Տարեսկզբին ավելի քան 3 միլիարդ դրամի դրամաշնորհներ ենք ունեցել

ՏՆՏԵՍՈՒԹՅՈՒՆ 17 Հունիս, 2017 15:01

2017 թ. հունվար–ապրիլ ամիսներին ՀՀ պետական բյուջեի եկամուտները կազմել են 383 միլիարդ 200 միլիոն դրամ, իսկ ծախսերը` շուրջ 394 միլիարդ 700 միլիոն դրամ, որոնք համապատասխանաբար 64,3%–ով և 56,7%–ով ապահովել են կառավարության առաջին կիսամյակի ծրագրի կատարումը: Այս մասին տեղեկանում ենք Ֆինանսների նախարարության կայքում հրապարակված հաշվետվությունից:

2016 թ. հունվար–ապրիլ ամիսների համեմատ պետական բյուջեի եկամուտներն աճել են 8,8%ով կամ 31 միլարդ 100 միլիոն դրամով, ինչը պայմանավորված է եղել հարկային եկամուտների և այլ եկամուտների աճով: Ըստ հաշվետվության՝ պետական բյուջեի եկամուտների 94,7%–ը ձևավորվել է հարկային եկամուտների և պետական տուրքերի, 4,4%–ը` այլ եկամուտների, 0,9%–ը` պաշտոնական դրամաշնորհների հաշվին:

2017 թ. հունվար–ապրիլ ամիսներին պետական բյուջե են մուտքագրվել 363 միլիարդ 100 միլիոն դրամ հարկային եկամուտներ և պետական տուրքեր: 2016 թ. նույն ժամանակահատվածի համեմատ հարկերն ու տուրքերն աճել են 10,6%–ով կամ շուրջ 34 միլիարդ 900 միլիոն դրամով, որը հիմնականում պայմանավորված է ավելացված արժեքի հարկի, բնապահպանական և բնօգտագործման վճարների, եկամտային հարկի, ակցիզային հարկի, շահութահարկի և մաքսատուրքի գծով մուտքերի աճով:

Տարեսկզբին հարկային եկամուտների և պետական տուրքերի 35,5%–ն ապահովվել է ավելացված արժեքի հարկի հաշվին: Այն կազմել է շուրջ 129 միլիարդ դրամ և 10,5%–ով կամ 12 միլիարդ 300 միլիոն դրամով գերազանցել նախորդ տարվա նույն ցուցանիշը: ԱԱՀ–ի մուտքերից շուրջ 53 միլիարդ 800 միլիոն դրամը ստացվել է ՀՀ սահմանին հարկումից, 75 միլիարդ 200 միլիոն դրամը` ապրանքների և ծառայությունների ներքին շրջանառությունից:

Ըստ փաստաթղթի՝ հաշվետու ժամանակահատվածում պետական բյուջեի հարկային եկամուտների և պետական տուրքերի 13,4%ը ձևավորվել է շահութահարկի հաշվին` կազմելով 48 միլիարդ 800 միլիոն դրամ:

Այս տարվա առաջին չորս ամիսների ընթացքում ստացվել են 3 միլիարդ 400 միլիոն դրամ պաշտոնական դրամաշնորհներ՝ կազմելով առաջին կիսամյակում նախատեսված մուտքերի 31,1%–ը: Միջոցները տրամադրվել են նպատակային ծրագրերի շրջանակներում, որից 96 միլիոն 900 հազար դրամը՝ ՀՀ պետական մարմինների արտաբյուջետային հաշիվներով շրջանառվող ծրագրերի շրջանակներում, որոնք կազմել են ծրագրած մուտքերի 20,8%–ը:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ