Անելիք ունենք, որպեսզի Սահմանադրությունը, որպես իրավագիտակցության ողնաշար, լինի առավել կայուն. Հովհաննես Սահակյան

Հայաստանի Հանրապետական կուսակցության անդամ Հովհաննես Սահակյանը Tert.am-ի հետ զրույցում անդրադառնալով այսօր նշվող Սահմանադրության օրվան՝ ներկայացրեց նոր Սահմանադրության ամբողջական կյանքի կոչելու ժամանակացույցը: «Սահմանադրության նոր դրույթները ամբողջական ուժի մեջ է մտնելու և կյանքի է կոչվելու 2018 թվականի ապրիլից հետո: Այժ գործում է Ազգային ժողովին նվիրված գլուխները, որոնք կարգավորում են ԱԺ-ի գործունեությունը, իսկ Հանրապետության նախագահի պաշտոնավարման ժամկետի ավարտից հետո կգործեն մյուս հոդվածները, որոնք կարգավորելու են կառավարություն-Ազգային-կառավարություն, Ազգային ժողով-նախագահ, Նախագահ- կառավարություն իրավահարաբերությունները»,-ասաց նա:

Հիշեցնենք, որ  Սահմանադրությունն ընդունվեց 1995 թ. հուլիսի 5-ին համաժողովրդական հանրաքվեով։ Սահմանադրության ընդունումից հետո հուլիսի 5-ը դարձավ պետական տոն՝ Սահմանադրության օր։ 2001 թ. ՀՀ անդամակցությունը Եվրոպայի խորհրդին անհրաժեշտություն առաջացրեց որոշակի փոփոխություններ մտցնելու Սահմանադրությունում։ Սակայն 2003 թ. հանրաքվեի դրված սահմանադրական փոփոխությունների նախագիծը չընդունվեց։ Փոփոխությունների հաջորդ նախագիծը հանրաքվեի դրվեց 2005 թ. նոյեմբերի 27-ին և ընդունվեց։ 2015 թվականի դեկտեմբերին տեղի ունեցավ Սահմանադրության փոփոխությունների հանրաքվե, որով անցում կատարեցինք խորհրդարանական համակարգի:  

Հովհաննես Սահակյանը նշեց, որ  Ազգային ժողովն ընտրվել է նոր կարգով և ընդդիմությանը տրվել է ԱԺ նախագահի մեկ տեղակալ ունենալու հնարավորություն: «Պարզ է, որ ընդդիմությունը դժգոհելու է, որ իրեն քիչ հնարավորություններ է տրված Ազգային ժողովում, սակայն մենք ամեն ինչ պետք է նայենք համեմատության մեջ և հասկանանք, որ այն գործառույթները, որոնք տրված են, նախ և առաջ պետք է կյանքի կոչել, այսինքն` օգտվել դրանցից: Կառավարության գործունեության վերահսկողության մի քանի մեխանիզմներ կան, առաջինը քննիչ հանձնաժողովն է: Ցանկացած հարց, որը Ազգային ժողովի լիազորությունների տիրույթում է և հանրային հետաքրքրություն է ներկայացնում Ազգային ժողովի մեկ քառորդը, նշանակում է ընդդիմությունն ինքն իր ուժերով, ի վիճակի է ձևավորել քննիչ հանձնաժողով և քննության առարկա դարձնել»,-ասաց նա:

Ինչ վերաբերում է հարցին, թե մենք արդյոք Սահմանադրական երկիր կարող ենք մեզ համարել և որքանով դրան նպաստեց նոր Սահմանադրությունը, Հովհաննես Սահակյանն ասաց, որ այդ հարցը մի շարք ենթաշերտեր է պարունակում: «Մենք անցել ենք բավականին երկար ճանապարհ, ամեն ինչ արել ենք օրենքի գերակայության համար, որպեսզի բոլորը օրենքի առաջ հավասար լինեն, սակայն դեռ շատ անելիք ունենք»,-ասաց նա:

Չնայած դրան՝ նախկին պատգամավորը նշեց, որ երբ հետադարձ հայացք ենք նետում, մասնավորապես ընտրական պրոցեսների վրա, ապա տեսնում ենք, որ մի քանի քայլ առաջ ենք, եթե համեմատենք նախկինում եղած հետընտրական պրոցեսների հետ: «Իշխանության կամքը, օրենսդրական կարգավորումները և հանրության ընկալումները, կարծես թե, այս ընտրություններում մի քանի քայլ առաջ էր: Իհարկե, մենք անելիք ունենք, որպեսզի Սահմանադրությունը, որպես մեր օրենսդրության մեր կարգավորման, իրավագիտակցության ողնաշար լինի, առավել կայուն, ունակ լինի կարգավորելու ցանկացած հարաբերություններ ցանկացած իրավիճակներում, որպեսզի ցնցումներ, Սահմանական ճգնաժամեր չլինեն: Կարծում եմ, որ ինչի մասին մենք պատկերացնում ենք, որ մոտ ապագայում տեղի կունենա»,-ասաց նա և նշեց , որ պետք է բոլորով աջակցենք, որ կայանա այդ ամենը: