Երևանում կայացավ «Երկխոսություն տեղական տնտեսական զարգացման շուրջ» թեմայով քննարկում

Այսօրվա հրամայականն է, որ կամայական մակարդակի կառավարիչները, ղեկավարները լինեն ժամանակակից և պարբերաբար աշխատեն իրենց վրա։ 
«Արմենպրես»-ի հաղորդմամբ՝ այս մասին «Երկխոսություն տեղական տնտեսական զարգացման շուրջ» թեմայով քննարկման ընթացքում ասաց ՀՀ վարչապետ ԿարենԿարապետյանը։ 
Նա նշեց, որ պետք է նոր շունչ և որակ տրվի այն եռաստիճան կառավարմանը, որը կա համայնքային կառավարման առումով՝ մարզպետարան- համայնքներ-կառավարություն։ 
«Այսօրվա հրամայականն է, որ կամայական մակարդակի մեր կառավարիչները, ղեկավարները լինեն ժամանակակից և պարբերաբար աշխատեն իրենց վրա։ Մեր հանրապետությունում համաչափ զարգացումը չափազանց կարևոր  խնդիր է։ ՀՀ քաղաքացին առաջին հերթին իր հարցերը փորձում է լուծել համայնքում։ Տրանսպորտի, բիզնես միջավայրի, սանմաքրման որակների, աշխատատեղերի ստեղծման լավ ու վատ լինելով է քաղաքացին գնահատում իշխանություններին և իր ապրելակերպը։ Համայնք-մասնավոր հատված համագործակցության առումով որոշակի քայլեր արդեն արել ենք անցած տարվա վերջին… Համայնքների մի մասին արդեն սկսել ենք օժանդակել»,- ասաց ՀՀ վարչապետը։ Ըստ նրա՝
ներկայացված ծրագրերի մակարդակը, ցավոք, շատ հեռու է այսօրվա ժամանակակից պահանջներից, բայց մենք երբեք չպետք է հոգնենք ու այս ուղղությամբ պետք է վստահորեն առաջ գնանք՝ համոզված լինելով, որ ի վերջո հասնելու ենք այն կառավարման մակարդակին, որն այսօր ՀՀ քաղաքացին ակնկալում է կառավարությունից: Նա վստահություն հայտնեց, որ այս հանդիպումները կբերեն նոր շունչ, նոր գույներ, նոր մոտեցումներ կառավարման հարցում: 
ՀՀ տնտեսական կառավարման և զարգացման նախարար Դավիթ Լոքյանն այն համոզմունքը հայտնեց, որ Հայաստանը երեք ամիս հետո կունենա այն փոքր օջախները, որոնք սկիզբ կդնեն տնտեսական տեղական ծրագրերի պրոցեսին։ 
«Շուրջ վեց ամիս է, ինչ կառավարությունն իր ուշադրության կիզակետում է պահում համայնքների տնտեսական զարգացման խնդիրները: Մենք արդեն կառավարությունում`վարչապետի ղեկավարած հարթակում, ունեցել ենք շուրջ հարյուր և ավելի հանդիպումներ համայնքապետերի հետ։ Արդյունքում ձևակերպել ենք խնդիր, որ առանց համայնքային տնտեսական զարգացման, առանց համայնքներում տնտեսական գործունեության ակտիվության մենք երկրում համաչափություն չենք ապահովելու, չենք ունենալու ուժեղ համայնքներ, որոնք լրացուցիչ ֆինանսական հոսքեր կունենան, և չենք ապահովի մարդկային կապիտալի առկայություն մեր հեռավոր ծայրամասային համայնքներում։ Այս ամենի արդյունքում չենք ունենա առաջընթաց տնտեսական տեսանկյունից: Մենք համոզվեցինք մեկ ընդհանուր սկզբունքում՝ անհրաժեշտություն կա համայնքներում համայնքային տեղական տնտեսական ծրագրեր իրականացնելու ընդհանուր մեթոդիկա և ուսուցման խնդիր լուծել: Այսօր Գերմանիայի միջազգային զարգացման ընկերության օժանդակությամբ մենք կարողանում ենք սկիզբ դնել այս պրոցեսին: Պրոցես, որի արդյունքում շուրջ 200 համայնքների ներկայացուցիչների վերապատրաստելու ենք և ապագայում ակնկալելու ենք արդյունքներ տեղական տնտեսական զարգացման խնդիրներում: Սա մեր կառավարության, վարչապետ Կարեն Կարապետյանի հիմնական առանցքային հանձնարարականներից է եղել, որ մենք պետք է իրականացնենք»,- նշեց նախարար Լոքյանը: 
Գերմանիայի միջազգային համագործակցության ընկերության (ԳՄՀԸ) գրասենյակի ղեկավար Աննա Քեմփան, իր հերթին, նշեց, որ արդեն մի քանի տարի է իրենց ընկերությունն իրականացնում է «Լավ տեղական ինքնակառավարում Հարավային Կովկասում» ծրագիրը։ Այն համաֆինանսավորվում է Հայաստանում Շվեյցարիայի զարգացման և համագործակցության և ԱՄՆ միջազգային զարգացման գործակալությունների կողմից: 
«Մեր ծրագրի նպատակն է աջակցել կառավարությանը՝ բարելավելու տրամադրվող ծառայությունների որակը համայնքային մակարդակում և զարգացնել ենթակառուցվածքները: Այս համաժողովի նպատակն է ստեղծել միասնական հարթակ՝ քննարկելու նմանատիպ խնդիրները: Համոզված եմ, որ այս համաժողովը ելակետ կհանդիսանա պետության և մասնավոր հատվածի միջև համագործակցության ստեղծման համար՝ ստեղծելու համայնքների տնտեսական զարգացման արդյունավետ մոդելներ»,- ընդգծեց Քեմփան։ 
Միջոցառման ժամանակ տեղի ունեցավ նաև ՀՀ տարածքային կառավարման և զարգացման նախարարության և Գերմանիայի միջազգային համագործակցության ընկերության կողմից մշակված «Տնտեսության զարգացումը համայնքներում» ձեռնարկի շնորհանդես։