Ընկերությունը պատրաստվում է հանքի տարածքում Կարմիր գրքում գրանցված բույս հայտնաբերելու դեպքում տեղափոխել այն մեկ այլ վայր

ՀԱՍԱՐԱԿՈՒԹՅՈՒՆ 14 Հուլիս, 2017 14:02

«Շրջակա միջավայրի վրա ազդեցության գնահատման և փորձաքննության մասին» օրենքի, ինչպես նաև կառավարության համապատասխան որոշմամբ սահմանված կարգով հուլիսի 26–ին Լոռու մարզի Արդվիի համայնքապետարանում տեղի կունենան «Միռամ» ՍՊԸ–ի կողմից ներկայացված Լոռու մարզի Շեկաղբյուրի ոսկի–բազմամետաղների հանքերևակումում 2017–2020թթ. ընթացքում օգտակար հանածոների երկրաբանական ուսումնասիրության նախնական գնահատման հայտի վերաբերյալ հանրային երկրորդ քննարկումներ:

Շեկաղբյուրի ոսկի–բազմամետաղային հանքերևակման տարածքում 2017–2020 թթ.–ին նախատեսվում է իրականացնել օգտակար հանածոների երկրաբանական ուսումնասիրության աշխատանքներ:

Ըստ նախնական գնահատման հայտի՝ երկրաբանական ուսումնասիրության աշխատանքները կիրականացվեն վերգետնյա լեռնային փորվածքների, սյունակային խորքային հորատանցքերի, երկրաքիմիական աշխատանքների, երկրաբանահանութային երթուղիների միջոցով, նմուշարկման զուգորդմամբ՝ նպատակ ունենալով տալ որակական ու քանակական գնահատական հայտնաբերված օգտակար հանածոյի պաշարների վերաբերյալ:

Նշենք, որ Շեկաղբյուրի ոսկի–բազմամետաղների հանքերևակումը գտնվում է Լոռու մարզի կենտրոնական մասում Լեջան–Լալվար լեռնաշղթայի հարավային լանջին, Մղարթ գյուղից 3,2կմ դեպի հյուսիս–արևմուտք: Հանքերևակման տարածքը ընդհանուր առմամբ զբաղեցնում է շուրջ 200հա մակերես: Հետախուզվող տեղամասում հանքային գոտին խորքում հետախուզելու նպատակով նախատեսվում է հորատել 14 հորատանցք՝ 180–250 մ խորությամբ:

Ըստ նախագծի՝ Շեկաղբյուրի ոսկի–բազմամետաղային երևակման շրջանում բնության հատուկ պահպանվող տարածքներ չկան: Երկրաբանական ուսումնասիրության համար նախատեսված տարածքում Կարմիր գրքերում գրանցված բուսական և կենդանական տեսակներ չեն արձանագրվել: Սակայն, ընդերքօգտագործման նպատակով հատկացվելիք հողերում Կարմիր գրքում գրանցված բուսական տեսակի պոպուլյացիաների հայտնաբերման դեպքում դրանց պահպանության նպատակով նախատեսվում է նախևառաջ առանձնացնել պահպանվող գոտիներ, որոնք ունեն տեղական նշանակություն և անհրաժեշտ են դրանց՝ նոր պոպուլյացիաների կենսունակության ապահովման նպատակով: Բացի այս, նախատեսվում է նաև տեղափոխել պահպանվող բույսերի առանձնյակները տվյալ տեսակի համար նպաստավոր բնակլիմայական պայմաններ ունեցող որևէ բնության հատուկ պահպանվող տարածք կամ բուսաբանական այգիների տարածք, կամ Կարմիր գրքում որպես տվյալ բույսի աճելավայրեր գրանցված որևէ տարածք, իսկ բույսերի սերմերը կտրամադրվեն համապատասխան մասնագիտացված կազմակերպությանը՝ գենետիկական բանկում պահելու և հետագայում տեսակի վերարտադրությունը կազմակերպելու նպատակով:

Շրջակա միջավայրի վրա աղտոտման աստիճանն ըստ նախագծի ցածր է լինելու: Մասնավորապես երկրաբանական ուսումնասիրության աշխատանքների ժամանակ աղտոտված օդի արտանետումները շատ փոքր են լինելու: Իսկ ազդեցությունը շրջակա միջավայրի վրա հիմնականում պայմանավորված է լինելու հորատաման հարթակների կառուցման և աշխատող մեքենաների և սարքավորումների շարժիչների հետ կապված վնասակար նյութերի արտանետումներով:

Նշենք, որ ընկերությունը պատրաստվում է բնապահպանական միջոցառումների համար տարեկան մասնահանել 350 հազար դրամ:

Հավելենք, որ լայնածավալ աշխատանքներն այս տարածաշրջանում սկսել են կատարվել դեռևս 2000 թ–ից մասնավոր կազմակերպությունների կողմից, որոնց արդյունքում հայտնաբերվել և հաստատվել են մի շարք ոչ մետաղային օգտակար հանածոների հանքավայրերի պաշարները:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ