Նոր գլխացավանք` Սաուդյան Արաբիայի համար

Երեկ լիբանանյան «Ալ–Մայադին» հեռուստաընկերությունը հաղորդել էր, թե Վաշինգտոնում Քաթարի դեսպանատունը դիվանագիտական փաստաթղթեր է տրամադրել իր երկրի ԱԳ նախարար Մոհամմեդ Բին Աբդոլռահման Ալ–Սանիին, որոնցով ապացուցվում է, որ Արաբիայի գահաժառանգ Մոհամմեդ բեն Սալմանը և Էմիրությունների արքայազն Մոհամմեդ Բին Զայեդ Ալե–Նահյանը սատարում են Ալ–Քաիդային ու ԴԱԻՇ–ին: Դրանցում առկա է նաև ԱՄՆ ֆինանսների փոխնախարարի մտահոգությունը Ալ–Քաիդայի և ահաբեկչական այլ խմբավորումների հետ նորաթուխ գահաժառանգ Բեն Սալմանի կապի վերաբերյալ, ինչպես նաև՝ Արաբիայի անվտանգության ու հետախուզական կազմակերպության ղեկավար Խալեդ Բին Ալի Բին Աբդոլլահ Ալ–Համիդանի կողմից Ալ–Քաիդայի եմենական թևի պարագլուխներ Ալի Աբքարի ալ–Հասանին և Աբդուլլա Ֆեյսալ Ահդալին (երկուսն էլ ի դեպ, ամերիկյան, այսպես կոչված, սև ցուցակում են ներառված) հատկացված ֆինանսական ահռելի օժանդակության մասին:

Ցավոք, Քաթարի ամերիկյան դեսպանատան կայքում որևէ ապացույց չգտանք իսկապես սկանդալային այս տեղեկության վերաբերյալ, իսկ հեղինակավոր արևմտյան լրատվամիջոցներն ավելի շատ կենտրոնացած էին Մեծ Բրիտանիայի ԱԳ նախարար Բորիս Ջոնսոնի և ԱՄՆ պետքարտուղար Ռեքս Թիլերսոնի քաթարյան այցերի վրա, որի ընացքում երկուսն էլ Ծոցի երկրներին կոչ են արել խուսափել հնարավոր ռազմական էսկալացիայից՝ խնդիրը միակ լուծումը բանակցությունները դիտարկելով: Ճիշտ է՝ շատերը շփոթված էին և նույնիսկ սկանդալային էին համարում Թիլերսոնի հայտարարություններից մեկը, որով նա Քաթարի դիրքորոշումը հստակ և տրամաբանական էր որակել, սակայն, ոչ մի խոսք չկար վերոնշյալ փաստաթղթի վերաբերյալ, ինչին նաև եգիպտական առաջատար «Ալ–Բադիլ» թերթն էր անդրադարձել:

Ըստ այդմ՝ խոսքն իրականում ոչ թե մեկ, այլ մի քանի փաստաթղթերի մասին է, որոնք ԱՄՆ պետդեպարտամենտից են Քաթարի դեսպանատան ձեռքն ընկել: Իբր՝ դեռ 2016–ի հոկտեմբերին է դեսպանատունը դրանք փոխանցել իր կառավարությանը, այդ մասին նաև Global research–ն է ոչ վաղ անցյալում գրել՝ մանրամասն անդրադառնալով ԱՄԷ–ի և սաուդիների՝ ահաբեկչության հետ կապերին: Այդ թվում՝ ֆինանսական: Իհարկե, Global research–ը խնդրին անդրադարձել էր բացառապես բրիտանական Հենրի Ջեքսոնի փորձագիտական կենտրոնի հրապարակած զեկույցի շրջանակներում, սակայն, փաստն այն է, որ միջազգային հանրային կարծիքն այժմ կարող է Քաթարի օգտին փոխվել՝ միաժամանակ սասանելով նաև Բրիտանիայի ու ԱՄՆ–ի հեղինակությունը, որոնք այս ամենն իմանալով՝ շարունակում են բարեկամությունը և նոր ռազմական պայմանագրեր են կնքում Քաթարին ահաբեկչության մեջ մեղադրող, բայց ահաբեկիչների հետ գուցե Դոհայից առավել սերտ կապեր ունեցող Ծոցի երկրների ու հատկապես՝ Արաբիայի հետ:

Համենայն դեպս, գոնե Բրիտանիայում նման հանրային տրամադրություն կա, որտեղ սարսափած են այն փաստից, որ Սալման թագավորն իրենց երկրում միայն չորս միլիարդ դոլար է ծախսել շուրջ 110 մզկիթներ կառուցելու համար, որոնցից 67–ը շահագործման է հանձնվել ընթացիկ 2017–ին: Սա հստակ և աճող կապ է ոչ միայն Մերձավոր Արևելքում, այլև Եվրոպայում և մասնավորապես՝ Բրիտանիայում ծաղկող ահաբեկչության, ինչպես նաև՝ ահաբեկչության ու սալաֆիզմի/վահաբականության միջև՝ Հենրի Ջեքսոնի փորձագիտական կենտրոնի այս տեսակետը լայն պաշտպանություն է գտնում արդեն շատերի շրջանում:

 

Գոհար Սիմոնյան