Դուք ուզում եք՝ Գագիկ Ծառուկյանը ֆիզիկապես ներկա՞ լինի Աժ նիստերին. Միքայել Մելքումյան

Խորհրդարանական աշխատանքին մասնակցելը չի նշանակում՝ անպայման նստել Ազգային ժողովում։ «Ծառուկյան» դաշինքի պատգամավոր, ԱԺ փոխխոսնակ Միքայել Մելքումյանը NEWS.am–ի հետ զրույցում այսպես ձեւակերպեց խմբակցության ղեկավար Գագիկ Ծառուկյանի բացակայությունը խորհրդարանում։

Հիշեցնենք, որ Գագիկ Ծառուկյանը ամենաշատ բացակայող պատգամավորներից է, նախորդ գումարման Ազգային ժողովում մի քանի անգամ է ներկայացել նիստերին մի քանի րոպեով։ Իսկ 6–րդ գումարման Ազգային ժողովում ներկա է գտնվել միայն անդրանիկ նիստին։ Երբ լրագրողները հետաքրքրվել էին՝ եթե խմբակցության ղեկավար լինելը, նշանակո՞ւմ է՝ ակտիվ է աշխատել, հաճախել նիստերին, Ծառուկյանը զարմացած հակադարձել էր. «Իսկ ե՞րբ ակտիվ չեմ եղել»։

Երբ Միքայել Մելքումյանից հետաքրքրվեցինք՝ խմբակցության ղեկավարը ինչու չի մասնակցում նիստերին, Մելքումյանը տարակուսեց. «Դուք ուզում եք՝ Ծառուկյանը ֆիզիկապես ներկա լինի նիստերի՞ն։ Խորհրդարանական աշխատանքին մասնակցելը չի նշանակում անպայման նստել Ազգային ժողովում»։

Պատգամավորը հավատսիացրեց, թե խորհրդարանական անցուդարձից վայրկյաններով տեղյակ է Ծառուկյանը։

«Ամեն ինչին տիրապետում ա, կազմակերպում ա մեր խմբակցության ամբողջ գործունեությունը եւ դա նորմալ է։ Ծառուկյանը ղեկավարում է խմբակցության գործունեությունը եւ ամեն ինչից տեղյակ է րոպեներով վայրկյաններով»։

Մելքումյանը նախ պնդեց, թե Գագիկ Ծառուկյանի հետ ամենօրյա հանդիպումների մեջ են եւ նա համակարգում է խմբակցության օրենսդիր գործունեությունը, ապա հավեց, թե Ծառուկյանը գործուղումների մեջ է լինում եւ չի կարողանում մասնակցել նիստերին։