Բրիտանիայում գտել են ահաբեկչության գլխավոր հովանավորին

Սաուդյան Արաբիան Մեծ Բրիտանիայում իսլամական ծայրահեղականության գլխավոր օտարերկրյա հովանավորն է: Այս միանշանակ պնդումը վերցված է Քեմբրիջի համալսարանում ձևավորված Henry Jackson Society բրիտանական վերլուծական կենտրոնի զեկույցից, որն, ինչ–որ առումով, կարելի է նաև կառավարական դիրքորոշում դիտարկել: Ի վերջո, 2005–ին հիմնված և միջազգային հարցերում մասնագիտացված այս համայնքը չնայած երկուսակցական է, սակայն, դրանում գերակշռում են պահպանողական թորիները, որոնք, փաստորեն, համոզված են Բրիտանիայում Արաբիայի կողմից իսլամական ծայրահեղականության տարածման, նման խմբավորումների ֆինանսավորման, ռադիկալ իսլամական քարոզիչների ու ջիհադականների գործունեությանն աջակցելու հարցում: Ավելին՝ նրանք կոչ են անում հանրային հետաքննություն անցկացնել` պարզելու Սաուդյան Արաբիայի և Պարսից ծոցի այլ երկրների կապը Բրիտանիայում գործող ծայրահեղականների հետ, ինչը Լոնդոնում Արաբիայի դեսպանությունը բացարձակ կեղծիք է որակել: Վերջինս իր հայտարարության մեջ նշել է, թե տարիներ շարունակ Արաբիան ի՛նքն է Ալ–Քաիդայի, ԴԱԻՇ–ի և բազում ահաբեկչական խմբավորումների թիրախ հանդիսացել: Ավելին՝ դիվանագիտական ծառայությունում խոստացել են, թե Արաբիան չի հանգստանա, քանի դեռ այդ աննորմալներն ու նրանց խմբավորումները երկրի երեսից չեն վերացել:

Ի դեպ, Մեծ Բրիտանիայի ներքին գործերի նախարարությունը դեռ Լեյբորիստների կառավարության և Դեվիդ Քեմերունի վարչապետության տարիներին՝ 2015–ին էր սկսել երկրում ջիհադիստական կազմակերպությունների գործունեության ու ազդեցության վերաբերյալ զեկույց կազմել, որն այդպես էլ չդարձավ հանրության սեփականությունը: Քննադատները նշում են, թե այն, հնարավոր է, վատ վիճակի մեջ է դնում կառավարությանը, որը երկար տարիներ սերտ դիվանագիտական հարաբերություններ և ամուր տնտեսական կապեր ունի Ծոցի երկրների ու հատկապես Սաուդյան Արաբիայի հետ: Հետևաբար, եթե այժմ Henry Jackson Society–ը նման զեկույց է հրապարակել՝ մանրամասն արտացոլելով, թե ինչպես է սաուդյան վահաբականությունը արմատներ գցում Բրիտանիայում, մենք պիտի, ձեզ հետ միասին, երկու հետևություն անենք. կամ վարչապետ Մեյի համբերությունը սպառվել է, և նա որոշել է առայժմ անուղղակիորեն բարձրաձայնել խնդիրը, կամ թորիների ներսում կառավարության գաղտնասիրությանն ընդդիմացող մի ֆրակցիա կա, որն ինքն է փաստի առաջ կանգնեցրել Մեյին:

Երկու դեպքում էլ նրան չես նախանձի: Հատկապես, եթե կանխատեսելու լինենք վերջերս անընդհատ ահաբեկչության առջև կանգնող բրիտանացիների արձագանքը, թե՝ սեփական կառավարությունը գիտի և թաքցնում է զինված ահաբեկչությանը ծնունդ ու սնունդ տվող աղբյուրներին: Նշենք նաև, որ զեկույցին, տարօրինակ կերպով, հավանություն են տվել հատկապես վերջին տարիներին մեծ թափով Henry Jackson Society–ից հեռացած լեյբորիստները, որոնք այժմ կառավարությանը կոչ են արել գործածել պետության բոլոր միջոցները՝ բրիտանացիներին զինված ահաբեկչությունից պաշտպանելու համար: Հիշեցնենք նաև, որ վերջին նախընտրական արշավում Լեյբորիստների առաջնորդ Ջերեմի Քորբինը պահանջել էր դադարեցնել Սաուդյան Արաբիային զենքի մատակարարումը, իսկ կուսակցությունն ընդհանրապես սուր քննադատության էր ենթարկել այդ երկրի հետ ռազմական պայմանագիր կնքած՝ ԱՄՆ նախագահ Դոնալդ Թրամփին, որն իր նկատմամբ ձևավորված բացասական մթնոլորտում չեղարկեց իր լոնդոնյան այցը:

 

Գոհար Սիմոնյան