Ռուսաստանը նոր պատժամիջոցների կիզակետում է

ՄԻՋԱԶԳԱՅԻՆ 12 Հուլիս, 2017 18:02

Ռուսական լրատվամիջոցները հասցրել են ԱՄՆ նախագահ Դոնալդ Թրամփին անլուրջ և երկդիմի մականուններով կնքել, որովհետև G20–ի շրջանակներում ՌԴ նախագահ Վլ. Պուտինի հետ «հրաշալի» որակված հանդիպումից անմիջապես հետո նա հավանություն է տվել Ռուսաստանի և Իրանի դեմ նոր պատժամիջոցների փաթեթին: Ըստ Սպիտակ տան օրենսդրական հարցերով ծառայության ղեկավար Մարկ Շորթի՝ վարչակազմը լիովին արդարացված է համարում պատժամիջոցները, թեպետ՝ փոքր–ինչ անհանգստացած է, որ հիշյալ նախագիծը դիրեկտիվային է և, ազգային անվտանգությունից ելնելով, բացառությունների սողանք չի թողնում իր համար: Ի դեպ, նա խուսանավել է հարցից, թե քննարկվե՞լ է արդյոք խնդիրը Թրամփ–Պուտին հանդիպման ժամանակ: Եվ դա այն դեպքում, երբ Սպիտակ տան մամլո քարտուղար Սառա Սանդերսը ժամեր անց հավաստիացրել է, որ պատժամիջոցների հարցն իրականում քննարկվել է, և փաստարկը, որ ներկայացվել է Պուտինին՝ ամերիկյան վերջին ընտրություններին ռուսական միջամտությունն է եղել:

Ուղիղն ասած՝ մենք մի անգամ չենք նկատել, որ ԱՄՆ քաղաքական շրջանակներին կես տարուց ավելի հիստերիայի մեջ գցած այս հարցը, որն այդպես էլ հստակ չի ապացուցվում կամ հերքվում, կատարելապես է հոգնեցրել բոլորին: Գերմանական մամուլը նույնիսկ գրեց, թե ինչ–որ պահի, փակ դռների հետևից, Համբուրգում նույնիսկ Պուտինի՝ ապացույցներ պահանջող գոռգոռոցն է լսվել, ինչից հետո Թրամփը ստիպված է եղել փոխել զրույցի թեման՝ առաջարկելով հարցի առնչությամբ երկուստեք սպասել նոր ապացույցների: Եվ ահա, նոր ապացույցների փոխարեն, մատուցվում է պատժամիջոցների մի նոր փաթեթ, որը դեռ հունիսի 15–ին էր ուղարկվել Սպիտակ տուն և հետ ուղարկվել Կոնգրես, որովհետև պետքարտուղար Ռեքս Թիլերսոնը այն սահմանադրությանը հակասող, նաև՝ Վաշինգտոնին դիվանագիտական ճկունություն հանդես բերելու և ՌԴ–ի հետ հարաբերությունները կարգավորելու հնարավորությունը բացառող էր ճանաչել:

Ստացվում է՝ այն այս ընթացքում, այնուամենայնիվ, լրամշակվել է, Սպիտակ տունն էլ Համբուրգից հետո հավանություն է տվել դրան, բայց այժմ էլ, վերջնական հաստատումից առաջ, դարձյալ քարկոծվում է: Washington Post, The Wall Street Journal հանդեսներն, օրինակ, երեկ հանդես եկան ծավալուն նյութերով, որոնցում ոչ այնքան երկու երկրների հարաբերությունների, որքան ամերիկյան նավթագազային ընկերությունների հնարավոր վնասների խնդիրն էին քննարկում: Ներկայացվում էր, որ այն դեպքում, երբ Թրամփը նույն եվրոպացիներին չկարողացավ համոզել հետ կանգնել Հյուսիսային հոսք 2 նախագծից, ամերիկյան ընկերություններին այժմ կզրկի բոլոր խոշոր նավթագազային ծրագրերում ներգրավվելուց: Նրանք առանց այդ էլ զրկված են ՌԴ–ում ներդրումներ անելու և խորհրդատվական ծառայություններ մատուցելու իրավունքից՝ գրում է WSJ–ն, նշելով, թե այս նոր փաթեթով ԱՄՆ–ն կգործի միայն Ռուսաստանի, Եվրոպայի և Չինաստանի օգտին, որոնք անչափ հետաքրքրված են ռուսների հետ նման նախագծեր իրականացնելու հեռանկարով:

Ի դեպ, հարցը մտահոգում է ոչ միայն մեդիային: ԱՄՆ արտաքին առևտրի ազգային խորհրդի փոխնախագահ Ռիչարդ Սավայան, օրինակ, հայտարարել է, որ նոր պատժամիջոցներն ընդամենը 10 տարվա ընթացքում մոտ 100 մլրդ եկամուտից կզրկեն ամերիկյան ընկերություններին: ՌԴ պետդումայի արտաքին հարաբերությունների հանձնաժողովի փոխնախագահ Ալեքսեյ Չեպան էլ չհամաձայնելով ասվածին՝ RT–ին հայտնել է, թե նախագիծը Կոնգրեսում ընդունվել է հենց այդ սեկտորի առանձին շրջանակի լոբբինգով, որտեղ շահագրգիռ են ԱՄՆ–ից Եվրոպա հեղուկ գազ արտահանելու և ՌԴ–ին այդ հնարավորությունից զրկելու հարցում:

Այդպես է, թե ոչ, չգիտենք, բայց ակնհայտ է, որ Թրամփ–Պուտին համբուրգյան հանդիպումը ոչ միայն նոր հնարավորություններ չբացեց երկու երկրների հարաբերությունների կարգավորման առջև, այլև, ինչպես տեսնում եք, առավել խտացրեց անվստահությունը նրանց նկատմամբ: ՌԴ–ում Թրամփն է անլուրջ և երկդիմի մեկը նկատվում, ԱՄՆ–ում էլ Պուտինն է ամեն չարիքի արմատ դիտարկվում, որն, իբր, նույնիսկ համբուրգյան հանդիպման ընթացքում է դավադրություն կազմակերպել, որին անձեռնհաս Թրամփը չի կարողացել տեղը տեղին դիմակայել:

Գոհար Սիմոնյան