Երևանի Ջրվեժ թաղամասում ինժեներական քաղաք կստեղծվի

Երևանի Ջրվեժ թաղամասում ինժեներական քաղաք ստեղծելու նախագիծը ՀՀ կառավարության քննարկման վերջնական փուլում է, մինչև տարեվերջ կլինի որոշում կառավարության մասնակցության մասով: Այս մասին լրագրողների հետ զրույցում հայտնեց Ձեռնարկությունների ինկուբատոր հիմնադրամի տնօրեն Բագրատ Ենգիբարյանը: «Շուտով կհայտարարենք մրցույթ, թե ինչ տեսք պետք է ունենա քաղաքը: Շիրարարությունը մեկուկես տարվա ընթացքում, կարծում եմ, կիրականացվի: Այնտեղ կտեսնենք նոր հայկական ու արտասահմանյան կազմակերպությունների, որոնք ոչ միայն տարածք կվարձակալեն, այլև իրենց շենքերը կստեղծեն»,-ասաց ՁԻՀ տնօրենը:

Խոսելով Արմթեքի գրանցած արդյունքների մասին` Բագրատ Ենգիբարյանը նշեց, որ այն նոր ծրագրերի իրականացման հարթակ է: «Այն շատ լավ հարթակ է դարձել ներկայացնելու նոր ծրագրեր, որոնք միանգամից քննարկվում ու կյանքի են կոչվում: Համաժողովից ծնվեց Մայքրոսոֆթ ինովացիոն կենտրոնը, Ազգային ինժեներական լաբորատորիան, շուտով նաև Ջրվեժի ինժեներական քաղաքը: Բացի այդ` սա բացառիկ հնարավորություն է հետաքրքիր գործարարների հետ հանդիպելու համար»,-ավելացրեց Ենգիբարյանը:

Ինչ վերաբերում է այս տարվա ծրագրերին, ապա ՁԻՀ տնօրենը շեշտեց Մայքրոսոֆթ ընկերության փոխնախագահ Վահե Թորոսյանի հայտարարությունը, որ Հայաստանը պետք է դարձնել մոբայլ ու ամպային լուծումների կենտրոն:

Անդրադառնալով «Արմթեք 2015»-ի շրջանակներում անցկացվող դրամաշնորհային մրցույթներին` Բագրատ Ենգիբարյանը հայտնեց, որ Գիտության և տեխնոլոգիաների ձեռներեցության` STEP ծրագրի շրջանակներում 5 կազմակերպություն կստանա 15 հազար դոլարի դրամաշնորհ, իսկ  Մաքուր տեխնոլոգիաների բիզնես գաղափարների մրցույթին կմասնակցի 24 կազմակերպություն, որոնց համար սահմանված է 3 մրցանակային տեղ, ինչպես նաև մեկ մրցանակ, որով հաղթող թիմը Սիլիկոնային հովտում կներկայացնի իր նախագիծը:

Բացի այս ծրագրերից, ՁԻՀ-ի միջոցով դրամաշնորհ է տրամադրվում մինչև 3 տարվա փորձ ունեցող կազմակերպություններին մինչև 50 հազար դոլարի չափով: «50 հազար դոլարանոց դրամաշնորհների դեպքում թիմերը գնահատվում են ոչ միայն նորարարական գաղափարի, այլև հստակ բիզնես գրավչության համար»,-նշեց Բագրատ Ենգիբարյանը` ավելացնելով, որ մինչ այժմ 50 հազար դոլարանոց դրամաշնորհներ են տրվել 30 ընկերության, որոնցից 16-ը` Գյուրու և Վանաձորի տեխնոլոգիական թիմերին: