Կառավարությունն արտոնություն է տվել էներգետիկայի նախարար Աշոտ Մանուկյանի հիմնադրած ընկերությանը. «Փաստ»

«Փաստ» օրաթերթը գրում է.

Չնայած ՀՀ կառավարությունը մերժում է յուրայինների բիզնես հովանավորչությունը, սակայն կառավարության նախորդ նիստում տեղի է ունեցել մեկ ուշագրավ իրադարձություն:

Կառավարությունը որոշել է մաքսատուրքից ազատել «Ինվեսթմընթ մեդիա գրուպ (ԱՅ–ԷՄ–ՋԻ)»–ի կողմից ներմուծվող տեխնոլոգիական սարքավորումները: Ըստ հիմնավորման՝ «գերակա ոլորտում իրականացվող ներդրումային ծրագրի շրջանակում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը կազատվեն ներմուծման մաքսատուրքից»:

«Ինվեսթմընթ մեդիա գրուպ (ԱՅ–ԷՄ–ՋԻ)» ընկերությունը չնայած գրանցված է Երևանի Սայաթ–Նովա հասցեում, հողատարածք ունի Հրազդան քաղաքում, որտեղ էլ հիմնել է արևային էներգիայի արտադրությունը: Ուշագրավն այն է, որ այս ընկերությունը հիմնադրել է էներգետիկայի ներկա նախարար Աշոտ Լևոնի Մանուկյանը: Այս մասին տեղեկանում ենք պետռեգիստրի կայքից: Ըստ կայքի՝ Աշոտ Մանուկյանի մասնակցությունը դադարեցված է իր հիմնադրած ընկերությունում:

Քանի որ մաքսատուրքից ազատված ընկերությունը հենց էներգետիկայի ոլորտում է գործում և կարող է լինել շահերի բախում, Էներգետիկայի և բնական պաշարների նախարարի խոսնակ Վասակ Թարփոշյանից «Փաստը» հետաքրքրվեց, թե հնարավո՞ր է ընկերությունը փոխանցվել է Աշոտ Մանուկյանի հարազատներին կամ այժմ նախարարն ունի՞ բաժնետոմսեր այդ ընկերությունում կամ որևէ այլ առնչություն: Մամուլի խոսնակը խոստացավ պատասխանել մեր հարցմանը, սակայն երեկ չկարողացավ պատասխանել՝ խոստանալով պատասխանն ուղարկել ավելի ուշ:

Նշենք, որ այս ընկերությունը կառավարությունից արտոնություն է ստացել նաև 2 ամիս առաջ. ապրիլի 20–ին ևս կառավարությունը որոշել է մաքսատուրքից ազատել «Ինվեսթմընթ մեդիա գրուպ (ԱՅ–ԷՄ–ՋԻ)»–ին՝ հիմնավորելով, որ ընկերությունը ներմուծվող հումքն օգտագործելու է արևային էներգիայի արտադրության մեջ և նախատեսում է ստեղծել 10 նոր աշխատատեղ՝ 100000 ամսական միջին աշխատավարձով: Ըստ այդմ՝ ծրագրով նախատեսված արտադրանքի ծավալները կկազմեն 41 մլն 849 հազար դրամ, որն ամբողջությամբ իրացվելու է ՀՀ տարածքում։ Ընկերությունն ապրիլին խոստացել է, որ կիրականացնի 287 մլն դրամի ներդրում։

Ի դեպ՝ ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը, ով պաշտոնն ստանձնել է անցյալ տարվա սեպտեմբերի 20–ին, մինչ նախարար դառնալը՝ 2015–2016 թվականներին, եղել է «Էներգո Ինվեստ Հոլդինգ» ՓԲԸ գլխավոր տնօրենը, իսկ դրանից առաջ ղեկավարել է «Հրազդանի էներգետիկ կազմակերպություն/Հրազջէկ» ԲԲԸ–ն։

Անցյալ տարի նախարարը հայտարարագրել է 34,7 մլն դրամ աշխատավարձ և դրան հավասարեցված եկամուտ։ Աշոտ Մանուկյանի դրամական միջոցները պաշտոնը ստանձնելու օրվա դրությամբ կազմել են 12 մլն 813 հազար և 42 հազար 400 ֆունտ ստեռլինգ: Անշարժ գույք բաժնում նախարարը հայտարարագրել է երկու բնակարան և մեկ ավտոտնակ։ Պաշտոնը ստանձնելու օրվա դրությամբ Աշոտ Մանուկյանի հանձնած փոխառությունը կազմել է 130 հազար ԱՄՆ դոլար։

Եթե կառավարությունն ուզում է, որ հանրությունը հավատա հավասար բիզնես հնարավորությունների ստեղծման առթիվ իր հայտարարություններին, ապա պիտի ապացուցի հասարակությանը, որ արտոնություններ է տալիս ոչ միայն յուրայիններին, այլ բոլորին. հակառակ դեպքում Հայաստանի բիզնես դաշտում կմնան միայն օլիգարխներն ու կառավարության անդամները:

 Շարունակությունը` «Փաստ» օրաթերթի այսօրվա համարում: