Տարոն Մարգարյանը լավ տղա է, Առաքել Մովսիսյանին էլ պետք է խորապես ճաչանես, որ գնահատես. Գոռ Վարդանյանը՝ ՀՀԿ-ին համակրելու և առաջիկա անելիքների մասին

Երևանի քաղաքապետի խորհրդական Գոռ Վարդանյանը Tert.am-ի հետ զրույցում անդրադարձավ այդ պաշտոնին նշանակվելուց հետո հասարակության արձագանքին, նաև սպորտի բնագավառում առաջիկա անելիքներին: Վարդանյանը տեղին չհամարեց անցկացված զուգահեռները, թե ինքը կինոյում քննադատում է ցոփ ու շվայտ կյանքով ապրող իշխանավորներին, սակայն իրական կյանքում նրանց կողքին է: Նա նաև ասաց, որ համակրում է Հայաստանի Հանրապետական կուսակցությանը և պատրաստ է կանգնել կուսակցության կողքին։

-Պարո՛ն Վարդանյան, ինչպե՞ս ստացվեց, որ դարձաք Երևանի քաղաքապետ Տարոն Մարգարյանի խորհրդական: Ի՞նչ եք պատրաստվում անել քաղաքում սպորտային կյանքը զարգացնելու համար: 

-Նախ, շատ ուրախ եմ, զգացված և շատ մեծ պարտավորություն եմ վերցնում ինձ վրա, որ այս պաշտոնն առաջարկել է քաղաքապետը։ Դա ինձ համար պարտավորեցնող է առաջին հերթին, և շնորհակալ եմ վստահության համար իրեն: Իսկ թե ի՞նչ եմ պատրաստվում անել, բոլոր իմ ծրագրերը ժամանակի ընթացում աշխատանքով ցույց կտամ, այդ աշխատանքի իրականացման ժամանակ էլ անպայման լրագրողներին էլ կիրազեկեմ, որ դուք էլ տեսնեք և լուսաբանեք այն աշխատանքը, որ պետք է կատարվի իմ ղեկավարությամբ: Երևան քաղաքում համակարգելու եմ սպորտի աշխատանքը՝ նոր ծրագրերով, նոր մոտեցումներով, պետք է զարգացում ապահովենք: Այսպես ասեմ՝ սպորտային քաղաք պետք է լինի, ամբողջ նպատակս նա է, որ ակտիվացնեմ սպորտը:

-Հատկապես ուշադրություն կդարձնեք կարատե մարզաձևի՞ն:

-Ոչ, ոչ, եթե ես կարատեի մասնագետ եմ, դա չի նշանակում միայն կարատեին ուշադրություն պետք է դարձնեմ։ Չի կարելի նման բան ասել, որովհետև բոլոր սպորտային ղեկավարներն էլ ամեն մեկն ինչ-որ սպորտի մասնագետ է, եթե մեկը ըմբշամարտիկ է կամ ձյուդոիստ, դա չի նշանակում, որ միայն այդ ձևն է զարգացնելու: Հիմա այդ պաշտոնին լինելով՝ իրավունք չունես սուբյեկտիվ քո սպորտաձևը զարգացնել: Կարևորագույն պաշտոն է, և պետք է մտածել բոլորի մասին: 

-Իսկ հասարակության նման բուռն արձագանքը Ձեր նշանակման հետ կապված ինչո՞վ կբացատրեք։ 

-Բավական շատ շնորհավորանքներ եմ ստանում՝ թեկուզ ֆեյսբուքի էջերով, մտեք, տեսեք՝ հարյուրավոր մարդիկ ինձ շնորհավորել են։ Բայց մի խնդիր կա, չէ՞, մենք չենք սիրում իրար, և այն մարդիկ, ովքեր թեկուզ կեղծ էջերով պատվիրված քոմենթներ են գրում, դա իրենց գործն է, ինձ չի հետաքրքրում։ Եթե շատ են քննադատում, ուրեմն ինչ-որ բան ներկայացնում ես քեզանից: 

-Իսկ ֆիլմերի արտադրությամբ այլևս չե՞ք զբաղվի:

-Այս պահի դրությամբ պետք է ծրագրավորեմ այս աշխատանքը, եթե ժամանակ կլինի, չխանգարեն աշխատանքները մեկը մեկին, ժամանակը ցույց կտա, հիմա չեմ կարող պատասխանել: 

- Պարո՛ն Վարդանյան, Ձեր ֆիլմերում քննադատում եք ցոփ ու շվայտ կյանքով ապրող իշխանավորներին, սակայն, ստացվում է՝ նրանց կողքի՞ն եք: 

-Իմ կարծիքով՝ չկա այդպիսի մեկը, որ չպայքարի նման արատավոր երևույթների դեմ, եթե կան մարդիկ, որ ասում են՝ ես այդպիսի կյանքով ապրող մարդկանց կողքն եմ կանգնած, ես հակառակը կասեմ՝ ես նման մարդկանց չեմ ճանաչում, որ նրանց կողքը կանգնեմ: Ես չգիտեմ՝ ով ոնց է դա մեկնաբանում, բայց նման բան չի կարող լինել: 

-Այսինքն՝ չե՞ք կարծում, որ օրինակ՝ Առաքել Մովսիսյանը կամ Երևանի քաղաքապետը նման կյանքով են ապրում: 

-Նախ Տարոն Մարգարյանը շատ համեստ անձնավորություն է, շատ լավ տղա է, շատ լավ քաղաքապետ է և մեր քաղաքի և պետության համար շատ մեծ գործեր է անում և անելու է, խնդրում եմ նման կարգի մի դասեք: Իսկ Առաքել Մովսիսյանին, եթե ավելի խորապես ճանաչեք, կտեսնեք, որ դատարկ խոսակցություններ են: 

-Փաստորեն ճիշտ չէ՞ զուգահեռներ տանել ֆիլմի և իրականության մեջ: 

-Ոչ, ոչ, նա ֆիլմ է, իսկ ով որ ֆիլմի վատ կերպարներին վերցնում է իր վրա, ինքը պետք է մտածի:

-Պարո՛ն Վարդանյան, հաշվի առնելով, որ Դուք ընտրություններին ակտիվորեն աջակցում էիք հանրապետականներին՝ ներկա լինելով Առաքել Մովսիսյանի, Տարոն Մարգարյանի քարոզարշավներին, ինչո՞ւ ՀՀԿ-ական չեք դարձել:

-Ես համակրում եմ Հայաստանի Հանրապետական կուսակցությանը և իմ ամբողջ գործունեությամբ, այո՛, հավատում, ընդունում ու հարգում եմ և տեսնում եմ այն աշխատանքը, որ ՀՀԿ-ն է կատարում։ Պատրաստ եմ կանգնել իրենց կողքը և պետության կառուցման այս ժամանակահատվածում կազմակերպել և մասնակցել այդ գործընթացին: Թե ով ինչ ձև է մեկնաբանում, դա մեկնաբանողների խնդիրն է: Եթե կա որոշակի մի զանգված, որ բացասական է դա մեկնաբանում, հակառակը կա նաև՝ մեծ զանգված, որ համակիր է ՀՀԿ-ին, և չի կարելի նման ձևով արտահայտվել և հիմք ընդունել: Խնդրում եմ դրան էլ ուշադրություն դարձնեք: Ես Ձեզ հասարակ բան ասեմ, իմ ֆեյսբուքյան էջերի վրա վերջերս մի քանի մեր կինոյի դրվագներից դնում էի, և տարբեր մեկնաբանություններ էին գրում այնտեղ, չգիտեմ, մարդիկ, ովքեր սիրում են հանցագործ կյանքը կամ ովքեր սիրում են մեր հայ ազգը, ինչ ասես գրում էին, ես բանի տեղ չէի դնում: Մի քանի օր առաջ դրել եմ մեր Ղարաբաղի պատերազմի մասին ֆիլմը, մեկ քոմենթ է եղել, մի հատ թուրք մեր ազգին շատ վատ քոմենթ է գրել, իսկ այն հարյուրավոր մարդիկ, ովքեր մեր ազգի մասին մտածում էին, ոչ մեկ այդ թուրքին պատասխան չի տվել, և ես կարծում եմ՝ այդ քոմենթներն ուղղակի ամբիցիոզ, ավելի ցածր մակարդակի խոսակցություններ են։ Խնդրում եմ ուշադրություն մի դարձրեք:

-Բայց չպատասխանեցիք, առաջիկայում ենթադրելի՞ է, որ կհամալրեք ՀՀԿ-ի շարքերը:

-Ես բոլոր հարցերին պատասխանեցի, շնորհակալություն: