Շարմազանովը կոչ է անում կողմ քվեարկել Սևանա լճից լրացուցիչ ջուր բաց թողնելու օրինագծին

 Ազգային ժողովի փոխնախագահ Էդուարդ Շարմազանովը չի կիսում կարծիքները, թե Հայաստանի իշխանությունն անցած տարիների ընթացքում Սևանի էկոհամակարգին և հիմնախնդիրներին ուշադրություն չի դարձրել: Ազգային ժողովում  «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին օրենքի նախագծի քննարկման ընթացքում ՀՀ Ազգային ժողովի փոխնախագահն ընդգծեց, որ եկել, հասել ենք մի հանգրվանի, որտեղ Սևանի էկոհամակարգը մի կողմում է, ոռոգման խնդիրը, ժողովրդի առջև ծառացած խնդիրները, որոնք օպերատիվ լուծման կարիք ունեն՝ մյուս կողմում: «Սևանա լիճը ազգային հարստությո՞ւն է, թե՞ ոչ: Միանշանակ՝ այո: Մենք պե՞տք է հոգ տանենք Սևանի մասին, իհարկե՝ այո: Մենք քայլեր ձեռնարկե՞լ ենք դրա համար, թե՞ ոչ: Այստեղ կարող ենք ունենալ տարբեր կարծիքներ: Այնպես չէ, որ այս 10 տարիների ընթացքում որևէ բան չենք արել ու եկել ենք հիմա Սևանի հաշվին գյուղացիների համար ոռոգում ենք անում»,-  «Արմենպրես»-ի փոխանցմամբ՝ ասաց Շարմազանովը:

Անդրադառնալով տեսակետներին, թե օրենքի նախագծի շուրջ նախօրոք պետք էր հանրային քննարկում իրականացնել, ԱԺ լսումներ իրականացնել, նա ասաց, որ դա իրատեսական չէ, որովհետև նախ 5-րդ գումարման ԱԺ-ն ավարտում էր իր աշխատանքները, իշխանություններն ու ընդդիմությունը զբաղված էին նախընտրական պայքարով, իսկ 6-րդ գումարման ԱԺ-ի իրավունքները նոր են մտել ուժի մեջ: «Նոր խորհրդարանն ունի վերահսկողական ֆունկցիա և, սիրելի կառավարություն, այո, ամեն Աստծո օր, դուք պետք է գաք, հաշվետվություն տաք՝ իշխանությանն էլ, ընդդիմությանն էլ: Մեզ ընտրել են, որ ձեզ նաև վերահսկենք, այստեղ որևէ վիրավորական բան չկա»,- ընդգծեց նա:

Շարմազանովը հավելեց, որ խոսքը 130 հազար գյուղացու մասին է, և նրանք առանց ջրի կմնան, եթե խորհրդարանը կողմ չքվեարկի օրենքի նախագծին: «Սա կատաստրոֆիկ է: Դուք պատկերացնում եք՝ մենք պետք է պարզ ճակատով մտնենք, այդ գյուղացիներին ասենք, որ գիտեք՝ ինչ կա, որ Սևանի մակարդակը մի քանի սանտիմետր ավել լիներ, մենք ձեզ ոռոգման ջուր չտվեցինք, որ դուք վարկեր ավելի շատ վերցնեք, ձեր երեխաների ուսման վարձը չկարողանաք վճարել»,- ասաց Շարմազանովը:

Ըստ նրա՝ ընտրությունը վատի ու վատթարագույնի միջև չէ,  սա անհրաժեշտ ընտրություն է: «Սևանը մեր ազգային հարստությունն է, բայց Սևանը նաև նրա համար է, որ մենք մի կողմից հոգ տանենք Սևանի, էկոհամակարգի մասին, որ մակարդակը բարձրանա, բայց մյուս կողմից՝ եթե լինում է սակավաջուր տարի, մենք օգտագործենք Սևանը՝ մեր քաղաքացիների պահանջները հոգալու համար»,- նշեց ԱԺ փոխնախագահը:

Շարմազանովը  հորդորեց կողմ քվեարկել նախագծին՝ նշելով, որ սա օպերատիվ դրական լուծում է 130 հազար քաղաքացիների խնդիրների համար:

Խորհրդարանը քննարկում է «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին օրենքի նախագծ: Նախագծով նախատեսվում է Սևանա լճից 2017թ. 100 միլիոն խորանարդ մետր ավելի ջուր բաց թողնել: