Մեքսիկայում առնվազն 30 մարդ է զոհվել ավազակային բախումների հետևանքով

Մեքսիկայի տարբեր նահանգներում մեկ օրում հանցավոր խմբավորումնեի հարաբերությունների պարզման զոհ է դարձել առնվազն 30 մարդ: Այս մասին հայտնում է RIA Novosti-ն՝ հղում անելով նահանգների իշխանություններին: Ամենաաղմկոտ հանցագործությունն իրականացվել է Չիուաուա նահանգի Կուաուտեմոկ քաղաքում, որտեղ անհայտ անձը մտել է բարերից մեկը և AK-47 ավտոմատով կրակել է այցելուների վրա: Տեղի դատախազությունը հայտնել է, որ 6 մարդ տեղում սպանվել է, 22 հոգի վնասվածքներ է ստացել: Սինալոա նահանգի հանրային անվտանգության նախարարության տեղեկությամբ՝ ևս 6 մարդ սպանվել է Գուամուչիլ քաղաքի մոտ բախումների հետևանքով: Սպանվածների հագին զրահաբաճկոններ և զինվորական տիպի սաղավարտներ են եղել: Ամենայն հավանականությամբ, փոխհրաձգությունը հզոր «Սինալոա» կարտելի ներսում հարաբերությունների պարզման հետևանք է եղել:   Տամաուլիպաս նահանգի գլխավոր դատախազությունը հայտնել է, որ նահանգում մի քանի բախում է տեղի ունեցել, որոնց հետևանքով 7 մարդ է սպանվել: Նուեվո-Լեոն նահանգում իշխանությունները հայտնաբերել են ավտոմեքենա, որի մեջ 4 մարդու անդամահատված մարմին է եղել, այդ թվում՝ 1 կնոջ: Նույն նահանգի Սյուդադ-Գուադալուպե քաղաքում հայտնաբերվել է 1 մարդու մարմին: Իսկ Վերակրուս նահանգում հայտնաբերվել է 6 մարդու մարմին՝ լեռնային տարածքում ճամփեզրին պլաստիկե տոպրակների մեջ: