Ամուլսարի ոսկու հանքի շինարարության շրջանակներում Հայաստանում ստեղծվել է ավելի քան 750 աշխատատեղ

«Լիդիան Արմենիա» ընկերության Ամուլսարի ոսկու հանքի 2018 թվականին ավարտվող շինարարության արժեքը կկազմի 370 մլն ԱՄՆ դոլար:

«Արմենպրես»-ի հաղորդմամբ` հանքի շինարարության շրջանակում Հայաստանում արդեն իսկ ստեղծվել է ավելի քան 750 աշխատատեղ: Առավելագույն 1300 աշխատատեղ նախատեսվում է ստեղծել շինարարության ամենաակտիվ փուլում՝ այնուհետև ապահովելով 700 մշտական աշխատատեղ՝ հանքի շահագործման 10 տարում:

Հայաստանում Ամերիկյան առևտրային պալատի (AMCHAM) խորհրդի անդամները hուլիսի 5-6-ին  այցելել են Վայոց Ձորի և Սյունիքի մարզեր:

Նրանք եղել են «Լիդիան Արմենիա» ընկերության Ամուլսարի ոսկու հանքի շինարարության հրապարակում և բացահանքերի տարածքում, ինչպես նաև  ContourGlobal-ի հիդրոկասկադում (Որոտանի հիդրոէլեկտրակայանների համալիր)` Սյունիքի մարզում:
Հայաստանում Ամերիկյան առևտրային պալատը տարբեր ոլորտների ավելի քան 100 բիզնես կազմակերպություններ միավորող առաջատար միություն է: Իսկ պալատի Խորհրդի անդամները ներկայացնում են Հայաստանում ԱՄՆ կապիտալով գործող առաջատար ընկերություններին: 
Lydian International Limited-ի դուստր ընկերություն հանդիսացող «Լիդիան Արմենիա» ընկերությունն ու ContourGlobal-ը ներկայումս Հայաստանի տնտեսությունում ամերիկյան խոշորագույն ներդրումն ապահովող ընկերություններն են:
Lydian International Limited ընկերությունը ցուցակված է Տորոնտոյի ֆոնդային բորսայում, գրանցված է Միացյալ Թագավորությունում և Ամուլսարի ոսկու հանքի ծրագրի ֆինանսավորմանը մասնակցող խոշոր ամերիկյան ֆոնդերի մասնակցությամբ Հայաստանում ամենամեծ ամերիկյան ներդրումն է: Ամուլսարի հանքի 2018 թ. ավարտվող շինարարության արժեքը կկազմի 370 մլն ԱՄՆ դոլար: 
ContourGlobal ընկերությունը զբաղվում է ջերմակայանների և վերականգնվող էներգիայի ծրագրերի նախագծմամբ և շահագործմամբ: Ընկերությունը տնօրինում, տիրապետում և շահագործում է մոտ 4,000 մեգավատ ընդհանուր սահմանված հզորությամբ 62 էներգակայան, որոնք գտնվում են 20 երկրներում և 3 մայրցամաքներում: Ընկերությունն ունի BBB միջին կշռված սուվերեն վարկանիշ և գործունեության ընթացքում կիրառում է տարբեր տեսակի վառելիք, տեխնոլոգիաներ և սարքավորումներ:    
2015թ. հուլիսին, տեղական դուստր ընկերություն հանդիսացող «Կոնտուր Գլոբալ հիդրո կասկադ» ՓԲ ընկերության կողմից ձեռք բերվեց «Որոտանի հիդրոէլեկտրակայանների համալիր» ՓԲԸ, որը 404.2 մեգավատ ընդհանուր հզորությամբ երեք հիդրոէլեկտրակայանների համալիր է, որը տարեկան կտրվածքով արտադրում է միջինը 1.16 մլրդ կվտ/ժամ էներգիա:
Դեսպան Ռիչարդ Միլսն ու AMCHAM-ի  Խորհրդի անդամներն այցելեցին Ամուլսար ծրագրի շինարարության հրապարակ և մոտակա Գնդեվազ համայնքը, որտեղ ծանոթացան Լիդիանի աջակցությամբ իրականացվող փոքր և միջին բիզնեսի զարգացման ծրագրերին: 2006 թվականին Ամուլսարում հետախուզական աշխատանքներ սկսելուց հետո Լիդիանի ներդրումները Ամուլսարի մոտակա համայնքների սոցիալ-տնտեսական զարգացման ծրագրերում կազմել են ավելի քան 3 մլն ԱՄՆ դոլար: Երկօրյա այցելությունն ավարտվեց Որոտանի Համալիրի այցով:
Դեսպան Ռիչարդ Միլսը խոսեց Հայաստանի տնտեսական զարգացման համար ուղղակի օտարերկրյա ներդրումների կարևորության մասին: «Ամուլսարի ծրագրում «Լիդիանի» և Որոտանի հիդրոկասկադում «Կոնտուր Գլոբալի» ներդրումները եղել են վերջին տարիների խոշորագույն օտարերկրյա ներդրումները Հայաստանում: Այս ներդրումների հաջողությունը ի ցույց է դնում գործարար դաշտում հավասար պայմանների ապահովման և նպաստավոր ներդրումային միջավայր ձևավորելու Հայաստանի կառավարության հանձնառության կարևորությունը: Ես հատկապես ուրախ եմ նկատել, որ այս ներդրումներով Հայաստանում ոչ միայն տնտեսական հնարավորություններ են ձևավորվում, այլ նաև ի հայտ է գալիս կորպորատիվ սոցիալական պատասխանատվության նոր մշակույթ: Արդյունահանող ճյուղերի թափանցիկության նախաձեռնությանը Հայաստանի անդամակցությանը որպես աջակից՝ մենք հուսով ենք, որ Ամուլսարի հանքավայրում ոսկու կորզման աշխատանքները նոր ուղենիշ կդառնան Հայաստանի հանքարդյունաբերության ոլորտում՝ թափանցիկության, բնապահպանական ու սոցիալական պատասխանատվության և արդյունավետ կառավարման հարցերում», - ասաց դեսպան Միլսը: 
«Լիդիան Արմենիա» ընկերության գործադիր տնօրեն և AMCHAM-ի Խորհրդի անդամ Հայկ Ալոյանն իր խոսքում շնորհակալություն հայտնեց դեսպան Միլսին և AMCHAM-ի Խորհրդին կատարած այցելության համար:

 «Լիդիան ընկերությունը պարտավորվել է Ամուլսարի ծրագիրն իրագործել միջազգայնորեն ընդունված լավագույն մեթոդներով և բնապահպանական ու սոցիալական կառավարման ամենաբարձր չափանիշներով: Մենք հուսով ենք, որ կկարողանանք ապացուցել, ինչպես հանքի շինարարության, այնպես էլ շահագործման ընթացքում, որ սոցիալական տեսանկյունից պատասխանատու բիզնես իրականացնելը ոչ միայն հնարավոր է, այլև շահավետ է Ընկերության համար: Մենք հավատացած ենք, որ Լիդիանի և Contour Global-ի Հայաստանում կատարած ներդրումները կնպաստեն Հայաստանի ճանաչմանը միջազգային ներդրումային շուկայում և կարող են գրավել ավելի շատ ներդրումներ՝ ի շահ մեր երկրի»,- նշեց Ալոյանը:
AmCham-ի նախագահ  և «Կոնտուր Գլոբալ հիդրոկասկադ» ՓԲԸ-ի գլխավոր տնօրեն Արա Հովսեփյանն ասաց, որ անչափ կարևոր է գիտակցել Լիդիանի և ContourGlobal ընկերությունների կողմից կատարված ներդրումների կարևորությունը Հայաստանի տնտեսության համար:

«Խոսքը ոչ միայն ֆինանսական արդյունքի, այլ առաջին հերթին աշխատանքային մշակույթի, առողջության և  անվտանգության բարձր չափանիշների, թափանցիկության և օրենքի շրջանակներում գործելու և կայուն սոցիալական զարգացման ծրագրերին աջակցելու մասին է: Սա հենց այն արժեքներն են, որոնք Lydian և ContourGlobal ընկերությունները պատրաստ են խթանելու Հայաստանի տնտեսությունում գալիք տարիների ընթացքում»,- ընդգծեց «Կոնտուր Գլոբալ հիդրոկասկադ»  ՓԲԸ-ի գլխավոր տնօրենը: