Արչի Գալենցն այցելել է Սփյուռքի նախարարություն

ՀՀ սփյուռքի նախարար Հրանուշ Հակոբյանը հուլիսի 7-ին ընդունեց նկարիչ, «Գալենց» մշակութային հիմնադրամի հոգաբարձուների խորհրդի անդամ Արչի Գալենցին: Նա ապրում և ստեղծագործում է Բեռլինում, Մոսկվայում, Երևանում։ Այս մասին «Արմենպրես»-ին տեղեկացրին ՀՀ սփյուռքի նախարարության մամուլի և հասարակայնության հետ կապերի վարչությունից:

Ողջունելով հայազգի արվեստագետին՝ նախարարը կարևորեց հայ մշակույթի պահպանմանն ու տարածմանն ուղղված նրա ազգասիրական գործունեությունը համայնքում և Հայրենիքում: Մասնավորապես անդրադառնալով  հայտնի արվեստագետի վերջին ցուցահանդեսներին, որոնք յուրօրինակ հարթակ են հայ արվեստագետներին Եվրոպայում ճանաչելի դարձնելու համար:

Քննարկվեցին Սփյուռքում հայկական ինքնության պահպանմանը, երիտասարդների հայեցի կրթության անհրաժեշտությանը վերաբերող հարցեր, անդրադարձ կատարվեց սփյուռքի նախարարության հետ գործակցության աշխուժացմանը: Անդրադարձան նաև «Դու ինչ ես անում Արցախի համար» շարժման շրջանակներում Արցախի արվեստագետների վերջերս կազմակերպված ցուցահանդեսին և գերմանահայերի միության Արցախին տրամադրած օգնությանը:

Արչի Գալենցը շնորհակալություն հայտնեց ջերմ ընդունելության համար, նշեց որ Հայաստանում մշակութային կյանքը հարուստ է կարևոր և նշանակալի իրադարձություններով: Նշեց, որ Հուլիսի 7-ին Ժամանակակից արվեստի թանգարանու կբացվի իր՝ «Ժամանակացույց. Խուսափելով աղետից» խորագիրը կրող անհատական ցուցահանդեսը, որը կտևի մինչև հուլիսի 16-ը։ «Նախագիծը՝ ցուցադրություն-ինստալյացիա է, ներկայացված իր զարգացման ընթացքի մեջ։ Կցուցադրվի իմ ստեղծագործության վերջին 13 տարիների արդյունքը, ինչպես նաև նոր աշխատանքներ՝ օբյեկտներ-«դրոշներ», որոնք ստեղծված են հատուկ այս ցուցահանդեսի համար՝ կոչ անելով Հայաստանի և սփյուռքի ստեղծագործող հանրությանը միավորվելու անկախ ասոցիացիայի ներքո, որը հնարավորություն կտա հայկական արվեստի միասնական հարթակ ունենալ». հավելեց նա: