Դաշնակցականնե՞րն էլ են սկսել հետաքրքրվել հանքարդյունաբերության «թափոնների» օգտահանմամբ

ՀԱՍԱՐԱԿՈՒԹՅՈՒՆ 8 Հունիս, 2017 16:03

«Գեվլեռ» ՍՊԸ–ն Սյունիքի մարզի Կապանի պղնձի հանքավայրի կենտրոնական հանքի նոր տրանսպորտային հանքուղու ելքից արտահոսող հանքայնացված ջրի երկրաբանական ուսումնասիրության նախագծի՝ շրջակա միջավայրի վրա ազդեցության նախնական գնահատման հայտ է ներկայացրել Բնապահպանության նախարարություն: Ըստ այդմ, հունիսի 20–ին Կապանի համայնքապետարանում տեղի կունենա «Գեվլեռ» ՍՊԸ–ի կողմից ներկայացված նախագծի՝ շրջակա միջավայրի վրա ազդեցության նախնական գնահատման հայտի վերաբերյալ հանրային քննարկումների երկրորդ փուլը: Մասնավորապես ընկերությունը հետաքրքրված է հանքավայրի հանքուղուց արտահոսող գունավոր մետաղների կորզման հնարավորությամբ: Կառավարության Էլեկտրոնային ռեգիստրից տեղեկանում ենք, որ «Գեվլեռ» ՍՊԸ–ի գրանցումը կատարվել է միայն վերջերս՝ ապրիլի 27–ին, իսկ ընկերության հիմնադիրն է Լևոն Գևորգյանը: Ինչպես կարդում ենք «Հետք» էլեկտրոնային պարբերականում՝ վերջինս դաշնակցական նախկին պատգամավոր Գագիկ Գևորգյանի եղբայրն է:

Ծրագրվող երկրաբանական ուսումնասիրության աշխատանքների՝ Կապանի պղնձի հանքավայրի տարածքը գտնվում է Սյունիքի մարզում, Կավարտ գետի միջին հոսանքի ավազանում, Կապան քաղաքից 3–4 կմ հյուսիս–արևմուտք և իր մեջ ներառում է մի շարք գործող և լքված հանքեր, հանքային տեղամասեր: Մոտակա բնակավայրերից են Սյունիք, Նորաշենիկ, Առաջաձոր և Ձորաստան գյուղերը: Երկրաձևաբանական տեսակետից ուսումնասիրության տարածքը հարում է Խուստուփ Կատարի լեռներին, որոնք հանդիսանում են Մեղրու լեռների հյուսիս–արևելյան ճյուղավորումը:

Նախնական գնահատման հայտի մեջ կարդում ենք, որ պղնձով հարուստ ընդերքն օգտագործելու նպատակով այստեղ ստեղծվել էր «Կապանի լեռնահարստացուցիչ կոմբինատը», որի լուծարումից հետո հանքարդյունաբերության ոլորտում գործունեություն է իրականացնում «Դանդի Փրիշս Մեթալս Կապան ՓԲԸ–ն»: Համայնքի տարածքում տնտեսական գործունեություն են իրականացնում «Կապանի մեքենաշինական գործարան» ԲԲԸ–ն, «Կապանի Ճանապարհների շինարարության և շահագործման» ՍՊԸ–ն, Կապանի «Նորոգշին» ՍՊԸ–ն և այլն:

Երկրաբանական ուսումնասիրության աշխատանքների ծրագիրը ներկայացվել է համայնքի բնակիչներին, քննարկվել է ծրագրվող աշխատանքներում բնակիչների ներգրավման հարցը:

«Կապանի նոր տրանսպորտային հանքուղու հանվաքավայրի հանքարանային ջրերի հիմնական հոսքը դուրս է գալիս երկրի մակերևույթ հարստացուցիչ ֆաբրիկայի տարածքում: Այդ ջրերը մեծագույն հետաքրքրություն են ներկայացնում գունավոր մետաղների կորզման առումով, քանի որ մաքրումից հետո կարող են օգտագործվել տեխնոլոգիական նպատակներով Կապանի հանքավայրի հանքաքարերի վերամշակման համար»,– գրված է նախագծում:

Այնտեղ նաև ասվում է, որ ծրագրվող աշխատանքների իրականացումը կնպաստի Կապանի հանքային շրջանի բնապահպանական իրավիճակի բարելավմանը: Ըստ ընկերության՝ ինչպես գործող հանքերը, այնպես էլ կոնսերվածքները հանդիսանում են ջրավազանների աղտոտվածության աղբյուր և երկրի մակերևույթին հայտնվելիս այդ մետաղներով հարստացված ջրերը թափվում են բաց ջրավազաններ՝ աղտոտելով վերջիններս և բացասաբական ազդեցություն գործելով տարածաշրջանի էկոլոգիական իրավիճակի վրա: