26–ամյա Սեդրակ Զատիկյանի սպանության գործով դատավճիռը՝ մեկ շաբաթից. «Փաստ»

«Փաստ» օրաթերթը գրում է.

Երեկ սպասվում էր, որ Մալաթիա–Սեբաստիա վարչական շրջանների ընդհանուր իրավասության դատարանը կհրապարակի ԵԿՄ Մալաթիա տարածքային կառույցի նախկին նախագահ, 2006 թ.–ին համայնքի կենտրոնում ինքնաձիգի կրակոցներից սպանված 26–ամյա Սեդրակ Զատիկյանի գործով մեղադրվող՝ սպանության 2–րդ «պատվիրատու» Նարեկ Խաչատրյանի մասով դատավճիռը, սակայն ամբաստանյալի փաստաբանը չէր ներկայացել դատարան, ու նիստը հետաձգվեց:

Զատիկյանի սպանության գործի քննությունը տևել է շուրջ 11 տարի: Այդ գործով առաջին դատավճիռը հրապարակվել է 2007 թ.–ին, երկրորդ դատավճիռը՝ 2013–ին, իսկ այս մասով քննությունն ընթանում է արդեն 1,5 տարի: Այս գործով մեղադրյալ Նարեկ Խաչատրյանը 9 տարի հետախուզման մեջ է եղել:

Հաջորդ նիստում դատարանը դատավոր Ռոբերտ Պապոյանի նախագահությամբ, կլսի Սեդրակ Զատիկյանի սպանությունը պատվիրելու մեջ մեղադրվողներից Նարեկ Խաչատրյանի վերջին խոսքը, պաշտպանի ճառը և կհրապարակի դատավճիռը:

Նշենք, որ խոսքը Մալաթիա–Սեբաստիա համայնքի նախկին թաղապետ, ԱԺ պատգամավոր, լուսահոգի Վահան Զատիկյանի երկու որդիների՝ Սեդրակի և Անդրանիկի սպանությունը 100000 դոլարով պատվիրելու մեջ մեղադրվող Նարեկ Խաչատրյանի մասին է: Ըստ մեղադրանքի՝ Նարեկ Խաչատրյանն ու Ստեփան Հակոբյանը պարբերաբար վիճել են Սեդրակ Զատիկյանի հետ, որի պատճառով նրանց միջև առաջացել է թշնամություն: Առաջին երկուսը ցանկացել են սպանելով վրեժխնդիր լինել Սեդրակից և խոսակցությունների ընթացքում առաջարկել են Արսեն Առուշանյանին (Նարեկ Խաչատրյանի հոր ընկերոջ որդուն) սպանել Սեդրակ Զատիկյանին՝ խոստանալով գումար: Նշենք, որ մեղադրվող Նարեկ Խաչատրյանը չի ընդունում մեղադրանքը:

Այս գործով դատապարտված է ԱԺ նախկին պատգամավոր Հակոբ Հակոբյանի եղբորորդին՝ 33–ամյա Ստեփան Հակոբյանը. նա 15 տարվա ազատազրկման է դատապարտվել որպես սպանության պատվիրատու:

Գործով մի վկան՝ Ահարոն Հակոբյանը, բացակայում է ՀՀ–ից: Ըստ քրգործի նյութերի՝ վկա Ահարոն Հակոբյանը մաքսային ծառայության մի պաշտոնյայի ուղեկցությամբ սպանության պատվերի գումարի մի մասը վերցրել էր պատվիրատուներ՝ Ստեփան Հակոբյանից և Նարեկ Խաչատրյանից ու սպանությունից ժամեր անց տարել–տվել էր մարդասպանին: Գործով մյուս վկան՝ Արամ Արամյանը, ինքնասպան է եղել անհասկանալի հանգամանքներում՝ այդպես էլ չհասցնելով ցուցմունք տալ դատարանում: Չի բացառվում, որ այս հանգամանքն է նաև պատճառը, որ Ահարոն Հակոբյանը հեռացել է Հայաստանից:

Նշենք, որ 26–ամյա Սեդրակ Զատիկյանի հայրը` Վահան Զատիկյանը, մահացել է 1999 թ.–ի հոկտեմբերի 7–ին: Պաշտոնական վարկածով՝ վերջինս մահացել է սրտի կաթվածից:

Սեդրակ Զատիկյանը սպանվել էր 2006 թ. հունիսի 22–ին Երևանի Սեբաստիայի և Տիչինայի փողոցների խաչմերուկում. անհայտ անձը ԱԿ–74 տիպի ինքնաձիգից կրակահերթ է արձակել «Մերսեդես» մակնիշի ավտոմեքենայի վրա, որի հետևանքով վարորդ, 31–ամյա Սեդրակ Վահանի Զատիկյանը վիրավորվել է և հիվանդանոցի ճանապարհին մահացել:

Նույն վայրում կրակոցներից մահացել է անցորդ, 37–ամյա, 3 երեխաների մայր Կարինե Սարգսյանը: Իսկ Մալաթիա–Սեբաստիա վարչական շրջանի Մեծարենցի 58 հասցեի մոտ 2013–ի հունվարի 13–ին՝ ժամը 7:00–ի սահմաններում հայտնաբերվել է 31–ամյա Անդրանիկ Վահանի Զատիկյանի դին:

Շարունակությունը` «Փաստ» օրաթերթի այսօրվա համարում: