«Այո, ՀԱԿ–ի լռելը սխալ է». «Փաստ»

«Փաստ» օրաթերթը գրում է.

Մինչ քաղհասարակությունն ու իրավապաշտպանները դատապարտում են «Սասնա ծռերի» դատավարության ժամանակ վերջիններիս ծեծի ու բռնության ենթարկելը ու պահանջում պատասխանատվության ենթարկել «դատական համակարգը անարգած ոստիկաններին», իսկ ոստիկանությունը պատասխանում է, թե համաչափ ուժ է կիրառվել, քաղաքական որոշ ուժեր, այդ թվում ՀԱԿ–ը, լռություն են պահպանում:

ՀԱԿ վարչության անդամ Վարդան Մալխասյանը «Փաստի» հետ զրույցում ասում է, որ սխալ է համարում ՀԱԿ–ի լռությունը:

– Պարոն Մալխասյան, ՀԱԿ–ի պասիվ դիրքը «Սասնա ծռերի» հանդեպ բռնությունների առթիվ ինչո՞վ է պայմանավորված: Ինչո՞ւ է Կոնգրեսը լռում այդ առթիվ:

– Նախ՝ Կոնգրեսի ծրագրի հիմքում դրված չի զինված պայքարով իշխանությունը փոխելը: Գաղափարական տարաձայնություններ կային: Հստակ չէր «Սասնա ծռերի» գործողության տրամաբանությունը կամ հանգուցալուծումը: Որովհետև իրենցից անկախ, «Սասնա ծռերի» գործողությունը որոշակի փրկօղակ բերեց Սերժ Սարգսյանին լավրովյան պլանի առումով: Այո՛, լռելը սխալ է՝ անկախ նրանից, տարաձայնություններ ունե՞ս, թե՞ չունես: Ամեն տեսակ չարիքները երկրում արմատավորվում ու առաջ են գալիս անտարբերությունից:

– Ասել է թե՝ ՀԱԿ–ի լռելը սխալ եք համարում:

– Այո, սխալ է: Մենք պիտի խոսենք, ասենք, քննարկենք, թեկուզ և շատերի կողմից չընդունվի, պիտի բարձրաձայնել, թե ինչո՞ւ են էսպիսի անմարդակային երևույթներ տեղի ունենում: Եթե չխոսենք, վաղը էդ նույն բանը մեր դռանը կչոքի:

– Պարոն Մալխասյան, իսկ Դուք ՀԱԿ–ի ներսում փորձե՞լ եք այդ հարցը բարձրացնել:

– Չէ, վարչության նիստ չի եղել, վարչության նիստ պիտի լինի մոտ օրերս, պիտի քննարկենք: Բռնության երևույթի հետ կապված պիտի կարծիք հայտնենք:

– Պարոն Մալխասյան, ոստիկանությունը չի հերքում «Սասնա ծռերի» անդամների ծեծը, այսինքն՝ ասում է, որ ոստիկանության գործողությունները համաչափ են եղել: Հնարավոր համարո՞ւմ եք, որ ինչ–որ գործողություններ եղած լինեն «Սասնա ծռերի» կողմից, որ ոստիկանությունը նման քայլի է դիմել:

– Ոստիկանությունը մեզ մոտ միշտ էլ օրենքից դուրս է գործել՝ դեռ խորհրդային տարիներից, հետո էլ ավանդույթը շարունակվել է նորանկախ երկրում: Ավանդույթ է դարձել, որ ոստիկանությունը չեղած տեղից զեկուցագրեր է գրում մարդկանց վրա: Պատահում է՝ անմեղ մարդուն բերում են, 2–3 ոստիկան թղթեր են լրացնում, թե բերելու ընթացքում իրենց հետ վիճեց, անհարգալիք վերաբերմունք դրսևորեց և այլն, բռնում էին էն ժամանակ, 15 օր կալանք էին տալիս անմեղ մարդուն: Մարդն ինչ ձևով գոռար–ճվար, թե նման բան չի եղել, դատարանը լսում էր ոստիկանին: Նույն ավանդույթը շարունակվում է. զրպարտագրեր են գրում մարդկանց վրա: Ձեռնաշղթաներով դատարան բերվող «Սասնա ծռերը» ի՞նչ են արել ոստիկանների նկատմամբ, որ նրանք ծեծ են կիրառել: Հետո, եթե մեկը ասենք ոստիկանի հանդեպ ոտնձգություն է կատարում, նա պիտի բռնի, ձեռքերը ոլորի, ոչ թե գցի քացու տակ, վնասվածքներ պատճառի: Ձեռնաշղթաներով դատարան բերվող «Սասնա ծռերը» չէին կարող ոստիկանների հանդեպ բռնություն կիրառել, որ ոստիկանության գործողությունները իրավաչափ համարվեն: Ակնհայտ է, որ սա վրեժ է: Ոստիկաններ զոհվեցին չէ՞, սակայն դեռ հայտնի էլ չէ, ոստիկաններից որին իշխանությունը կրակեց, որին՝ «Սասնա ծռերը»:

– Մյուս կողմից Սերժ Սարգսյանը մեկ տարի առաջ հրապարակավ հայտարարեց, որ անձնական վրեժխնդրություն չի լինելու. ստացվում է՝ ոստիկանությունը չի՞ պահում նախագահի այդ խոսքը:

– Սերժ Սարգսյանը շատ բաներ է ասել, ինչ ասում է՝ 99%–ը սուտ է, չի իրականանում: Իրականությունն էն է նաև, որ մեր երկրում ժողովուրդը ոստիկաններին չի հավատում, չի հարգում, չի սիրում: Ուղղակի ժողովուրդը պիտի հասկանա, որ էս ամողջ բռնարարքների մեղքի բաժինը նաև իր մեջ է, եթե ընտրակաշառքով ձայն է տվել այս բռնարար իշխանությանը և դուրս գա փողոց:

– Իսկ ո՞վ պետք է ժողովրդին հանի փողոց, ինչպե՞ս եք դա պատկերացնում: Ի՞նչ ձևով է հնարավոր պաշտպանել «Սասնա ծռերի» իրավունքները:

– Պետք է ժողովուրդը դուրս գա փողոց: Մինչև ժողովուրդը չհասկանա, որ կողքինիդ եթե ծեծում են, նշանակում է՝ ծեծում են քեզ, կողինիդ ցավը պիտի դառնա քո ցավը, եթե դու այդ գիտակցության չեկար, վաղը քեզ էլ են ծեծելու: Ծեծելու են և չես կարողանալու պաշտպանվես, որովհետև չկա օրենք, չկա արդարադատություն:

Կուսակցությունները պետք է պայքարի ձևեր մշակեն ու ժողովրդին հասկացնեն, որ այսպես շարունակել համբերել, նշանակում է համակերպվել ստրկության հետ: Ոստիկանությունը երկրի հայելին է, ինդիկատորն է: Եթե ոստիկանությունն անարդար եղավ, պաշտպանեց ոչ թե օրենքը, այլ իշխող դասակարգի շահերը, երբեք հարգանք չի ունենա և ժողովուրդը չի հավատա նրան:

 Շարունակությունը` «Փաստ» օրաթերթի այսօրվա համարում: