Հայաստանում բիզնես սկսելն ու վարելն ավելի հեշտ է, քան աշխարհի 152 երկրներում. Սուրեն Կարայան

ՀՀ տնտեսական զարգացման և ներդրումների նախարարությունը ներկայացրել էր ՀՀ կառավարության մաս կազմող նոր ծրագիրը, որը հռչակում է առաջիկա 5 տարիների ընթացքում տնտեսական ոլորտում կառավարության կարճաժամկետ և միջնաժամկետ նպատակադրումները: Նախարարության ծրագրի, անելիքների և այլ հարցերի շուրջ Tert.am-ը զրուցել է ՀՀ տնտեսական զարգացման և ներդրումների նախարար Սուրեն Կարայանի հետ: 

-Պարո՛ն Կարայան, որպես Ձեր կառավարության ձեռքբերում՝ հաճախ ներկայացնում են արտահանման տեմպերը: Ի՞նչ ծրագրեր կան առաջիկա տարիների համար: Տնտեսական աճի տեսլականը ո՞րն է:  

-Նախ այն մասին, թե ինչպես եմ տեսնում արտահանման վրա հիմնված տնտեսական աճի տեսլականի իրագործումը: Քաղաքականության ելակետն այն իրողությունն է, որ նախորդող փուլում ստեղծվել են միանգամայն տպավորիչ նախադրյալներ` արտահանման արդյունավետ շուկաներ արտոնյալ մուտք ապահովելու տեսանկյունից: Կայացված որոշումները ինտեգրացիոն սխեմաներին անդամակցելու և երկկողմ մակարդակում շուկաներ թիրախավորելու մասով արդեն ամուր հիմք են ծառայում այդ շուկաներում առավել ագրեսիվ և համարձակ մրցակցելու համար: Մեծ իմաստով՝ ռազմավարական նվաճումները ամրապնդելու ենք մարտավարական ձեռքբերումներով: 

-Հենց այդտեղ ո՞րն է լինելու ձեր գործողություների վեկտորը: 

-Այստեղ մեր գործողությունների վեկտորն առավել քան հստակ է: ԵԱՏՄ շրջանակներում ունենք արտահանման միանգամայն նշանակալի առաջընթաց, ինչը դինամիկ կերպով արտահայտվում է պաշտոնական վիճակագրությամբ: Այս ուղղությամբ աշխատանքներն ընթանում և առաջիկայում ընթանալու են վարչարարական խոչընդոտները հաղթահարելու, առավել սերտ և կայուն գործընկերային կապեր հաստատելու, խթանման առավել արդյունավետ մեխանիզմներ ներդնելու համար: Միջոցառումների փաթեթը ներառում է, օրինակ` ԵԱՏՄ երկրների պետական գնումների համակարգերում հայկական արտադրանքի մասնակցությանն օժանդակությունը, գազի, էլեկտրաէներգիայի և տրանսպորտի միասնական շուկաների ձևավորումը, ծառայությունների միասնական շուկայի ընդլայնումը, ոսկերչական իրերի հարգադրոշման փոխճանաչելիության ապահովումը ԵԱՏՄ երկրներում, ադամանդի հումքի աղբյուրների դիվերսիֆիկացումը և առկա աղբյուրներից հումքի ձեռքբերման առավել արդյունավետ պայմանների ձևավորումը և այլն:

-Կառավարության ծրագրով ի՞նչ է հասցեագրված գործարար միջավայրի շարունակական բարելավման անհրաժեշտությանը: Բացի այդ, ի՞նչ արդյունք կա այս պահին: 

-Կարծում եմ՝ բոլորին հայտնի են Համաշխարհային բանկի «Գործարարությամբ զբաղվելը» վարկանիշային գնահատմամբ մեր տպավորիչ ձեռքբերումները: Ըստ 190 երկրներում ամեն տարի իրականացվող գնահատման արդյունքների, այսօր Հայաստանում բիզնես սկսելն ու վարելն ավելի հեշտ է, քան աշխարհի 152 երկրներում։ 
 
-Ի՞նչ չափանիշներ են այդտեղ հաշվի առնվում, ինչպե՞ս է կատարվում հաշվարկը: 

-Դա չափվում է՝ բիզնես հիմնելու, այդ նպատակով՝ անհրաժեշտ արտադրական ենթակառուցվածքներ կառուցելու և դրանց առնչվող իրավունքների պետական գրանցման, բիզնեսի ընդլայնման համար անհրաժեշտ ֆինանսական միջոցներ ներգրավելու, բիզնես վարելու ընթացքում արտաքին տնտեսական գործունեությունը կանոնակարգող ընթացակարգերի, հարկերի հաշվարկման և հաշվետվությունների մեխանիզմների մրցունակությամբ։ Մեր նախատեսած միջոցառումների իրականացման արդյունքում կնվազի պետական և համայնքային մարմինների հետ շփման վարչարարական բեռը, կկրճատվեն կոռուպցիոն ռիսկերը, կբարձրացվի գործարարներին ծառայություններ մատուցող մարմինների գործունեության թափանցիկությունը: Արդյունքում` ակնկալվում է նաև Համաշխարհային բանկի «Գործարարությամբ զբաղվելը» զեկույցում այլ հավասար պայմաններում ՀՀ դիրքը բարելավել 12 կետով: