Հայկական գյու՞ղ, թե «գեղ»

Օրերս վարչապետ Կարեն Կարապետյանը Երևանի քաղաքապետ Տարոն Մարգարյանի ուղեկցությամբ այցելել է «Դալմա Մոլ» համալիրի հարևանությամբ գտնվող տարածք, որտեղ նախատեսվում է իրականացնել «Հայկական Գյուղ» ազգագրական թաղամասի կառուցապատման ներդրումային ծրագիրը: 

Նախատեսվում է ստեղծել Հայաստանի տարբեր տարածաշրջանների քաղաքային և գյուղական բնակավայրերի ազգային ավանդույթներին ու պատմականորեն ձևավորված ճարտարապետական դիմագծին բնորոշ ազգագրական թաղամաս՝ բնակելի տներով, հյուրանոցներով (հյուրատներով), ինչպես նաև նկարչությունն ու ազգային արհեստները (գորգագործություն, դարբնագործություն, կավագործություն, հուշանվերների պատրաստում) ներկայացնող ցուցասրահներով:

Հետաքրքիր է, սովորաբար ազգագրական թաղամասերը ստեղծվում են այն գյուղական բնակավայրերում, որտեղ ազգագրական ավանդույթները, մշակույթի առանձին նմուշները լավ պահպանված են: Կոնկրետ այս դեպքում, եթե խոսքը գնում է հյուրատների, արհեստների մասին, ապա ենթադրվում է, որ ազգագրական այդ թաղամասը պետք էր կառուցել հայկական այն գյուղերում, որտեղ հայկական տան հիմնական տիպերից գոնե մի քանիսը պահպանված են: Կամ որտեղ կան արհեստագործության իրական հետքեր: Բացի այդ ազգագրական թաղամասերի կամ գյուղերի անբաժան մասնիկ են տվյալ տարածքի բնակիչները, որոնք ևս այդ մշակույթի կրողներն են կամ գոնե դրա բանավոր փոխանցողները: 

Այլապես ստացվում է, որ քաղաքի կենտրոնում, զրոյից գյուղ է կառուցվելու: Այն ամբողջական ու կոնցեպտուալ չի լինելու, վերցվելու են հայկական մշակույթի «լավագույն» համարող նմուշները, համադրվելու են իրար կողքի և վերջ: 

Այս կապակցությամբ ֆեյսբուքում հետաքրքիր գրառում է կատարել ազգագրագետ Աղասի Թադևոսյանը: 

 

Արմեն Ասլանյան