Գեղարքունիքի մարզում առաջիկա շաբաթը հայտարարվել է սանիտարական մաքրման համամարզային օր

 Գեղարքունիքի մարզպետ Կարեն Բոթոյանի նախաձեռնությամբ եւ հանձնարարությամբ Գեղարքունիքի մարզում հուլիսի 1-ը հայտարարվել է համամարզային սանիտարական մաքրման օր: Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմից, մարզպետ Կարեն Բոթոյանի համապատասխան կարգադրությամբ ստեղծվել է Գեղարքունիքի մարզում «Մաքուր Հայաստան» ծրագրի իրականացման մշտական հանձնաժողով, որը ղեկավարելու է Գեղարքունիքի մարզպետի տեղակալ Կարեն Հակոբյանը: Հանձնաժողովում ընդգրկված են նաեւ մարզպետի տեղակալներ Անդրանիկ Հակոբյանը, Արտաշես Նիկոյանը, մարզպետարանի աշխատակազմի ղեկավար Սեւակ Խլղաթյանը, աշխատակազմի ղեկավարի տեղակալ Ալբերտ Աղեկյանը, աշխատակազմի ստորաբաժանումների ղեկավարները:

Հունիսի 27-ին հանձնաժողովի նախագահ, Գեղարքունիքի մարզպետի տեղակալ Կարեն Հակոբյանի գլխավորությամբ կայացել է հանձնաժողովի անդրանիկ նիստը, որի ընթացքում հանձնաժողովի անդամներին հանձնարարվել է «Մաքուր Հայաստան» ծրագրի իրականացման նպատակով մարզի համայնքներում մշտական հսկողություն սահմանել սանմաքրման, աղբահանության, կանաչապատման եւ այլ կարգի աշխատանքներում, ակտիվ մասնակցություն ապահովել 2017 թվականի հուլիսի 1-ին հայտարարված սանիտարական մաքրման, աղբահանության, աղբավայրերի ծածկման նպատակով հայտարարված առաջիկա շաբաթօրյակին, որում պետք է ընդգրկվեն մարզի պետական կառավարման եւ տեղական ինքնակառավարման մարմինները, կրթամշակութային եւ առողջապահական հաստատությունները, արտադրական ձեռնարկությունները, «Սեւան ազգային պարկը», ճանապարհները սպասարկող կազմակերպությունները, շահագրգիռ այլ կառույցներ:

«Մեր մարզը նկատելի դրական աշխատանք կատարել է «Մաքուր Հայաստան» ծրագրի պահանջները բավարարելու ուղղությամբ, բայց մենք եղածով չպետք է բավարարվենք: Ավելին, մեր հանձնաժողովի յուրաքանչյուր անդամ պետք է ամենօրյա հետեւողական աշխատանք տանի, որպեսզի մարզի ամեն մի համայնքում, ամեն մի տարածքում ապահովվի բավարար մաքրություն, նվազագույնի հասցվեն աղտոտումները: Անցած ժամանակի ընթացքում իրականացված աշխատանքն ապացուցեց, որ ցանկության դեպքում մենք կարող ենք լիովին ապահովել շրջակա միջավայրի մաքրության պահպանումը: Դա պետք է համարենք մեր հետագա պարտքն ու պարտականությունը»,-«Արմենպրես»-ի հետ զրույցում նշեց Գեղարքունիքի մարզպետի տեղակալ Կարեն Հակոբյանը: