Մնջախաղի միջազգային VI փառատոնը օտարերկրացի մասնակիցներին կներկայանալի կդարձնի Հայաստանը

Լեոնիդ Ենգիբարյանի անվան մնջախաղի միջազգային VI փառատոնը արտերկրից ժամանած մասնակիցներին ներկայանալի կդարձնի Հայաստանը: Առաջին տարին է, որ փառատոնն ամենամյա է դարձել: «Արմենպրես »-ի հաղորդմամբ՝ հունիսի 27-ին կայացած ասուլիսում այս մասին խոսեցին ՀՀ մշակույթի նախարար Արմեն Ամիրյանը և ԵՄՊԹգեղարվեստական ղեկավար Ժիրայր Դադասյանը:

«Փառատոնի շնորհիվ մեր հայրենիքը ճանաչելի ու ներկայանալի կլինի արտերկրից ժամանած  մասնակիցներին: Մարդկանց սրտերը կպահենք Հայաստանում, հյուրերն իրենց հետ կտանեն հաճելի հիշողություններ, և նրանց հիշողությունները Հայաստանի հետ կկապվեն ժամանակակից արվեստի միջոցով»,-ասաց Արմեն Ամիրյանն ու ընդգծեց, որ, թեև փառատոնի կենտրոնը լինելու է Ծաղկաձորում, սակայն այն տոն է ապահովելու ամբողջ հանրապետությունում:

«Այս տարի փառատոնին մասնակցելու են ընդհանուր առմամբ 8 թատրոն՝ Գերմանիայից, Չեխիայից, Բանգլադեշից, Ֆրանսիայից, Ռուսաստանի երեք քաղաքից, Հարավ- Աֆրիկյան Հանրապետությունից և Արցախից: Հայաստանից փառատոնին կմասնակցեն Երևանի մնջախաղի պետական թատրոնը, ԵԹԿՊԻ-ի մնջախաղի կուրսի ուսանողներ, «Պարային ռեժիսուրա» բաժնի դիպլոմային աշխատանքներ, խուլերի «ՄԵՆՔ» թատրոն-ստուդիան, կլինեն անհատ կատարողներ: Մեր վերջին փառատոնին ունեցել ենք շուրջ 5000 հանդիսատես Ծաղկաձորում»,-ասաց Ժիրայր Դադասյանն ու հավելեց, որ  այս տարիների փառատոնային օրերին քաղաքի հյուրանոցներում նախապես ամրագրվում են տեղերը, և ազատ տեղեր չեն լինում:

Նրա խոսքով՝ Արցախից կմասնակցի անցյալ տարի Ստեփանակերտում հիմնված Մնջախաղի ստուդիան: Արցախցիները հանդես են գալու «Դոն Կիխոտ» ներկայացմամբ, որում խաղում է նաև գերմանացի դերասան: Դադասյանը նշեց նաև, որ Լեոնիդ Ենգիբարյանի անունն իր մեծ դերն ունի փառատոնի ճանաչելի դառնալու հարցում: «Նախկին Խորհրդային Միության երկրների մասնակիցները հրաշալի գիտեն, թե ով է Լեոնիդ Ենգիբարյանը: Անցյալ տարի մենք Կրասնոդարի մանկական մնջախաղի թատրոնից նամակ էինք ստացել, որով խնդրում էին երեխաներին թույլ տալ մասնակցելու իրենց կուռքի անունը կրող փառատոնին: Նրանք այս տարի նույնպես մասնակցության ցանկություն են հայտնել»: