«Էտի ով որ մտածել է, թող տանի իր հոր տան վրա փորձե, տեսնի ոնց ա էղնում». խոշորացման ենթակա համայնքի ղեկավար. «Փաստ»

«Փաստ» օրաթերթը գրում է.

ՀՀ տարածքային կառավարման և զարգացման նախարարության կողմից մշակվել էր «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ և լրացումներ կատարելու մասին» ՀՀ օրենքի նախագիծը, որի համաձայն՝ նախատեսվում է իրականացնել համայնքների խոշորացման 31 ծրագրեր՝ Արագածոտնի մարզի Ապարան, Արագածավան, Ծաղկահովիտ, Գեղարքունիքի մարզի Ճամբարակ, Վարդենիս, Մասրիկ, Լոռու մարզի Հաղպատ (Ալավերդի), Լալվար (Ախթալա), Ստեփանավան, Տաշիր, Օձուն, Կոտայքի մարզի Բյուրեղավան, Նաիրի (Եղվարդ), Նոր Հաճն, Չարենցավան, Ակունք, Գառնի, Մեղրաձոր, Քասախ, Շիրակի մարզի Անի, Ազատան, Ախուրյան, Մարմաշեն, Սյունիքի մարզի Կապան, Սիսիան, Քաջարան, Վայոց ձորի մարզի Եղեգնաձոր, Արենի, Եղեգիս, Տավուշի մարզի Իջևան, Բերդ համայնքային փնջերում: Նախորդ տարի Լոռու մարզի Թումանյան, Սյունիքի մարզի Տաթև, Տավուշի մարզի Դիլիջան, Արարատի մարզի Ուրցաձոր, Տավուշի մարզի Նոյեմբերյան, Այրում, Կողբ, Սյունիքի մարզի Գորիս, Մեղրի, Գորայք, Տեղ, Շիրակի մարզի Ամասիա, Աշոցք, Արփի, Սարապատ, Վայոց ձորի մարզի Վայք, Ջերմուկ, Զառիթափ համայնքային փնջերում անցկացվեցին տեղական ինքնակառավարման մարմինների ընտրություններ: Այսպիսով, մինչև 2017 թ. իրականացվել էր համայնքների խոշորացման թվով 18 ծրագիր, ինչի արդյունքում 140 համայնքների միավորման արդյունքում ձևավորվել էր թվով 18 համայնք: Նոր ծրագրով խոշորացման է ենթակա թվով 380 համայնք, որոնց միավորման արդյունքում ձևավորվելու է 31 համայնք:

Արագածոտնի մարզի Արագածավան, Արտենի, Գետափ, Լուսակն, Թլիկ համայնքների խոշորացման արդյունքում կստեղծվի 5 գյուղերից կազմված նոր համայնք՝ Արագածավան կենտրոնով:

Արգածավանի գյուղապետ Անդրանիկ Պապիկյանը «Փաստի» հետ զրույցում նշեց, որ խոշորացման ծրագրում ինքը ոչ մի դրական բան չի տեսնում, միայն՝ բացասականը: Դիտարկմանը, թե այն, որ Արագածավանը լինելու է կենտրոն և գյուղապետը դրանում առավելություններ չի՞ տեսնում, Պապիկյանը պատասխանեց, որ ոչ մի լավ բան ինքը չի տեսնում, փոխարենը՝ 100 հատ վատ բան է տեսնում: Տեսնում է, որ գյուղերը կքանդվեն, որ մարդիկ անաշխատավարձ կմնան:

«Էտի ով որ մտածել է, թող տանի իր հոր տան վրա փորձե: Հլա տեսնի՝ էտի ոնց ա էղնում: Բերե իրա սաղ հարս, թոռ մի տան մեջ լցնե ու փորձե, տեսնի էդ խոշորացումը իրանց ավելի լավ չէ՞: Քիչ վառելիք կծախսեն, տան ծախսը քիչ կեղնի, հլը թող փորձի էլի:

Հետո ես 5 տարի ժամկետով 6 ամիս առաջ ընտրվել էի: Էդ ո՞վ է իրան իրավունք վերապահում, որ ես պիտի տարին երկու անգամ ընտրվիմ: Իրանք իրանցը սարքում են յոթը տարին մեկ, իսկ գյուղապետերին կարելի՞ է տարին երկու անգամ տանել ընտրության:

Գյուղը, որ քայքայվում է, քանդվում, բերում, միացնում են էդի մեկ պատճառ, երկրորդ պատճառն էլ էն ա, որ նորից պիտի գյուղի կեսը իրարից խռովեն չէ՞: Ընտրությունները կարո՞ղ է լավ բան է բերում իր հետ, բացի գյուղի խռովությունից, բացի իրար լավ ու վատ լինելուց:

Էդ գյուղերի խոշորացումն էլ, որ ասում են էկոնոմիա ա, մի հատ էկոնոմիստ վերցրա, հետդ արի գյուղ, հլա տենանք, ուրդե՞ղ է դրա էկոնոմիան: Ես 7 հազար 200 բնակիչ ունեցող գյուղի ղեկավար եմ, 5 հազարից ավելը իրավունք ունի դեպուտատի աշխատավարձի 80 տոկոսի չափ փող ստանա: Այսինքն՝ ես իրավունք ունեմ 400 հազար ստանամ, բայց ստանում եմ 140 հազար դրամ: Էդ որ ինքը պիտի ուրիշ գյուղից երկու շտատ կրճատի, է գյուղապետը իրանից խելացի ա, հաստատ իրենից ախմախ մարդիկ չկան էստեղ: Ես կդարձնեմ աշխատավարձը 400 հազար, հլա տեսնեմ ուրդե՞ղ են էկոնոմիա անում, ի՞նչ էկոնոմիայի մասին է խոսքը:

Ինչի՞ չեն թողնում էս պետությունը գոյություն ունենա, ինչի՞ են քանդում, ջարդում, ի՞նչ են ուզում էս ժողովրդից»,– եզրափակեց Անդրանիկ Պապիկյանը:

 Շարունակությունը` «Փաստ» օրաթերթի այսօրվա համարում: