Ակնկալում եմ, որ Հայաստանի արտգործնախարարությունն այս գործով լուրջ կզբաղվի․ Շվեդիայում մահացած ՀՀ քաղաքացու իրավահաջորդների փաստաբան

Շվեդիայում ոստիկանության անփութության հետևանքով մահացած ՀՀ քաղաքացի Դավիթ Բարսեղյանի իրավահաջորդների փաստաբան Մարկ Սաֆարյանի խոսքով՝ իրենց փաստաբանական գրասենյակի փորձով և մոտեցմամբ է պայմանավորված, որ Շվեդիայի արդարադատության կանցլերը ոստիկանությունից պահանջել է վերանայել գործը, ինչը նախկինում բացառված էր:

«Մենք միշտ ասել ենք, որ գործի հետ կապված մինչև վերջ գնալու ենք, քանի որ գործի հետ կապված այնքան հանգամանքներ կան տարօրինակ ու հանցավոր, և դրանք թույլ են տալիս մեզ գործն առաջ տանել: Մեր ցուցաբերած մոտեցումը հանդիսացել է պատճառ, որ արդարադատության կանցլերը և անգամ դատախազը ճիշտ գործեն: Ասենք, որ դատախազն էլ բավականին լուրջ հետախուզություն էր իրականացրել, որովհետև բոլոր հարցերի պատասխաններն ունենք»,- ասաց նա:

Հիշեցնենք, որ նախկինում հրապարակել էինք, որ հունիսի 19-ին Շվեդիայի արդարադատության կանցլերը պահանջել է, որպեսզի գործը ոստիկանությունը նորից վերանայի, քանի որ մի շարք տարօրինակ հանգամանքներ հիմնովին  բացատրության կարիք ունեն:

Հայաստանի քաղաքացի 32-ամյա Դավիթ Բարսեղյանը մահացել է Շվեդիայում՝ շվեդական ոստիկանության արհամարհական վերաբերմունքի պատճառով:  Դավիթ Բարսեղյանը մեկնել էր Շվեդիայի Օրեբրո քաղաք: Երեկոյան, ընկերների հետ խանութից դուրս գալուց հետո նրա ինքնազգացողությունը վատացել է, ընկերները նստեցրել են մեքենան, որպեսզի տանեն հիվանդանոց, սակայն ոստիկանները կտրել են ճանապարհը և թույլ չեն տվել նրան հասցնել հիվանդանոց։

Ընկերների այն կոչերին, թե իրենց ընկերը լավ չի զգում, ոստիկանները ոչ մի կերպ չեն արձագանքել, նրանց իջեցրել են մեքենայից ու տարել բաժին: Ոստիկանական բաժնում նույնպես նրան օգնություն չի տրամադրվել, բանտախուց են տեղափոխել, որտեղ էլ Դավիթը մահացել է: Նրա և ընկերների դեմ՝ շվեդական իրավապահ մարմիների կողմից հարուցված գործ, ըստ փաստաբանի, չկա: Դավիթ Բարսեղյանը ամուսնացած էր, ուներ 2 անչափահաս որդի՝ 3 և 4 տարեկան:

Մարկ Սաֆարյանը նշեց, որ գործում եղած խնդրահարույց հանգամանքներից մեկը հենց այն էր, որ դեպքի հետ կապված գործ էր հարուցվել  ոչ թե միանգամից նույն օրը, այլ օրեր հետո և այն էլ այն ժամանակ, երբ իրենք են այդ մասին բարձրաձայնել:

«Կարծում եմ, որ իրենք հիմա շատ լավ հասկանում են, որ մենք մինչև վերջ գնալու ենք: Փորձում են՝ հնարավորինս քիչ չափով խայտառակ լինեն»,- ասաց նա:

Մարկ Սաֆարյանն, այնուամենայնիվ, նշեց, որ ինքը չի հավատում, որ Շվեդիայում դեպքի հետ կապված քրեական գործ կհարուցվի: Նա նշեց, որ հնարավոր է, որ Շվեդիայի իրավապահ մարմինները ընդունեն, որ իրենք սխալվել են, և գործը քաղաքացիական համակարգում էլ կսահմանափակեն: «Կասեն, մենք ընդունում ենք, որ սխալ ենք արել, թերացումներ են եղել նախարարության կողմից, որի համար մենք սիմվոլիկ փոխհատուցում կտանք ընտանիքին, բայց չեմ հավատում, որ դեպքով քրեական գործ կհարուցվի,- ասաց նա՝ հավելելով, որ իրականում մահացածի՝ Դավիթ Բարսեղյանի ծնողների ցանկությունն իրենց որդու գործով քրեական և քաղաքացիական ատյաններում վճիռ ստանալն է,- մենք չենք բավարարվելու նույնիսկ այն դեպքում, եթե իրենք մեծ չափով գումարի փոխհատուցում տան․ պետությունը մի շարք սխալներ է արել, որը հանգեցրել է այլ երկրի քաղաքացու մահվան»:

Փաստաբանը նշեց, որ ինքը համարում է, որ ՀՀ քաղաքացու դեպքը որքանով, որ նման է Շվեդիայում եղած շատ այլ դեպքերի, նույնքան և տարբեր է, դրանով պայմանավորված՝ իրենք անընդհատ քննարկում են, որեթե Շվեդիայում իրենք գործի հետ կապված իրենց ցանկալի արդյունքը չստանան, դիմելու են Եվրոպական դատարան:

Մարկ Սաֆարյանի խոսքով՝ լավ կլիներ, որ գործի հետ կապված հայաստանյան իշխանությունները որոշակի մոտեցում որդեգրեին: «Ես կարծում եմ, որ Հայաստանի իշխանությունները պետք է պաշտպանեին իրենց քաղաքացու շահերը: Այս հարցում, կարծում եմ, պասիվություն կա: Գոնե այնպես պետք է անեին, որ ընտանիքն իրեն հոգեբանորեն վատ չզգար, որ մտածեին, որ իրենք մենակ չեն, պետությունն էլ է իրենց կողքին: Իրենք տեղեկացված են գործից, նախաքննությանը տեղյակ են: Ակնկալում եմ, որ Հայաստանի արտգործնախարարությունն այս գործով լուրջ կզբաղվի, որովհետև սա Հայաստանի քաղաքացու նկատմամբ ակնհայտ ոտնձգություն է, որը հանգեցրել է մարդու մահվան»,- ասաց նա: