Երևանում իր աշխատանքները սկսեց գերմաներենի ուսուցիչների 3-րդ համաժողովը

Երևանում իր աշխատանքները սկսեց գերմաներենի ուսուցիչների 3-րդ համաժողովը: Երկօրյա այս համաժողովը համախմբել է Հայաստանում գերմաներենի ուսուցիչներին համագործակցության հարթակ ստեղծելու, խնդիրները վերհանելու, նորամուծություններին ծանոթանալու նպատակով:

Միջոցառման կազմակերպիչ, Հայաստանի գերմաներենի ուսուցիչների միության նախագահի պաշտոնակատար Էլիզա Ղազարյանը նշեց, որ նպատակն է առաջին հերթին ստեղծել գերմաներենի ուսուցիչների ցանց, ուսուցիչներին ներկայացնել մեթոդական, բովանդակային առումով առկա փոփոխությունները:

«Սա ավանդական դարձած միջոցառում է: Արդեն 3-րդ անգամն ենք անցկացնում: Առաջինն անցկացրել ենք 2013 թվականին, երկրորդը` 2015 թվականին: Ամեն տարի նկատվում է, որ գերմաներենով հետաքրքրվողների թիվն ավելանում է: Չնայած դպրոցներում նախորդ տարիներին գերմաներենն անկում էր ապրում, բայց չափահասների շրջանում գերմաներենը պահանջարկ է վայելում»,- «Արմենպրես»-ի հետ զրույցում ասաց Էլիզա Ղազարյանը:

Էլիզա Ղազարյանը նշեց, որ կա ՀՀ վարչապետի կարգադրությունը, ըստ որի կրթական համակարգում նախատեսված են բարեփոխումներ, առանձին շեշտադրում է կատարվում օտար լեզուների վրա, այդ թվում, գերմաներենի:

«Ի վերջո, Եվրամիություն ինտեգրվելու ճանապարհին գերմաներենն առանձնակի դեր ու նշանակություն ունի, փորձում ենք նպաստել, որ լեզուն տարածվի, դպրոցներում եթե ոչ երկրորդ, գոնե երրորդ օտար լեզու համարվի»,-ասաց նա:

Միության վարչության անդամ Կարինե Հովհաննիսյանը, կարևորելով գերմաներենի ուսուցիչների 3-րդ համաժողովի անցկացումը, նշեց, որ գլխավոր առանձնահատկությունն այն է, որ առաջին անգամ այն կազմակերպում է հենց Գերմաներենի ուսուցիչների միությունը:

«Նախորդ երկուսը կազմակերպել է գերմանական կողմը: Այսինքն` հայկական կողմն արդեն  հարթակ է ստեղծել գերմանախոսների, գերմաներենի ուսուցիչների համար: Սա նպաստելու է, որ գերմաներենն ավելի տարածվի, գերմաներենի արժեքն ավելի բարձրանա»,-ասաց նա:

Հայաստանում Գերմանիայի արտակարգ և լիազոր դեսպան Մաթիաս Քիսլերը նշեց, որ գերմաներեն լեզուն վերջին տարիներ աշխարհով մեկ մեծ կարևորություն է ստանում:

«Գերմաներենը հնարավորությունների լեզու է, Գերմանիան առաջարկում է հրաշալի ակադեմիական կրթություն: Դա հրաշալի հնարավորություն է ընձեռում Գերմանիայում աշխատատեղեր գտնելու հարցում»,-ասաց դեսպանը:

Նա նկատեց, որ Հայաստանում ևս գերմաներենի նկատմամբ հետաքրքրությունն ավելանում է: Հայաստանում մեծ ուշադրություն են դարձնում գերմաներեն լեզվին:

«ՀՀ Նախագահ Սերժ Սարգսյանը նույնպես հստակ նշեց, թե ինչքան կարևոր է գերմաներենը Հայաստանի համար: Վերջին տարիներին բազմաթիվ նախաձեռնություններ են եղել գերմաներենի հետ կապված: Առաջիկայում նույնպես սպասվում են: Նախատեսվում է Հայաստանում Գյոթեի ինստիտուտի հիմնումը: Մենք կշարունակենք համագործակցության մշակույթը»,-ասաց նա:

Դեսպանը նկատեց, որ իր պաշտոնավորման տարիների Հայաստանում 2 դպրոցներ վերակազմակերպվել են և այսօր դրանք տալիս են գերմաներենի իմացության հավաստագիր: