Կփորձեմ աշխատել և անել ավելին, որ հետագա աշխատանքներս շատ ավելի հիմնական ու կայուն լինեն. Սոնա Ռուբենյան

Citylife.am- Սոնա՛, ես գիտեմ, որ փոքր տարիքում դեպի երաժշտական ասպարեզ Ձեզ ուղղորդել են Ձեր ծնողները, բայց արդյո՞ք դա եղել է Ձեր ցանկությունը։

Սոնա– Դե իհարկե իմ ցանկությունն է եղել: Տանը միշտ երգել եմ, իսկ ծնողներս էլ հաշվի առնելով իմ նախասիրությունները՝ սերս դեպի երգը, միջամտել են ու տարել ինձ այդ ուղով։

Citylife.am- Փաստորեն կարելի է ասել, որ դա է եղել Ձեր երազանքը, նպատակը։

Սոնա– Երազանք, նպատակ 4 կամ 5 տարեկանում բնականաբար չի եղել, ուղղակի սիրել եմ երգել, և կարծում եմ հենց այդ պատճառով էլ դարձա երգչուհի։

Citylife.am- Եթե երգչուհի չլինեիք, ապա ուրիշ ո՞ր ասպարեզում Ձեզ կտեսնեինք։

Սոնա- Հաստատ կրկին կապ էր ունենալու երաժշտության հետ, որովհետև մասնագիտությամբ ջազ-դաշնակահարուհի եմ: Ավարտել եմ կոնսերվատորիան, ու հաստատ որևիցե մի գործիք էր լինելու երաժշտական. ամեն դեպքում երաժշտության հետ կապ ունեցող ինչ-որ մի բան։Citylife.am- Երգում եք տարբեր ժանրի երգեր. ո՞րն է ավելի հոգեհարազատ Ձեզ:

Սոնա– Երգերը երգում եմ այն պատճառով, քանի որ հոգուս հարազատ են լինում։ Այսինքն՝ այն երգը, որը երգում եմ տվյալ պահին, արդեն դառնում է հոգեհարազատ։ Երգում եմ ինձ համար սիրելի երգեր՝ հայկական ժողովրդականից սկսած մինչև սոուլ, ջազ: Ամեն ինչ սիրում եմ, բայց կոնկրետ ինչ-որ բան չեմ կարող նշել։

Citylife.am- Վերջին շրջանում ներկայացնում եք սիրված և ճանաչված երգերը ժամանակակից տարբերակով: Կարելի՞ է ենթադրել, որ այդ տարբերակն ավելի հաճելի է Ձեզ:

Սոնա-Ներկայացնում ենք տարբեր երգեր՝ Գարիկ Պապոյանի գործիքավորմամբ ու մեր՝ բոլորիս մատուցմամբ: Երգերի նոր տարբերակներն այնպես են արված, որ ավելի հարազատ լինեն մեզ, և որ մենք ավելի հաճույքով ներկայացնենք դրանք։ Կարծում եմ, որ հենց այդպես էլ ստացվում է։ Մեզ շատ ավելի հարազատ են դարձել երգերի հենց այս նոր տարբերակները։Citylife.am- Ձեր երգացանկից ո՞ր երգը կհամարեք Ձեզ համար ամենաստացվածն ու ամենայուրահատուկը։

Սոնա – Ես միշտ նշում եմ, որ “Մայրիկ” երգն եմ շա՜տ սիրում. շատ հարազատ երգ է դարձել, որը մեծ հաճունքով եմ կատարել։ Ավետ Բարսեղյանի հետ եմ համագործակցել. խոսքերն Ավետինն են, երաժշտությունը՝ իմը։ Citylife.am- Ինչո՞վ եք ոգեշնչվում ամեն մի նոր երգ երգելիս։

Սոնա– Հենց այդ երգով։ Եթե երգը չդիպչի սրտիս՝ չեմ երգի։ Ամեն նոր երգ մատուցելիս, ներկայացնելիս հենց այդ երգով եմ ոգեշնչվում, եթե չհաշվենք կողմնակի ոգեշնչման աղբյուրները։

Citylife.am-Իսկ կարո՞ղ եք մի քանի կողմնակի ոգեշնչման աղբյուրներ նշել։

Սոնա– Օրինակ դասական երաժշտությունից եմ լիցքավորվում, շատ եմ սիրում լսել: Եթե մի քիչ ընկճված եմ լինում՝ այդ էներգիայի կարիքն ունենում եմ։

Citylife.am- Կյանքում Ի՞նչը կարող է հիասթափեցնել Ձեզ և ինչի՞ց կարող եք ոգևորվել։

Սոնա- Ոգևորվում եմ ամեն լավ կարծիք լսելիս, երբ հասկանում եմ, որ աշխատանքս զուր չեմ արել. գնահատվում է ամեն ինչը, իսկ հիասթափությունների հետ շատ ենք առնչվում կյանքում ու դրանք կարող են շատ տարբեր լինել՝ հասարակ մարդկային փոխհարաբերություններից սկսած մինչև ինչ-որ երևույթ։

Citylife.am- Ի՞նչ նորություններ սպասեն երկրպագուները սիրելի երգչուհուց:

Սոնա– “Գողթ” խմբի հետ “Արենաlive”-ում երկու երգ երգեցինք: Համագործակցել ենք արդեն ու գեղեցիկ երգեր են ստացվել՝ ժողովրդական և արտասահմանյան երգերի միքսեր։ Իրենց հետ ենք պատրաստվում նոր մի դուետ անել. կամ կլինի այդ երկու համարներից մեկը, կամ նոր ինչ-որ մի բան։ Գարիկի հետ արդեն սկսել ենք մեր համերգային շարունակական գործունեությունը: Բացի այդ առանձին նույնպես կունենանք համերգներ։ Կարծում եմ՝ եկող տարին ավելի ակտիվ է լինելու։Citylife.am- Ո՞րն է ձեր կյանքի գերագույն նպատակը։

Սոնա– Անկեղծ ասած երբեք չեմ մտածել։ Առհասարակ ձգտում եմ երաժշտության մեջ ավելի կայանալ, քանի որ միշտ աշխատելու տեղ կա, ու մարդ միշտ պետք է գիտակցի, որ իր ճանապարհի սկզբի ընդամենը երկու քայլն է արել և մնացած բազում քայլերը դեռ առջևում են։ Այդպես մտածելով փորձում եմ այն ինչ անում եմ, գոնե լավ անեմ: Դա շատ կարևոր բան է, երբ մարդ իր մասնագիտության մեջ, գործի մեջ ինչ մտածել է, ինչ Աստված իրեն տվել է, փորձում է 100%-անոց անել, լավ անել։

Citylife.am- Եթե փորձենք ամփոփել ձեռքբերումները, ապա ի՞նչ ունի այսօր Սոնա Ռուբենյանը։

Սոնա– Ունեմ ինչ-որ բաներ, բայց դրանք չեմ համարում հիմնական: Կհամարեմ հիմնական մի 50 տարի անց, երբ կտեսնեմ ետևում թողած մե՜ծ ձեռքբերումներ, բայց էլի չեմ դադարի երգել։ Կարծում եմ՝ ամեն ինչ առջևում է, չեմ ուզում խոսել ունեցածի մասին, դրանք բոլորն էլ տեսնում են: Հանդիսատեսը լավ գիտի ամեն ինչ, կփորձեմ աշխատել և անել ավելին, որ հետագա աշխատանքներս շատ ավելի հիմնական ու կայուն լինեն։

Citylife.am-Ցանկանում ենք Ձեզ նորանոր ձեռքբերումներ, բարձունքներ, և այն ուժը, եռանդն ու լավատեսությունը, որը կա Ձեր մեջ՝ թող լինի հարատև: Շնորհակալություն բազմաբովանդակ հարցազրույցի համար։

Սոնա– Ձեզ էլ շնորհակալություն հետաքրքիր հարցերի համար։