Ֆիննախը հիմնավոր չի համարել «Սպայկայի» խոստացած 200 մլն դոլարի ներդրումը. «Փաստ»

«Փաստ» օրաթերթը գրում է.

Մենաշնորհների դեմ պայքարող ՀՀ կառավարությունը երեկվա նիստում որոշում է կայացրել հօգուտ գերիշխող դիրք զբաղեցնող ընկերության` որոշել է Նորագավիթ թաղամասին հարող տարածքում առկա մոտ 163,2 հա հողամասը նվիրել «Սպայկա» և «Արմսանպրոդակտ» ՍՊԸ–ներին: Որոշ հաշվարկներով՝ այդ հողամասն արժե 4,7 մլրդ դրամ:

Ըստ այդմ՝ ընկերությունների տնօրենները ընդամենը 4 օր առաջ՝ հունիսի 19–ին համատեղ դիմումով Երևանի քաղաքապետարան են ներկայացրել Նորագավիթ թաղամասին հարող տարածքում 110 հա կիսափակ ջերմոցային համալիրի և բորբոսով պանրի գործարանի կառուցման ներդրումային ծրագրեր՝ խնդրելով այդ ծրագրի իրականացման համար ընկերությանն անհատույց սեփականության իրավունքով օտարել Նորագավիթ թաղամասին հարող տարածքում առկա համայնքային սեփականություն հանդիսացող մոտ 163,2 հա հողամասը:

Վերոնշյալ ընկերությունները պատրաստվում են մինչև 2020 թվականը բորբոսով պանրի գործարան և ջերմոց հիմնել այդ տարածքում. հողի 110 հա հողամասի վրա կկառուցվի կիսափակ ջերմատնային տնտեսություն և տարեկան 1000 տ արտադրողականությամբ բորբոսով պանրի գործարան: Ներդրողները խոստանում են նաև 200 մլն դոլար ներդրում անել և 1300 աշխատատեղ ստեղծել:

Այլ հարց է, արդյոք մեր բյուջեն այդքան հարո՞ւստ է, որ կարող է ոլորտում գերիշխող դիրք ունեցող ընկերությանը հեկտարներով, 4,7 մլրդ արժեքի հողեր նվիրել Երևանում:

Եվ ինչո՞ւ կառավարությունը հողամաս չի նվիրում փոքր ու միջին բիզնեսին:

Ուշագրավ է այլ հանգամանք. ֆինանսների նախարարությունը առարկություն է ներկայացրել՝ հիմնավոր չհամարելով 200 մլն դոլարի ներդրումի չափը, սակայն առարկությունը չի ընդունվել:

«Ուսումնասիրելով վերոհիշյալ հանձնարարականին կից ներկայացված «Ներդրումային ծրագրերին հավանություն, «Սպայկա» և «Արմսանպրոդակտ» ՍՊՆ–ներին հողամաս նվիրաբերելու համաձայնություն տալու մասին» ՀՀ կառավարության որոշման նախագիծը, հայտնում ենք հետևյալը. Նախագծի թիվ 1 և թիվ 2 հավելվածներով հավանության արժանացվող «Սպայկա» և «Արմսանպրոդակտ» սահմանափակ պատասխանատվությամբ ընկերությունների կողմից ներկայացված ներդրումային ծրագրերում նշվում է, որ ջերմատնային համալիրների և պանրի գործարանի կառուցման համար անհրաժեշտ ներդրումները գնահատվում են համապատասխանաբար` 78 մլն, 133 մլն և 8 մլն ԱՄՆ դոլար, սակայն պարզ չէ, թե որքան է կազմելու նշված ընկերությունների կողմից իրականացվելիք ներդրումների չափը»,– առարկության մեջ գրել է ֆիննախը՝ հավելելով. «Հետևաբար առաջարկում ենք ներդրումային ծրագրերում ներկայացնել ընկերությունների կողմից իրականացվելիք ներդրումների չափը և ժամանակացույցը: Նախագծի 3–րդ կետով սահմանվում է, որ Նորագավիթ թաղամասին հարող տարածքում գտնվող հողամասերը կարող են օգտագործվել բացառապես ջերմոցային համալիրի և բորբոսով պանրի գործարանի կառուցապատման նպատակով և դրանց նպատակային նշանակությանը համապատասխան: Այդ կապակցությամբ առաջարկում ենք նախագծում նախատեսել հողամասը վերը նշված նպատակով չօգտագործելու դեպքում ձեռնարկվելիք միջոցառումների վերաբերյալ դրույթներ: Առաջարկում ենք նախագծում նախատեսել նաև ընկերությունների կողմից կատարվելիք ներդումների մոնիթորինգի իրականացման վերաբերյալ համապատասխան դրույթ: Առաջարկում ենք Նախագծում նախատեսել նաև նվիրաբերվող հողամասերն իրենց նպատակային նշանակությանը համապատասխան չօգտագործելու դեպքում առաջացող հնարավոր հետևանքների վերաբերյալ դրույթ»:

Ֆիննախի ներկայացված բոլոր առարկություններն ու առաջարկները մերժվել են: Չեն ընդունվել նաև Կադաստրի պետական կոմիտեի առաջարկները, որով վերջինս առաջարկել է, որ պայմանագրերի նոտարական վավերացման և դրանցից բխող գույքային իրավունքների պետական գրանցման հետ կապված` օրենքով սահմանված համապատասխան վճարներն ու տուրքերը պետք է կատարվեն «Սպայկա» և «Արմսանպրոդակտ» սահմանափակ պատասխանատվությամբ ընկերությունների միջոցների հաշվին»:

Շարունակությունը` «Փաստ» օրաթերթի այսօրվա համարում: