Ադրբեջանական արդարադատություն․ Ծեծված լրագրողը հարձակումից մեկ ամիս անց փորձաքննության է ենթարկվել

Ադրբեջանի իշխանությունները ցուցադրել են օրենքների յուրատեսակ ըմբռնման հերթական օրինակը։

contact.az-ի փոխանցմամբ, իրականացվել է մայիսի 29-ին կալանավորված լրագրող Աֆղան Մուխթարլիի բժշկական փորձաքննությունը։ Նրա փաստաբան Նեյմաթ Քերիմլին հայտնել է, որ փորձաքննությունը իրականացվել է նրա ծեծվելուց 31 օր հետո։

«Մուխթարլին առեւանգվել էր Թբիլիսիում ու ծեծվել, իսկ հետո տեղափոխվել Բաքու։ Պաշտպանությունը միանգամից պահանջել էր փորձաքննություն իրականացնել, սակայն դա չի արվել։ Հակառակ օրենքի պահանջներին, փորձաքննությունը չի իրականացվել  միտումնավոր, որպեսզի նրա մարմնի վրա բռնության հետքերը բնական ճանապարհով անհետանան»,- ասել է փաստաբանը։

Հիշեցնենք, որ Մուխթարլիի դեմ հարուցվել է քրեական գործ՝ Ադրբեջանի ՔՕ 315․2, 318․1 ու 206․1 հոդվածներով (իշխանության ներկայացուցիչների դեմ բռնություն, ապրինի սահմանահատում ու մաքսանենգություն)։ Ադրբեջանի իշխանությունները վստահեցնում են, որ նա ձերբակալվել է ապօրինի սահմանահատման ժամանակ՝ գրպանում 10 հազար եվրո։ Սակայն իրականում նրան առեւանգել են Վրաստանի քրեական ոստիկանության աշխատակիցները ու փոխանցել Ադրբեջանի ներկայացուցիչներին։ Լրագրողի առեւանգման պատճառն էր նրա հետաքննությունը Ադրբեջանի ղեկավարության կոռուպցիայի մասին։ Բացի դրանից, իշխանությունները Մուխթարլիին համարում են օղակ՝ արեւմտյան կառույցների կողմից ադրբեջանական ընդդիմությանը գումարի փոխանցման մեխանիզմում։