«Զվարթնոց»–ի տարածքը սպասարկող տաքսու վարորդների վերաբերյալ թմրաբանական բժշկական հաստատություններից տեղեկատվություն կվերցվի. «Փաստ»

«Փաստ» օրաթերթը գրում է.

ՀՀ վարչապետ Կարեն Կարապետյանը կառավարության հերթական նիստերից մեկում ակնարկելով «Զվարթնոց» օդանավակայանի տարածքում տաքսի ծառայություն մատուցող վարորդների հագուկապը՝ նշեց, որ նրանք անթրաշ, չստիկով, սիգարետը բերանին, տարիֆների տարբեր կիրառմամբ իրենց հաճախորդներին Սևանա լճի փոխարեն Երևանյան լիճ են տանում: Վարչապետը ոստիկանապետին և Կապի, տրանսպորտի և ՏՏ նախարարին հանձնարարել էր պրոֆիլակտիկ աշխատանք կատարել ոլորտում ծառայություն մատուցող ընկերությունների հետ:

Սրա հետ կապված «Փաստը» հարցում էր ուղարկել Տրանսպորտի, կապի և ՏՏ նախարարություն պարզելու, թե ի՞նչ խնդիրներ կան այսօր լիցենզավորման համակարգում և թե վարչապետի հանձնարարականներին ինչպիսի՞ ընթացք է տրվել: Նշենք, որ հարցման պատասխանը ստացել ենք հունիսի 19–ին, երբ արդեն մի քանի օր շարունակ գործում էր Երևան–«Զվարթնոց» երթուղին:

«Փաստը» իր հարցման մեջ դիտարկել էր, թե սրանից 2–3 տարի առաջ տաքսիների լիցենզավորման չափորոշիչները հստակեցվել էին, բայց փաստացի վիճակը վատ է՝ ներառյալ սպասարկման որակ, վարորդների տեսք, միասնական տարիֆի բացակայություն, խաբեություն զբոսաշրջիկների նկատմամբ և այլն: Մեր հարցին, թե ինչո՞ւ դաշտը չի կարգավորվում և ո՞րն է պատճառը՝ նախարարությունից բավական անորոշ և ,ըստ էության, նորություն ու ասելիք չպարունակող պատասխան էին տվել: Մասնավորապես ասել էին, թե մարդատար տաքսի ավտոմոբիլներով ուղևորափոխադրումների ոլորտում տնտեսվարման և ծառայությունների մատուցման նոր ձևերին ու մեթոդներին զուգընթաց ոլորտի օրենսդրական բարեփոխուները անհրաժեշտություն են և շարունակական բնույթ են կրելու:

Հարցին, թե կառավարությունը ի՞նչ պիտի աներ, որ չի արել, որպեսզի ոլորտում սպասարկման որակը բարձրանա, պատասխանել են, թե ոլորտում առկա իրական կարգավորում պահանջող հարաբերությունները կանոնակարգելու նպատակով մշակվել և շրջանառության մեջ են դրվել «Ավտոմոբիլային տրանսպորտի մասին» ՀՀ օրենքում և մի շարք այլ իրավական ակտերում փոփոխություններ ու լրացումներ կատարելու մասին իրավական ակտերի նախագծերը:

Մեր այն հարցին էլ, թե ի՞նչ պետք է անեն տաքսիստներն ու սպասարկող ընկերությունները՝ նախարարությունից տեղեկացնում են, որ այդ ոլորտում ներգրավված իրավաբանական և ֆիզիկական անձինք իրենց գործունեությունը պետք է իրականացնեն բացառապես ոլորտը կանոնակարգող օրենսդրական ակտերի շրջանակում:

Նախարարության կողմից վարչապետի արձագանքից հետո խնդրին լուծում տալու հետ կապված քննարկումներ, առաջարկներ կամ գործնական քայլեր անելու հետ կապված էլ հարցման պատասխանում նշված է, որ մի քանի ուղղությամբ են աշխատանքներ տարվել: Նախևառաջ «Զվարթնոց» օդանավակայանի տարածքում տաքսի ծառայություններ մատուցող կազմակերպությունների և ֆիզիկական անձանց հետ իրականացվել են պրոֆիլակտիկ և վերահսկողական աշխատանքներ, որոնց արդյունքում հունիսի 9–14–ը առանց համապատասխան լիցենզիայի տաքսամոտորային ապօրինի ուղևորափոխադրումներ իրականացնողների նկատմամբ կազմվել է վերահսկողության արդյունքների ամփոփման 100 արձանագրություն: Սրանից բացի, ինչպես արդեն հայտնի է Երևան–«Զվարթնոց» օդանավակայան և հակառակ ուղղությամբ ուղևորափոխադրումներ են իրականացվում:

Մյուս կողմից էլ՝ կառավարության աշխատակազմ է ներկայացվել կառավարության 2014 թ. դեկտեմբերի 11–ի թիվ 1471–Ն որոշման մեջ փոփոխություններ և լրացումներ կատարելու մասին որոշման նախագիծ՝ լիցենզավորվող ֆիզիկական անձանց, ինչպես նաև իրավաբանական անձանց և անհատ ձեռնարկատերերի կողմից ուղևորափոխադրումներում ներգրավվող վարորդների վերաբերյալ օպերատիվ տեղեկատու քարտադարանից և թմրաբանական բժշկական հաստատություններից տեղեկատվություն հայցելու և ստանալու իրավական հիմքերն ապահովելու նպատակով:

 Շարունակությունը` «Փաստ» օրաթերթի այսօրվա համարում: