Միջազգային հանրությունը պետք է ոչ միայն արձագանքի ադրբեջանական գործողություններին, այլ փորձի կանխարգելել դրանք. Էդուարդ Շարմազանով

ՀՀԿ գործադիր մարմնի նիստում քննարկվել է ՀՀ ներքին ու արտաքին քաղաքականությունն, ինչպես նաև ԱԺ արտահերթ նիստի օրակարգը. այս մասին լրագրողների հետ հանդիպմանը հայտարարեց ՀՀԿ խոսնակ, ԱԺ փոխնախագահ Էդուարդ Շարմազանովը:

Վերջինս անդրադարձավ նաև հայ-ադրբեջանական շփման գծում տիրող վերջին իրադարձություններին և չբացառեց, որ Ադրբեջանի ակտիվությունը կարող է կապված լինել նաև «Մեծ քսանյակի» գագաթաժողովի հետ: Շարմազանովը շեշտեց՝ Ադրբեջանի ապակառուցողական, ահաբեկչական գործողությունները հուշում են, որ նրանք Արցախի հիմնախնդրի շուրջ տարվող բանակցություններում փակուղու մեջ են հայտնվել:

«Ադրբեջանը չի կարողանում քաղաքական կամք գտնել և սկսել կատարել Վիեննայի և Սանկտ Պետերբուրգի հանդիպման ժամանակ  ձեռք բերված պայմանավորվածությունները: Այս պատճառով սկսում է առիթներ փնտրել ու արհեստականորեն լարում է իրավիճակը շփման գծում»,- ասաց նա:

Շարմազանովը պնդեց՝  սահմանային լարվածության հետևանքով բոլոր զոհերի, այդ թվում՝ խաղաղ բնակչության շրջանում ունեցած զոհերի քաղաքական պատասխանատուն, գլխավոր մեղավորը Ադրբեջանի քաղաքական ղեկավարությունն է:

«Ադրբեջանը սեփական քաղաքացիներին դարձրել է վահան, այնուհետ թաքնվել մանկահասակ երեխայի թիկունքում՝ փորձելով թաքցնել սեփական ահաբեկչական էությունը: Ադրբեջանը բանակցային գործընթացում փակուղու մեջ է,  նրա նպատակն է միջազգային հանրությունից ստանալ գնահատական: Մենք տեսնում ենք, որ ԵԱՀԿ Մինսկի խմբի հայտարարությունները, միջազգային մեր գործընկերների գնահատականները բավականին հավասարակշռված են»,- շարունակեց Շարմազանովը:

ԱԺ փոխնախագահը չբացառեց, որ Ադրբեջանը կարող է օգտվել օրերս տեղի ունեցած դեպքերից, երբ իրենք էլ ունեցան քաղաքացիական զոհեր, նոր շոու սարքել: Նա ևս մեկ անգամ բոլորին՝ այդ թվում միջազգային հանրությանը հիշեցրեց, որ հայ-ադրբեջանական շփման գծի լարվածության, քաղաքացիական զոհերի միակ պատասխանատուն Ադրբեջանի ռազմաքաղաքական ղեկավարությունն է:

«Ասել եմ ու կասեմ, որ ապակե տան մեջ ապրողը դիմացինի վրա քար չի նետում, հակառակ դեպքում իր տուն էլ կքանդվի: Եթե միջազգային հանրությունը ձգտում է կայունության, ապա Ադրբեջանից պետք պահանջի, որ նրանք ներդնեն վստահության մեխանիզմները, որի մասին պայմանավորվել են Վիեննայի և Սանկտ Պետերբուրգի հանդիպումների ժամանակ: Հրաժարվում է կատարել այն կողմը, որը խախտում է զինադադարի պայմանագիրը»,- ընդգծեց ԱԺ փոխխոսնակը:

Շարմազանովը նաև հնարավոր համարեց այն սցենարը, որ Ադրբեջանի ագրեսիվ պահվածքի հիմքում կարող են լինել բուլղարական լրատվամիջոցների բացահայտումները, ըստ որոնց, Ադրբեջանն ինքնաթիռներով զենք է մատակարարել ահաբեկիչներին: Նա նկատեց աշխարհը պատերազմ է հայտարարել «Իսլամական պետություն» ահաբեկչական խմբավորմանը և ընդհանարապես ահաբեկչությանը, իսկ Ադրբեջանը զենք է մատակարարում նրանց:

«Միջազգային հանրությունը պետք է բացատրություն  պահանջի Ադրբեջանից, կամ հետաքննություն սկսի: Թեպետ Ադրբեջանի ահաբեկչական բնույթն ինձ համար նորություն  չէ, քանի որ դեռևս 90-ականների սկզբին ադրբեջանական զորքերում կռվել Չեչնիայում, Աֆղանստանում կռված ահաբեկիչները»,- հավելեց Էդուարդ Շարմազանովը:

ՀՀ խոսնակի գնահատմամբ՝ ժամանակ է, որ միջազգային հանրությունը ոչ միայն արձագանքի ադրբեջանական գործողություններին, այլ փորձի կանխարգելել դրանք: