«Ելք» խմբակցությունը երկրորդ ընթերցմամբ կողմ կքվեարկի հակակոռուպցիոն մարմին ստեղծելու օրինագծին

Ազգային ժողովի «Ելք» խմբակցությունը երկրորդ ընթերցմամբ կողմ կքվեարկի Կոռուպցիայի կանխարգելման հանձնաժողովի մասին և հարակից նախագծերի փաթեթին: Օրենսդրական նախաձեռնության երկրորդ ընթերցմամբ քննարկման ընթացքում իր ելույթում այս մասին ասաց «Ելք» խմբակցության պատգամավոր Էդմոն Մարուքյանը: «Կարծիքներ կան, որ կարելի էր ավելի հզոր հակակոռուպցիոն մարմին ստեղծել: Ես համաձայն եմ այդ կարծիքների հետ, սակայն կարծում եմ, որ սա ևս հնարավորություն է: Մենք տեսնում ենք, որ իշխանությունը կոռուպցիայի դեմ պայքարում քայլ է անում և պետք է օգտվենք այս հնարավորությունից»,- «Արմենպրես»-ի ընթերցմամբ՝ ընդգծեց Մարուքյանը:

Նա հավելեց, որ ձևավորվելիք հակակոռուպցիոն մարմինն առաջին հերթին հնարավորություն է լինելու ընդդիմության և քաղաքացիական հասարակության ձեռքին: «Ես կարծում եմ, որ մենք կարող ենք օգտագործել այս հնարավորությունը, վեր հանել խնդիրները և ապագայում ունենալ կայացած հակակոռուպցիոն մարմին: Սա է պատճառը, որ մենք կողմ ենք քվեարկելու»,- եզրափակեց Մարուքյանը:

Էդմոն Մարուքյանի ելույթին արձագանքեց ԱԺ նախագահ Արա Բաբլոյանը: Նա համաձայնեց պատգամավորի հետ և կարևորեց այն հանգամանքը, որ ձևավորվելիք մարմնում նաև ընդդիմության և քաղաքացիական հասարակության ներկայացուցիչներ են ընդգրկվելու: «Կարծում եմ, որ շատ կարևոր է, որպեսզի մենք համատեղ աշխատանքով կարողանանք արմատախիլ անել կոռուպցիան»,- եզրափակեց Բաբլոյանը: