Արվածը պրովոկացիա է. ինչի՞ց է սարսափում իշխանությունը. «Փաստ»

«Փաստ» օրաթերթը գրում է.

Մեր հյուրն է Հիմնադիր Խորհրդարանի անդամ Ալեք Ենիգոմշյանը

– Պարոն Ենիգոմշյան, ինչպիսի՞ն է ժիրայր Սեֆիլյանի և Սասնա ծռերի դատավարությունների ընթացքը` ձեր գնահատմամբ:

– Մինչև հիմա բոլոր տեղի ունեցած նիստերը (չեմ կարող ասել` կայացած), և առավել ևս Ժիրայր Սեֆիլյանի վերջին դատական նիստը ցույց են տալիս, որ իշխանություններն ամեն ինչ անում են, որպեսզի խոչընդոտեն նիստերի հրապարակայնությունը: Ես չեմ խոսում իրավական առումով դատական արդարադատության մասին. դրա ակնկալիքը չունենք: Իմ ասածը վերաբերվում է ընդամենը ընթացակարգին: Ամեն ինչ արվում է, որպեսզի նիստերը նորմալ տեղի չունենան:

Իմ կարծիքով հոգեբանական ճնշումների հստակ քաղաքականություն է վարվում և՛ մեղադրյալների, և՛ փաստաբանների, և այն քաղաքացիների նկատմամբ, ովքեր ներկա են գտնվում դատավարությանը: Եվ այս ամենն արվում է հակաիրավական քայլերի միջոցով:

Սրանով երկու նպատակ են հետապնդում: Նախ ցույց տան, որ իրենք են այստեղ, տղայականով ասած` «խոսք ասողը»: Ուստի մյուսները պարտավոր են ենթարկվել իրենց: Դրանով բոլորի, հատկապես` փաստաբանների մոտ, ստեղծեն ենթակայի հոգեվիճակ:

Միաժամանակ ամեն ինչ արվում է, որպեսզի դատական այս գործընթացը բնականոն ընթացք չունենա: Խոչընդոտներ են հարուցում, ստեղծում են այնպիսի վիճակ, երբ և՛ մեղադրյալները, և՛ փաստաբանները, և՛ դատական նիստերին մասնակցող քաղաքացիները ստիպված են լինում ընդվզել ու բողոքներ ներկայացնել ապօրինի պահանջների դեմ: Եվ այս փաստերը հիմք ընդունելով` արդեն կարող են դատական նիստերն անցկացնել դռնփակ:

Փաստորեն փաստաբաններին ևս հնարավորություն չի տրվում, որպեսզի նորմալ պայմաններում աշխատեն` պաշտպանեն իրենց վստահորդների շահերը դատարանում: Միտումնավոր այնպիսի իրավիճակ են ստեղծում, որպեսզի չհամաձայնվեն այդպիսի պայմաններում աշխատել: Եվ այս պարագայում իրենց կողմից նշանակված փաստաբանների ներկայությամբ կայացնեն դռնփակ նիստեր:

Վերջնարդյունքում այս` դատական կոչվող գործընթացն իրենց ուզած սցենարով հասցնեն ավարտին:

– Կարելի է ասել` պրովոկացիա՞ է արվում:

– Միանշանակ պրովոկացիա են անում: Որովետև նրանց կողմից կատարվում են հստակ հակաօրինական քայլեր` առանց պատճառի մեղադրյալներին խոսքի իրավունքից զրկում են: Նույնիսկ պաշտպաններին են նիստերի ժամանակ զրկում խոսքի իրավունքից, անտեղի ու անտրամաբանական սանկցիաներ են կիրառում նրանց նկատմամբ: Ի վերջո, շարունակվում է դեռևս փաստաբաններին խուզարկելու ստորացուցիչ գործը:

Քաղաքացիների նկատմամբ ևս անօրինական քայլեր են կատարվում: Փաստորեն գրանցում են այս մարդկանց անձնական տվյալները, ենթարկում են հարցաքննության` ո՞ւմ համար են եկել, ինչի՞ համար են եկել և այլն, և այլն:

Կամ ոստիկաններն այցելում են այս մարդկանց տներն ու ահաբեկում նրանց, ենթարկում հոգեբանական ճնշումների:

Այս ամենը հակաօրինական քայլեր են, և արվում են պրովոկացիայի նպատակով: Կրկնում եմ` որպեսզի մի կողմից վախի մթնոլորտ ստեղծեն, մյուս կողմից էլ դժգոհության ու բողոքի մղեն մեղադրյալներին, փաստաբաններին ու նրանց համակիր քաղաքացիներին: Եվ այս ամենը պատրվակելով` նիստերն անցկացնեն դռնփակ ռեժիմով:

– Իսկ իրենք ինչպե՞ս են բացատրում, երբ հատկապես զննության են ենթարկում փաստաբանների պայուսակները:

– Արդեն պայուսակները խուզարկելուց ավելի հեռուն են գնացել: Վերջին նիստի ժամանակ փաստաբաններ Արայիկ Պապիկյանը և Նինա Կարապետյանը, որպեսզի առիթ չտան ստուգումների, եկել էին առանց պայուսակների: Փաստաթղթերը ձեռքներում բռնած էին եկել: Բայց Արայիկ Պապիկյանից պահանջեցին, որպեսզի ցուց տա դրամապանակը:

Էլի ասեմ` շատ հստակ է, որ այս ամենը պրովոկացիա է ընդամենը:

Եվ մի բան արդեն ակնհայտ է դառնում այս ամենից` հոգեբանական այդ ճնշումները, որ ցանկանում են ստեղծել, կամ վախի մթնոլորտը, որ նպատակադրած ձևավորում են դատական այս պրոցեսների շուրջ, ցանկանում են ընդլայնել ու տարածել ողջ բնակչության շրջանում: Երկրի բոլոր քաղաքացիներին վախեցնել դրանով:

Իսկ ինչ վերաբերում է արդարադատությանը, ապա, նորից ասեմ, ոչ ոք միամիտ չէ, որ նման ակնկալիք ունենա: Բանն այն է, որ այս դատական պրոցեսները, ինչպես մեր երկրի, այնպես էլ միջազգային օրենքներով, պարտավոր են անցկացնել հրապարակայնորեն:

Այս փաստն է, որ իշխանություններին սարսափեցնում է: Քանզի այն հնարավորություն է տալու Ժիրայր Սեֆիլյանին, Սասնա ծռերին և մյուսներին, վերջնականապես հստակեցնել իրենց քաղաքական դիրքորոշումները և հանդես գալ հայտարարություններով ու ուղերձներով` հասցեագրված մեր ժողովրդին:

 

Շարունակությունը` «Փաստ» օրաթերթի այսօրվա համարում: