Թևան Պողոսյանը` ՀՀԿ–ի կարծրատիպային մտածելակերպի և ընդդիմության քայլերի մասին. «Փաստ»

«Փաստ» օրաթերթը գրում է.

ԱԺ նախկին պատգամավոր Թևան Պողոսյանը, ով ներկայում շարունակում է իր հիմնած Մարդկային զարգացման միջազգային կենտրոնը ղեկավարել, այս օրերին զբաղված է «Պատիվ ունեմ» և «Ես եմ» ծրագրերի հանրային քննարկումներ կազմակերպելով: Այս ընթացքում արդեն հանդիպել են Եղեգնաձորի, Կապանի, Իջևանի, Գյումրիի բնակիչների հետ: Հուլիսի 3–ին ծրագրերը կքննարկվեն Վանաձորում, իսկ 4–ին՝ Երևանում: Նախկին պատգամավորը հույս ունի, որ վերջնական օրենքը մշակելու ժամանակ օրենսդիրներն անպայման հաշվի կառնեն նաև հանրային կարծիքը, որը կձևավորվի այս ընթացքում:

Խոսելով ԱԺ–ում Կառավարության կողմից ներկայացված ծրագրի մասին, նա նշեց, որ իր կարծիքով այն հնարավորությունների ծրագիր է, որտեղ զետեղված են այն դրույթները, որոնք նախկինից ինչ–որ չափով ֆինանսավորում ունեն:

«Ես ցավում եմ, որ նոր մշակույթ չձևավորվեց, որ կառավարության ծրագիրը ներառի նաև մյուս քաղաքական ուժերի ծրագրային դրույթները: Նույնիսկ ծրագրի ներկայացման ժամանակ ասվեց՝ քանի որ հանրապետականներն ավելի շատ են, քան մնացած բոլորը, ապա իրենց մոտեցումներն են ներկայացնելու:

Խոսելով ՀՀԿ–ի նախընտրական ծրագրի և կառավարության կողմից ԱԺ ներկայացված ծրագրերի նմանության մասին, Թ. Պողոսյանը նշեց, որ այստեղ նույնպես բավականին տարբերություններ կան:

«Եթե սա լիներ կուսակցական լուրջ ծրագիր, ապա կառավարության ծրագիրը կներկայացվեր Ազգային ժողովի ձևավորման կամ վարչապետի նշանակման հաջորդ օրը, քանի որ կուսակցությունն իր նախընտրական ծրագիրն իրականացնելու համար է եկել իշխանության: Այսինքն` նախընտրական ծրագիրը պետք է դառնար կառավարության ծրագիրը, այդ դեպքում արդեն պետք չէր լինի այդքան չարչարվել և նոր ծրագիր գրել»,– ասաց Թ. Պողոսյանը:

Նրա դիտարկմամբ` կառավարությունը ներկայացրել էր այն ծրագրերը, որոնք ներկայում ունեն ֆինանսական ապահովում միջազգային կառույցների կողմից, ոչ թե այն, ինչ գրված էր Հանրապետականի նախընտրական ծրագրում, որտեղ նշվածն այն մասին է, թե ինչ է կուսակցությունը ցանկանում իրականացնել: Բացի այդ, նախկին պատգամավորի դիտարկմամբ, պետք չէ մոռանալ, որ մինչև 2019 թվականը Հայաստանի կառավարությունը վարկային միջոցներ ներգրավելու հնարավորություն չունի, քանի որ երկիրը հատել է իր հնարավորությունների սահմանագիծը: Եվ այդ պատճառով է, որ կառավարությունը միգուցե սեփական գաղափարներ ու ծրագրեր չի իրականացնելու: Դրա փոխարեն իրականացնելու է այն, ինչն այսօրվա դրությամբ հնարավոր է: Եվ դա կարող է սփյուռքահայերի կողմից ներկայացվող որևէ ծրագիր կամ միջազգային և հայաստանյան հարուստներից ինչ–որ մեկի նախաձեռնությունը լինել, բայց հատուկ, մեծ ծրագրեր Թ.Պողոսյանի կարծիքով չեն իրականացվի:

Պատասխանելով հարցին, կոռե՞կտ է արդյոք գործող վարչապետին հարցնել, եկող, կամ դրա հաջորդ տարիներին նույնպես ինքը պաշտոնավարելու է նույն պաշտոնում, թե՝ ոչ, Թ. Պողոսյանը պատասխանեց, որ յուրաքանչյուրն ինքն է որոշում` նման հարց տալը կոռեկտ է, թե՝ ոչ:

«Ինձ համար բոլոր այդ քննարկումների մեջ մեկ նախադասություն է ուղենիշային, երբ Հանրապետական կուսակցության ներկայացուցիչներն ասում են, որ, այնուամենայնիվ, իրենք են որոշում ամեն ինչ: Եվ դա բերում է նրան, որ անձերով պայմանավորված առանձնապես շատ բան չի փոխվելու: Մեկ բան է հստակ, որ 2018–ի ապրիլին հանրապետականներն են լինելու մեծամասնություն և իրենք են որոշելու, թե ով կլինի վարչապետը, և ինչ որոշեն, այդպես էլ կլինի»,– ասաց Թ. Պողոսյանը:

Մարդկային զարգացման միջազգային կենտրոնի ղեկավարը «հիշեցրեց», որ դեռ 8–9 ամիս կա և այդ ընթացքում հազար ու մի բան կարող է պատահել և իրավիճակ փոխվել: Աշխարհը շատ արագընթաց տեմպերով է զարգանում, իսկ քանի որ մենք մի տարածաշրջանում ենք ապրում, որտեղ այլևս չենք կարող տարածաշրջանը Հայաստան, Վրաստան, Ադրբեջան համարել, ուստի հիմա նման հարց տալն այնքան էլ իրատեսական չէ:

«Մեր տարածաշրջանի վրա ներկայում նաև Մերձավոր Արևելքն է ներազդում և այս ընթացքում կարող են հազարավոր բաներ փոխվել: Իսկ մնացած խնդիրներին կարելի է անդրադառնալ մարտ ամսին, երբ արդեն մոտ կլինենք ապրիլ ամսին: Եվ իմ կարծիքով, եթե մինչ այդ հաջողություններ լինեն, ապա փոփոխություններ չենք ունենա, իսկ եթե լինեն անհաջող իրավիճակներ, ապա կարող է նաև փոփոխություններ լինեն: Մեկ անգամ չեն հանրապետականներն ասել, որ իրենք և իրենց կուսակցության ղեկավարն է ամեն ինչ որոշում: Իսկ մնացած քաղաքական ուժերը պետք է դրան պատրաստ լինեն և փորձեն տարբեր սցենարներ մշակել և ցանկացած պարագայում ճիշտ կողմնորոշվել»,– ասաց Թ. Պողոսյանը:

 

Շարունակությունը` «Փաստ» օրաթերթի այսօրվա համարում: