեն Փելըս հյուրանոցում» երկօրյա կոնֆերանս կանցկացնի, որի ծախսերը կվճարի ՄԱԿ–ի գրասենյակը

Մարդու իրավունքների պաշտպանի աշխատակազմի ղեկավար Տիգրան Մարտիրոսյանի և «Գոլդեն Փելըս հյուրանոց» ՍՊԸ–ի միջև վարձակալության մասին պայմանագիր է կնքվել: Ըստ պայմանագրի՝ այս տարվա հուլիսի 8–9–ն ընկած ժամանակահատվածում ՄԻՊ գրասենյակը պատրաստվում է երկօրյա կոնֆերանս անցկացնել: Այս մասին տեղեկանում ենք Հայաստանի էլեկտրոնային կառավարման կայքի՝ Մեկ անձից կատարվող գնումներ բաժնից:

 

Պայմանագրում կարդում ենք, որ ՄԻՊ–ի և հյուրանոցի միջև կնքված պայմանագրի հիման վրա ծառայությունն իրենից ներկայացնում է կոնֆերանս սրահի վարձակալություն՝ նախատեսված 25 անձի համար: Պահանջների մեջ նշված է, որ կոնֆերանս սրահը պետք է ունենա պրոյեկտոր, էկրան և բարձրախոս: Ըստ պայմանագրի՝ ծառայության մատուցման ժամկետ է սահմանված հուլիսի 8–9–ն ընկած ժամանակահատվածը:

 

Ինչպես Past.am-ին տեղեկացրին ՄԻՊ աշխատակազմից, կոնֆերանսի մասնակիցների շրջանակը դեռևս հստակեցված չէ, իսկ թեման վերաբերում է փախստականների իրավունքների պաշտպանությանը: ՄԻՊ գրասենյակի աշխատակիցը նաև հայտնեց, որ այս թեմայով միջոցառումն արդեն երկրորդ անգամ է կազմակերպվում և այն ՄԱԿ–ի՝ փախստականների հարցերով գրասենյակի հետ և գրասենյակի ֆինանսավորմամբ իրականացվող ծրագիր է: Ինչից էլ հետևում է, որ վարձակալության ծախսերը վճարում է ՄԱԿ–ի փախստականների հարցերով գրասենյակը:

 

 

ԼԻԼԻ ԹԵՎՈՍՅԱՆ

Կիսվել