ԵՄ-ի ղեկավարները փորձեցին փախստականների խնդրի լուծում գտնել

 Եվրամիության գագաթնաժողովում միավորման ղեկավարները պայմանավորվել են մի շարք միջոցներ ձեռնարկել Մերձավոր Արեւելքից փախստականների խնդրի լուծման նպատակով: Մասնավորապես, սահմանների պահպանության Frontex գործակալությունը այն մարդկանց վտարելու լիազորություններ կստանա, ովքեր ապաստանի հավակնելու իրավունք չունեն: Այդ մասին, ինչպես տեղեկացնում է «Արմենպրես»-ը՝ հղում անելով Associated Press-ին, հայտարարել է Եվրախորհրդի նախագահ Դոնալդ Տուսկը:

Ֆրանսիայի նախագահ Ֆրանսուա Օլանդն առաջարկել է ԵՄ-ի կողմից օգնություն ցույց տալ փախստականներին ընդունող երկրներին, այդ թվում՝ Թուրքիային, Հորդանանին, Լիբանանին: Մասնավորապես, ինչպես հաղորդել է Reuters-ը, Եվրամիությունը Թուրքիային 3 մլրդ եվրո եւ այցագրային ռեժիմի դյուրացման հեռանկար է խոստացել այդ հարցում Անկարայի օգնության դիմաց:

Իրենց հերթին Հունգարիայի իշխանությունները հայտարարել են, որ Խորվաթիայի հետ սահմանում ավարտվում է փշալարերով արգելապատնեշի կառուցումը, եւ մոտ ժամանակներս որոշում կընդունվի սահմանի այդ տեղամասը փակելու վերաբերյալ՝ խոչընդոտելու փախստականների ազատ ներթափանցումը երկիր:

ԵՄ-ի գագաթնաժողովը հաստատել է հանրակցության սահմանակից երկրներում միգրանտների տեսակավորման կենտրոնների ստեղծումը: Այդ մասին հայտնել է Ֆրանսիայի նախագահ Ֆրանսուա Օլանդը՝ ելույթ ունենալով գագաթնաժողովի արդյունքներին նվիրված մամուլի ասուլիսում:

«Մենք հաստատեցինք փախստականների ընդունման ու տեսակավորման կենտրոնների ստեղծումը, որոնք կզբաղվեն նրանց գրանցմամբ, ապաստանի տրամադրմամբ, ինչպես նաեւ այն անձանց վերադարձմամբ, ովքեր ապաստանի իրավունք չունեն»,- ասել է Օլանդը, հավելելով, որ վեց նման կենտրոն արդեն կառուցվում է Իտալիայում, եւս մի քանիսը՝ Հունաստանում, մասնավորապես, Լեսբոս կղզում: