Արարատյան մաքսատուն-վարչությունում բացվեց նոր աշխատաոճով սպասարկման սրահ

 Պետական եկամուտների կոմիտեի  կառուցվածքային փոփոխությունների շրջանակում նոր աշխատաոճն առավել արդյունավետ կազմակերպելու նպատակով Արարատյան մաքսատուն-վարչությունում բացվեց մասնագիտացված սպասարկման սրահ: «Արմենպրես»-ի հաղորդմամբ`քաղաքացին այլևս ստիպված չէ հարկից հարկ կամ սենյակից սենյակ գնալ, այլ նույն վայրում կատարում է գանձումներին առնչվող բոլոր գործառույթները:

Պետական եկամուտների կոմիտեի կառուցվածքային փոփոխությունների արդյունքում նախկինում գործող չորս` Արարատյան, Միջազգային ճանապարհային  փոխադրումների տարածաշրջանային, Ավտոտրանսպորտային միջոցների մաքսային ձևակերպումների, Ակցիզային հարկով հարկվող ապրանքների մասնագիտացված մաքսակետերը վերակազմակերպվել են, և դրանց գործառույթները բաշխվել են նորաստեղծ` Հյուսիսային, Հարավային, Արևելյան, Արևմտյան, Արարատյան մաքսատուն-վարչությունների վրա: Սպասարկման սրահի նոր աշխատաոճին ծանոթացավ Պետական եկամուտների կոմիտեի նախագահ Վարդան Հարությունյանը:

Արարատյան մաքսատուն-վարչության պետ Արմեն Սարգսյանը նշեց, որ, չնայած ավելացել են աշխատանքի ծավալները, սակայն աշխատակիցների գրեթե նույն քանակով Արարատյան մաքսատունը կարողանում է սպասարկել ողջ գործընթացը:

«Աշխատանքային պայմաններից ելնելով՝ շենքում առանձնացվեց հատուկ մասնագիտացված սպասարկման սրահ: Սրահն ապահովված է աշխատանքի համար անհրաժեշտ պայմաններով և ժամանակակից տեխնիկայով: Արարատյան մաքսատուն-վարչության նոր կարգավիճակի արդյունավետության մասին խոսում են նաև ցուցանիշները: Ընդհանուր առմամբ, 2016 թվականի հունվար-հունիս ամիսներին արձանագրված շուրջ 42 միլիարդ 300 միլիոն դրամի դիմաց` 2017 թվականի 6 ամսվա ընթացքում ապահովվել է 55 միլիարդ 200 դրամի մուտք, աճը կազմել է 12 միլիարդ 900 միլիոն դրամ»,- ընդգծեց Սարգսյանը:

Արարատյան մաքսատուն-վարչության գանձումների համակարգման և հաշվարման բաժնի մաքսային տեսուչ Դոնարա Մովսիսյանը նշեց, որ փոփոխությունները չեն խոչընդոտում իրենց  աշխատանքը:

«Աշխատանքն ընթանում է բնականոն ռիթմով: Բոլորին նորմալ սպասարկում ենք և հայտարարատուների կողմից որևէ դժգոհություն չի եղել»,- ասաց Մովսիսյանը: