Բուհ-երի նորավարտ մասնագետները խիստ արդիական են համարում ՀՀԿ-ական պատգամավորի առաջարկը

Ազգային ժողովի Հանրապետական խմբակցության պատգամավոր Արման Սաղաթելյանն օրերս բարձրաձայնեց գործատուներին և բուհ-երի շրջանավարտներին հուզող կարևորագույն խնդիր մասին: Պատգամավորը սոցցանցի իր էջում հանդես եկավ աշխատանքային շուկայի «փակ դռները» բուհ-ի նորավարտ մասնագետների համար բացելու առաջարկով՝ նշելով, որ մտադիր է հանդես գալ օրենսդրական նախաձեռնությամբ և միջազգային փորձն ուսումնասիրելով՝ գործընկերների հետ համատեղ, լուծումներ գտնել բուհ-երի շրջանավարտների համար պրակտիկ հմտություններ ապահովող միջավայր ձևավորելու նպատակով: 

Գաղտնիք չէ, որ թե՛ պետական, թե՛ մասնավոր սեկտորում գործատուները փնտրում են ոչ միայն բանիմաց, այլև փորձառու աշխատակիցների, իսկ բարձրագույն ուսումնական հաստատություններն անգամ փայլուն առաջադիմությամբ ավարտածները, որպես կանոն, չեն բավարարում պահանջին: Համակարգված և հավասար հնարավորություններ ընձեռող օրենքի ընդունումը կարող է այս խիստ արդիական խնդրի լուծման շահավետ եղանակ դառնալ:

Թեմայի շուրջ Aysor.am-ը զրուցել է հայաստանյան բուհերի այս տարվա շրջանավարտների հետ:

Մելինե Պետրոսյանը գերազանցությամբ ավարտել է ԵՊՀ Միջազգային հարաբերությունների ֆակուլտետի Քաղաքագիտություն բաժինը:



Մելինեի փոխանցմամբ՝ աշխատանք փնտրել է ուսանողական տարիներից սկսած, սակայն դասաժամերի դասավորության պատճառով, փորձերը ձախողվել են: Նա ծանոթացել է նախաձեռնությանը և կարծում է, որ այն հիանալի միջոց կարող է դառնալ պրակտիկ գիտելիքներ ձեռք բերելու առումով: «Չեմ կարծում, որ կա այնպիսի ուսումնական հաստատություն, որը բավարար գործնական գիտելիք է տալիս։ Փորձի ձեռքբերման համար, անպայման, անհրաժեշտ է նախապատրաստական փուլ։ Համալսարանը տալիս է այն տեսական գիտելիքները, առանց որոնց անհնար է լավ մասնագետ դառնալ, իսկ գործնական գիտելիքները ժամանակի ընթացքում ձեռք ենք բերում, միակ խնդիրը՝ համապատասխան գործատու գտնել է», - նշեց Մելինեն՝ հավելելով, որ կցանկանա համապատասխան փորձառություն ձեռք բերել ԱԺ մշտական հանձնաժողովներից որևէ մեկում: 

Մարիաննա Մանուկյանն այս տարի ավարտել է Երևանի պետական համալսարանի Տնտեսագիտության և կառավարման ֆակուլտետը:



Հեռանկարային է համարում բանկային ոլորտում աշխատանքը, սակայն դեռևս հարմար տարբերակ չի գտել: Մարիաննայի կարծիքով՝ բուհ-ը տրամադրում է տեսական գիտելիքներ, որոնք գործնականում միշտ չէ, որ հաջողության երաշխիք են դառնում:

«Միանշանակ դրական ու խիստ արդիական եմ գնահատում նախաձեռնությունը, այն իրոք շատ օգտակար է: Կան գործատուներ, որոնք որոշակի փորձաշրջան են սահմանում, սակայն դա հիմնականում միտված է լինում աշխատակցի մասնագիտական ու անձնային որակները ստուգելուն: Գործատուներին մեղադրել ևս չի կարելի, նրանք փնտրում են ունիվերսալ ու փորձառու աշխատակիցներ, և այս հարցում միասնական քաղաքականության առկայությունն, իմ կարծիքով, կարող է  արդյունավետ լուծում լինել՝ թե՛ գործատուի, թե՛ բուհերի շրջանավարտների համար», - նշեց Մարիաննան:

Մարի Բաղդասարյանը բարձր գնահատականներով ավարտել է ԵՊՀ Ինֆորմատիկայի և կիրառական մաթեմատիկայի ֆակուլտետը: Աշխատանք սկսել է փնտրել երրորդ կուրսն ավարտելուց հետո, սակայն անկախ այն հանգամանքից, որ ծրագրավորողի մասնագիտությունն այժմ պահանջված է, այսպես էլ չի կարողացել հարմար տարբերակ գտնել:



«Որոշ գործատուներ, անգամ եթե համաձայնում էին, որպեսզի փորձաշրջան անցնեմ, նախապես նշում էին, որ դա իրենց մոտ աշխատանքի անցնելու գրավական չէ, քանի որ աշխատանքային փորձ չունեմ, իսկ շատերն անգամ փորձաշրջան անցնելու հնարավորություն չէին ընձեռում», - պատմեց Մարին: Նա ցանկանում  է աշխատել իր մասնագիտությամբ՝ IT ոլորտում: Մարին ևս կարծում է, որ կա գործնական գիտելիքներ ապահովող միասնական հարթակի անհրաժեշտություն: «Համալսարանն ապահովում է տեսական գիտելիքներ, բայց գործնականում, առանց նախապատրաստական փուլ անցնելու, գրեթե հնարավոր չէ բավարարել գործատուի պահանջները: Եթե նախաձեռնությանն ընթացք տրվի, այն մեծ օգուտ կտա ուսանողներին», - ասաց նա՝ հավելելով, որ շատ է ցանկանում փորձառություն ձեռք բերել «Թումո» կենտրոնում, կամ PicsArt-ում:
 
Արմինե Կարապետյանն այս տարի գերազանցությամբ ավարտել է Երևանի պետական համալսարանի Տնտեսագիտության և կառավարման ֆակուլտետը: Նա թեև դեռևս չի փորձել աշխատանք գտնել, քանի որ մտադիր է շարունակել ուսումը, բայց անչափ կարևորում է հետբուհական պրակտիկան՝ այն համարելով որակյալ մասնագետ դառնալու կարևոր պայման:



«Բուհ-ում ստացել եմ բավարար գիտելիքներ, բայց ցանկացած աշխատանք որակյալ կատարելու և աշխատանքային միջավայրին ինտեգրվելու համար պետք է որոշակի նախապատրաստական փուլ անցնել և հիանալի կլինի, եթե այդ գործընթացը համակարգված լինի և բոլորը հավասար հնարավորություններ ունենան», - նշեց Արմինեն՝ հավելելով, որ կցանկանար փորձ ձեռք բերել միջազգային որևէ խոշոր կազմակերպությունում, օրինակ՝ Apple-ում կամ Berkshire Hathaway-ում:

Սվետլավա Պետրոսյանը գերազանցությամբ ավարտել է  ԵՊՀ ինֆորմատիկայի և կիրառական մաթեմատիկայի ֆակուլտետը: Նա ևս փորձել է աշխատանք գտնել, դեռևս ապարդյուն: 



«Հիմնականում գործատուն ցանկանում է աշխատանքային փորձ, ինչը, օրինակ, իմ պարագայում խնդիր է», - իր փորձով կիսվեց Սվետլանան: Նա ցանկանում է աշխատել մասնագիտությամբ և համարում է, որ թեև առաջնայինը գիտելիքն է, սակայն պրակտիկ փորձը հաճախ օգնում է լուծումներ գտնել այնպիսի իրավիճակներում, որտեղ գիտելիքն այդքան էլ էական չէ:

«Թեև գործընթացի մանրամասներին չեմ տիրապետում, բայց կարծում եմ՝ միանշանակ օրենսդրությամբ սահմանված կարգով է պետք լուծել խնդիրը՝ խտրականությունից ու կամայականություններից խուսափելու համար: Նախաձեռնության՝ կյանքի կոչվելու դեպքում առնվազն կստանանք մասնագիտական տեղեկատվություն ու փորձ, որը վստահաբար կօգնի կարիերայի հարցում», - ասաց Սվետլանան:

Նշենք, որ նախաձեռնությունն այս պահին քննարկման փուլում է գտնվում: Արման Սաղաթելյանը նախօրեին Tert.am-ի հետ զրույցում հայտնել է, որ նախաձեռնության հիմնական իմաստը ոլորտում պետական հստակ քաղաքականություն ունենալն է, իսկ իր ստացած առաջարկները բազմասպեկտր են, բազմաբնույթ: Պատգամավորը քննարկումներ է ունեցել Աշխատանքի և սոցիալական հարցերի, ինչպես նաև Կրթության ու գիտության նախարարությունների պատասխանատուների հետ և դրական է համարում այն, որ մոտեցումներում և տեսլականներում համընկնումներ կան:  Ա.Սաղաթելյանը նաև նշել է, որ համագործակցության առաջարկ է ստացել ԱԺ նախկին պատգամավոր Թևան Պողոսյանի ղեկավարած «Մարդկային զարգացման միջազգային կենտրոն»-ից, ինչպես նաև «Երիտասարդական ուսումնասիրությունների կենտրոն»-ից:  Հավանաբար, մոտ ապագայում ականատես կլինենք ոլորտի կանոնակարգմանն ուղղված հստակ քայլերի: