Ամեն ինչ կանեմ թեկուզ կարճ ժամանակով ծովափնյա երկիր մեկնելու համար. Եվա Բաղդասարյան

Դերասանուհի Եվա Բաղդասարյանը Life.panorama.am-ի հետ զրույցում հայտնել է, որ էկրանային դադարը երկար չի տևի, քանի որ արդեն իսկ առաջարկ ունի հեռուստատեսային նախագծերից մեկից:

«Դեռևս փակագծեր բացելու իրավունքը չունեմ, միայն կարող եմ ասել, որ հեռուստադիտողը ինձ կրկին էկրաններին կտեսնի, քանի որ նոր հեռուստասերիալում եմ նկարահանվում: Նկարահանումները կսկսվեն առաջիկա օրերին, այնպես որ հանգիստս պլանավորել մի փոքր դժվար կլինի, թեև ամեն ինչ կանեմ թեկուզ կարճ ժամանակով ծովափնյա որևէ երկիր մեկնելու համար»,- նշեց Եվան՝ հավելելով, որ իր համար հանգստի լավագույն տարբերակը ծովի և արևի առկայությունն է:

«Ես ծովափնյա հանգստի սիրահար եմ: Թեև լողալ այնքան էլ լավ չեմ կարողանում, սակայն ծովն իմ տարերքն է: Եթե կա ծովն ու արևը, ուրեմն հանգիստս լիարժեք է»,- նկատեց նա:

Եվա Բաղդասարյանը սիրում է հանգիստն անցկացնել ինչպես ընտանեկան, այնպես էլ ընկերական միջավայրում:

Մինչ երկրից մեկնելը, դերասանուհին ամառային օրերը չի վատնում միայն աշխատանքի վրա, իր խոսքով՝ փորձում է հանգիստը կազմակերպել նաև այստեղ՝ Հայաստանում. «Ընկերուհիներով հաճախ ենք լողավազան կամ քաղաքից դուրս գնում: Մենք շատ գեղատեսիլ վայրեր ունենք, որոնք իրենց գեղեցկությամբ ու հետաքրքրությամբ չեն զիջում արտերկրին, մեզ միայն ծովն է պակասում: «Իսկ եթե չի հաջողվում անգամ Երևանից դուրս գալ, ապա երևանյան սրճարաններում ենք փորձում մեր երեկոներն անցկացնել: Կարծում եմ, եթե կա նպատակ, ապա այն իրականացնելու համար վայրն առանձնապես կարևոր չէ: Ես ու ընկերուհիներս հենց այդ գաղափարով ենք առաջնորդվում»,- նշեց Եվան: