Աբրահամ Խաշմանյանը Սանտա Կոլոմայի հետ առաջիկա խաղի մասին

Չեմպիոնների լիգայի որակավորման 1-ին փուլում «Ալաշկերտը» մեկնարկում է անդորրական «Սանտա Կոլոմայի» հետ տնային հանդիպումով: Խաղի նախօրեին «Հանրապետական» ստադիոնի մամուլի ասուլիսների սրահում կայացել է Հայաստանի չեմպիոնի գլխավոր մարզիչ Աբրահամ Խաշմանյանի մամուլի ասուլիսը:

 

Խաշմանյանը խոսեց սպասվող հանդիպման մասին՝ նշելով, որ տրամադրված են հաղթանակի և հաջորդ փուլ դուրս գալուն. «Պետք չէ խոսել հանդիպման շուրջ ծավալվող կրքերի մասին: Տհաճ միջադեպեր եղել են, բայց դրանք անցյալում են: Մեկ տարում շատ բաներ կարող են փոխվել: Մենք գիտենք այս թիմին՝ ելնելով անցյալ տարվա խաղերից: Վաղը խաղալու ենք Անդորրայի հավաքականի հետ: Ինֆորմացիա ունենք, որ նոր ֆուտբոլիստներ ունեն: Սպասվում է բարդ հանդիպում: Մենք, ինչպես միշտ, մարտական ենք տրամադրված, կաշխատենք ուրախացնել մեր ֆուտբոլային հանրությանը: Մեր նպատակն է հաղթելը և անցնելը հաջորդ փուլ»:

 

Խոսելով ֆուտբոլիստների պատրաստվածության մասին՝ մասնագետն ասաց. «Չեմ ասի, որ թիմը մարզավիճակի գագաթնակետին է: Կա պատճառ. առաջնության ավարտից հետո թիմը գնացել է արձակուրդ: Իմ թիմը պարաստ է, մենք վաղը լավ ֆուտբոլ ենք ցույց տալու: Թիմը լավ մարզավիճակում է այն ժամանակ, երբ շատ խաղեր է անցկացնում:  

 

Մենք ավելի ուժեղ ենք պաշտպանությունում:Կասեմ, որ մենք այսօր այդքան հզոր չենք հարձակման գծում. չունենք Հեբերի նման հզոր հարձակվող: Չունեմ նոմինալ հարձակվող. կա Ուրոշ Նենադովիչը, ով նոմինալ հարձակվող չի, բայց ես իրեն եմ օգտագործում այդ դիրքում: Միհրան Մանասյանը և Գևորգ Նռանյանը որակազրկված են: Մեջտեղի գծում ունենք կորուստ՝ Արտակ Գրիգորյանը, ով Ռուսաստանում փորձաշրջան է անցնում»:

 

Ասուլիսի վերջում շվեյցարացի լրագրողի հարցին Խաշմանյանն այսպես պատասխանեց. «Կարճ պատմության ընթացքում «Ալաշկերտը» լուրջ հաջողությունների է հասել ինչպես Հայաստանում, այնպես էլ միջազգային ասպարեզում: Մենք նորից պատմություն ենք կերտելու: Հյուրը տպավորվեց «We will make history again» արտահայտությունից:

 

Հիշեցնենք, որ «Ալաշկերտ»-«Սանտա Կոլոմա» հանդիպումը կկայանա վաղը՝ հունիսի 27-ին, խաղի մեկնարկը 20:00-ին է: