Նախարարության 3 ամենաթանկ գործուղումները նախարար Լևոն Մկրտչյանինն են. «Փաստ»

«Փաստ» օրաթերթը գրում է.

Կրթության և գիտության նախարարության 2016 թ. բյուջեն կազմել է 948 միլիոն 847 հազար դրամ, որից փաստացի ծախսվել է 928 միլիոն 666 հազար դրամ, որի մեջ, սակայն, չեն մտնում արտասահմանյան գործուղումների գծով ծախսերը, քանի որ դրանք կատարվել են համապատասխան իրավական ակտերի հիման վրա: Այս մասին «Փաստին» տեղեկացնում են նախարարությունից մեր՝ արտասահմանյան գործուղումների վերաբերյալ հարցմանն ի պատասխան:

Ըստ հարցման պատասխանի՝ Կրթության և գիտության նախարարությունը նախորդ տարի ունեցել է թվով 12 արտասահմանյան գործուղում, որի ընդհանուր ծախսը կազմել է 8 միլիոն 308 հազար 96 դրամ, որից էլ ավիատոմսերի գնման համար ուղղվել է մոտ կեսը՝ 4 միլիոն 352 հազար 494 դրամ, իսկ մնացածն էլ՝ 3 միլիոն 955 հազար 602 դրամը՝ օրապահիկի և գիշերավարձի:

Հատկանշական է, որ այդ 12 գործուղումներից 9–ի մասնակիցը նախարար Լևոն Մկրտչյանն է: Եվ իր 9 գործուղումների համար ընդհանուր առմամբ ծախսվել է 6 միլիոն 73 հազար 455 դրամ:

Նշված 12 գործուղումներից ամենաթանկը արժեցել է 1 միլիոն 353 հազար 139 դրամ: Սա նախարար Լևոն Մկրտչյանի դեպի Բոստոն գործուղման արժեքն է, որի ավիատոմսը կազմել է 1700 ԱՄՆ դոլարից մի փոքր ավելի՝ 835 հազար դրամ: Նախորդ տարվա մարտի 28–ից մինչև ապրիլի 2–ն ընկած ժամանակահատվածում Բոստոնում ՀՀ պատվիրակության կազմում աշխատանքային այցով գործուղման ծախսերը կապված սննդի և գիշերակացի հետ կազմել են 518 հազար 139 դրամ:

1 միլիոն դրամից ավել է արժեցել Լևոն Մկրտչյանի դեպի Փարիզ հուլիսյան 3–օրյա գործուղումը: Մասնավորապես, գործուղման ամբողջ ծախսը կազմել է 1 միլիոն 164 հազար 656 դրամ, որից ավիատոմսի գնման համար նախատեսվել է 794 հազար դրամ, իսկ օրապահիկի և գիշերակացի՝ 370 հազար 656 դրամ: Նշենք, որ նախարարը Փարիզ էր մեկնել «ԿԳՆ և Ֆրանկոֆոնիայի համալսարանական գործակալության միջև համատեղ գիտահետազոտական ծրագրերի իրականացման մասին» փոխըմբռնման հուշագրի ստորագրման նպատակով:

Նախարարության մեկ այլ՝ կրկին 1 միլիոնը գերազանցող գործուղում է տեղի ունեցել հոկտեմբերի 3–10–ն ընկած ժամանակահատվածում դեպի Մոսկվա աշխատանքային այցի շրջանակներում: Այս գործուղումը արժեցել է 1 միլիոն 83 հազար 819 դրամ: Գործուղվել են նախարարն ու նրա տեղակալ Մանուկ Մկրտչյանը: Ըստ հարցման պատասխանի՝ պաշտոնյաների ավիատոմսերի գնման համար ընդհանուր ծախսվել է 371 հազար դրամ, իսկ օրապահիկի և գիշերակացի համար տարբեր գումարներ են վճարվել: Եթե նախարարի համար վճարվել է 266 հազար 665 դրամ, ապա նրա տեղակալի համար գրեթե կրկնակի՝ 446 հազար 154 դրամ:

Որպես նախարարության թանկ գործուղում կարելի է առանձնացնել նաև ապրիլի 10–12 դեպի Բրյուսել, այնուհետև էլ՝ դեպի Մոսկվա Մկրտչյանի գործուղումները, որոնց դեպքում ավիատոմսը արժեցել է 640 հազար դրամ և ըստ ամենայնի՝ եղել է տրանզիտ չվերթ: Մկրտչյանը նախ մեկնել է Բրյուսել և այդ գործուղման համար վճարվել է 998 հազար 963 դրամ: Բրյուսելում անցկացրած օրերի ընթացքում նախարարին հատկացվել է 358 հազար 963 դրամ: Այնուհետև դեպի Մոսկվա գործուղման գիշերակացի և օրապահիկի համար նախարարին տրամադրվել է 241 հազար 195 դրամ:

Եվս մեկ ոչ մատչելի գործուղում իրականացվել է նախորդ տարվա մարտին: Այս անգամ գործուղվել է նախարարության աշխատակազմի արտաքին կապերի և սփյուռքի վարչության պետ Տիգրան Սահակյանը: Վերջինս մեկնել էր Աթենք ՀՀ պատվիրակության կազմում: Նրա գործուղումն արժեցել է 841 հազար 423 դրամ, որից ավիատոմսը ձեռք է բերվել 444 հազար 784 դրամ, իսկ մնացած 396 հազար 639 դրամը նախատեսվել է սննդի և գիշերակացի ծախսերի համար:

  Շարունակությունը` «Փաստ» օրաթերթի այսօրվա համարում