Սիրիայում բոլորն են շտապում, բայց նաև՝ սխալվում

ՄԻՋԱԶԳԱՅԻՆ 20 Հունիս, 2017 16:02

Սիրիական պատերազմն, ըստ ամենայնի, մոտենում է իր ավարտին, և տարածաշրջանում շահագրգիռ բոլոր ուժերը փաստացի շտապում են այն հնարավորինս իրենց օգտին հանգուցալուծել: Անցած շաբաթ, օրինակ, Սիրիայի հարավում ծանր զինտեխնիկա տեղակայելուց հետո, ամերիկյան օդուժն առաջին անգամ Ռաքքայի հարավում գտնվող Ջադին քաղաքի մերձակայքում սիրիական բանակի Су–22 ինքնաթիռը թիրախավորեց, և մինչև այս պահն էլ կործանված ինքնաթիռի օդաչուի դին չի գտնվում: Ընդ որում, Պենտագոնից ստացված հաղորդագրության համաձայն, հարվածը համաձայնեցվել է կոալիցիոն ուժերի հետ՝ այդ մասին տեղեկացնելով նաև ռուսական հրամանատարությանը: Ինչ վերաբերում է սիրիական կողմին՝ նրանից էլ պահանջել են չթիրախավորել դաշնակից քրդերին:

Սիրիական բանակը, ՍԱՆԱ գործակալության փոխանցմամբ, հերքել է իր կողմից քրդերի թիրախավորումը՝ նշելով, թե իրենց իսկ երկրում ընդամենն օրինական գործողություններ են իրականացվել Ռաքքայից փախչող ԴԱԻՇ գրոհայինների նկատմամբ, իսկ, այսպես կոչված, Կոալիցիան սեփական կասկածելի նպատակներն է հետապնդել՝ «կոորդինացնելով դրանք ջիհադիստների հետ և ռեալիզացնելով սիոնիստական ռեժիմի հետ կազմած իր պլանները»: ՌԴ արտգործնախարար Սերգեյ Լավրովն էլ շաբաթ օրը դատապարտելով կատարվածը՝ խնդիրը շատ ավելի լայն հարթության մեջ է դիտարկել, անդրադառնալով Հորդանանի ու Իրաքի սահմանին գտնվող Աթ–Թանֆում կամ Ալ–Թանեֆում տեղակայված ամերիկյան ծանր զինտեխնիկայի փաստին: «Փորձագետների կարծիքով՝ Սիրիայում ամերիկյան զինտեխնիկայի տեղակայումը ԴԱԻՇ–ի դեմ պայքարելու նպատակ չի հետապնդում, ինչը նշանակում է, որ ԱՄՆ–ն սոսկ իր ռազմական ներկայությունն է ձգտում ամրապնդել Սիրիայում…այդ ճանապարհով կանխելով նաև շիական մահիկի ստեղծումը...եթե սա ճշմարտություն է՝ ցավալի է, որ ահաբեկչության դեմ պայքարի միասնական ճակատի ստեղծումն այժմ իր տեղը զիջելու է իսլամական երկրների տարաձայնությունները չարաշահելու և աշխարհաքաղաքական շարժերի փորձին»:

Այստեղ նախապես և, ըստ ամենայնի, արդարացիորեն հայտարարելով Թեհրանի վերջին ահաբեկչություններում սաուդական ձեռագրի վերաբերյալ, որոշել են խաղալ հայտարարված կանոններով և Սիրիայում հրապարակայնորեն պատժել ԴԱԻՇ–ին: Իրանի ռադիո–հեռուստատեսության լրատվական գործակալությունն ու Փարսը երեկ հաղորդեցին, որ հետևելով Թեհրանում իրականացված ահաբեկչական վերջին ոճրագործության անմեղ արյունն անպատասխան չթողնելու իր խոստմանը՝ Իսլամական հեղափոխության պահակազորը որոշել է պատժել Սիրիայի թաքֆիրական ահաբեկիչներին և երկիր–երկիր միջին հեռահարության մի քանի հրթիռներով հարվածել Սիրիայի արևելյան Դեյր–էլ–Զորում գտնվող նրանց հրամանատարական կենտրոնին, համախմբման վայրերին ու մահապարտական ավտոմեքենաների արտադրության կենտրոնին: Հաղորդագրության մեջ նաև ասված էր, թե Իրանի դեմ ուղղված քայլերը կրկնվելու դեպքում իսլամական հեղափոխության պահակազորի հեղափոխական զայրույթն ու վրեժի բոցերը կայրեն դրանց հեղինակներին, ոչ թե կբավարարվեն արդեն հասցվածով: Իրանի իսլամական հեղափոխության պահակազորի ավիատիեզերային ուժերի հրամանատար, բրիգադային գեներալ Ամիր Ալի Հաջիզադեն էլ երեկ ասուլիսում հայտարարեց, թե՝ «թող ահաբեկիչներն իմանան, որ Թեհրանը Փարիզ ու Լոնդոն չէ... և նրանց միջազգային հովանավորներն էլ թող լավ ընկալեն այս գործողության զգուշացնող ուղերձը»:

Բնականաբար, փաստը անակնկալի բերեց Կոալիցիային: Իսկ երբ երեկ հայտարարվեց, որ Սիրիայի սահմանին Իրաքն էլ ի՛ր հերթին է ապտակել ահաբեկչներին՝ ամբողջովին ազատագրելով Հորդանանի և Սիրիայի հետ սահմանագիծն ու ամերիկյան ռազմաբազային մոտ գտնվող Ալ–Վալիդ անցուղին, զարմանալու հերթը բոլորինս էր, որովհետև, պարզվեց, Իրաքի բանակն ամերիկա–հորդանանյան պլաններին խանգարող այդ լայնածավալ օպերացիան իրականացրել էր նաև կոալիցիոն կործանիչներն օգտագործելով...

Սիրիական բանակին հրամանատարությունը, սակայն, երեկ ռուսական Իզվեստիայի էջերում անուղղակիորեն բացահայտեց հանելուկի պատասխանը: Ըստ այդմ՝ ԱՄՆ–ն այլևս հնարավորություն չի ունեցել վերահսկել սահմանը միաժամանակ երեք ճակատով և կոորդինացնել բոլոր դաշնակիցներին, դրանց թվում՝ Սիրիայի ազատ բանակին և այլոց, հետևաբար՝ ստիպված է եղել հաշտվել իրականության հետ: Նույն աղբյուրի համաձայն՝ այժմ նույնիսկ Աթ–Թանֆի ամերիկյան բազան է անպետք համարվում, այդ պատճառով էլ ոչ թե երկրորդ, այլ նոր՝ Ազ–Զաքֆի բազան է հիմնվում, որպեզի մի վերջին ճիգով, սիրիական զինված ընդդիմության հետ միասին, արգելափակվի Պալմիրա–Դեյր էզ–Զոր ավտոճանապարհը...