Գյումրիում անցկացվեց «Family Fest»

Կիրակնօրյա հանգիստը ողջ ընտանիքով անցկացնելու գաղափարը քաջալերելով՝ հուլիսի 9-ին երեկոյան Գյումրու «Կենտրոնական» զբոսայգում անցկացվեց «Family Fest» միջոցառումը։ Միջոցառումը կազմակերպվել էր «Հայաստանի երիտասարդ քաղաքացիներ» (ՀԵՔ) ծրագրի շրջանակում: 
Կազմակերպիչները հաշվի էին առել ամեն ինչ՝ և՛ այգի եկած երեխաների ու մեծահասակների խաղային ճաշակը, և՛ նրանց հյուրասիրության խնդիրը: Միջոցառման ժամանակ այգու տարբեր հատվածներում բակային և սեղանի տարբեր խաղերի մրցումներ էին, համերգ՝ «Տիեզերք» բենդի կատարմամբ, իսկ մութն ընկնելուն պես բացօթյա կինոդիտում, ինչպես նաև աստղադիտակով աստղերին հետևելու հնարավորություն:

«Նախաձեռնությունը երիտասարդներինն էր, նպատակը՝ ընտանիքներին և ընկերներին հավաքելով մի վայրում, նրանց օրը դարձնել հագեցած, ինչպես նաև մեկ օր նվիրելու հարազատ մարդկանց։ Վերջին տարիներին այնքան քիչ են ընտանիքներով մարդիկ նման հասարակական վայրեր այցելում, որ սա շատ լավ հնարավորություն է պարզապես կիրակնօրյա հանգիստը վայելելու»,- տեղեկացրեց «Հայաստանի երիտասարդ քաղաքացիներ» ծրագրի պատասխանատու Հերմինե Պապիկյանը: 
Նախաձեռնության շրջանակում իրականցվող բոլոր խաղերն ու հյուրասիրությունն անվճար էին: Այգու գրավչության համար երիտասարդները նաև գունավոր լուսավորություն էին անցկացրել այգում: Երիտասարդների վստահեցմամբ՝ նախատեսվածից կրկնակի անգամ ավելի այցելուների քանակն արդեն նախաձեռնությունը կրկնելու հիմք է:

«ՀԵՔ» ծրագիրն իրականացվում է «ԿԱԶԱ» շվեյցարական մարդասիրական հիմնադրամի կողմից՝ նպատակ ունենալով խթանել երիտասարդների ինքնավարությունը, նախաձեռնողականությունը և քննադատական մտածողությունը՝ դրանով իսկ նպաստելով Հայաստանում ավելի մասնակցային և ժողովրդավար հասարակության կերտմանը։ Ծրագիրը երիտասարդների հետ աշխատում է մի շարք ակումբների, երիտասարդական նախաձեռնությունների և հանրային միջոցառումների միջոցով:

Արմենուհի Մխոյան