Հուլիսի 14-ին Ֆրանսիան մեծ շուքով կնշի Ազգային տոնը

 Ֆրանսիան հուլիսի 14-ին մեծ շուքով նշելու  է Ազգային տոնը (La Fête Nationale), որը համարվում է ֆրանսիացիների համար կարևորագույն միջոցառումներից մեկը։  Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն հուլիսի 13-ին հրավիրված ասուլիսում նշեց, որ տոնը հաստատվել է  1880 թ. հուլիսի 6-ին, սակայն պետք եղավ ևս մեկ դար, որպեսզի հուլիսի 14-ը վերջնականապես հաստատվեր որպես Ֆրանսիայի Հանրապետության Ազգային տոն։

«Տարածված կարծիք կա, թե հուլիսի 14-ն ասոցացվում է Մեծ ֆրանսիական հեղափոխության ընթացքում 1789 թվականի հուլիսի 14-ին Բաստիլի ամրոցի գրավման հետ, սակայն իրականում  այդպես չէ: Ազգային տոնը կապված է Բաստիլի գրավման առաջին տարելիցին՝ 1790 թվականի հուլիսի 14-ին տեղի ունեցած «Համադաշնության տոնի»  հետ, որի անցկացման օրը հենց ընտրվեց, որպես Ֆրանսիայի Ազգային տոն։ Իրականում Ազգային տոնը պարունակում է երկու բաղադրիչ. առաջինը՝ Բաստիլի գրավումն էր, որով վերջ դրվեց միապետությանը, եւ երկրորդը՝ «Համադաշնության տոնը», որը խորհրդանշում է մեկ գաղափարի շուրջ միավորված ֆրանսիական ազգը»,-  «Արմենպրես»-ի հաղորդմամբ` ասաց դեսպանը:

Այս օրն անցկացվում են ավանդական բացօթյա միջոցառումներ՝ զորահանդես, Փարիզի հրշեջ ծառայությունների կողմից կազմակերպվող փառատոն, ընդունելություն Ֆրանսիայի բոլոր օտարերկրյա դեսպանատներում, մեծ ընդունելություն Ելիսեյան պալատում, քաղաքապետարաններում, որոնց մասնակցում են ամենատարբեր մակարդակի պաշտոնատար անձինք։