Մակրոնը պատրաստվում է թռիչքի

ՄԻՋԱԶԳԱՅԻՆ 15 Հուլիս, 2017 16:08

ԱՄՆ նախագահ Դոնալդ Թրամփի այցելության ողջ բարդությունը ֆրանսիացիներն իրենց մաշկի վրա զգացին: Երեկ առավոտից փակվել էին մետրոյի առանձին կայարաններ, Փարիզի համարյա ողջ կենտրոնը, Էյֆելյան աշտարակը, որտեղ պտտվելուց հետո նախագահները հանգիստ առան Ժյուլ Վեռն ռեստորանում՝ տիկնանց ընկերակցությամբ ընթրելով վարդագույն ծաղիկներով զարդարված ռոմանտիկ սեղանի շուրջ և 128 մետր բարձրությունից հիանալով երեկոյան տեսարաններով ու լույսերով: Այդ ընթացքում ոչ միայն ժանդարմերիայի 11000 ոստիկաններն էին ամենայն աչալրջությամբ կատարում իրենց ծառայությունները՝ աչքները չկտրելով այն ցուցարարներից, որոնք, այնուամենայնիվ, բողոքի ցույցեր էին սկսել Փարիզում՝ Մահ Թրամփին, Թրամփին Մարս ուղարկեք ագրեսիվ կարգախոսներով, այլև ԱՄՆ նախագահի բազմաթիվ թիկնապահները:

Կարճ ասած՝ ամեն բան կազմակերպվել էր ինչ–որ առումով ցցուն շքեղությամբ և այնպես, որպեսզի ԱՄՆ նախագահն ու իր տիկինը Փարիզում իրենց հրաշալի զգան: Եվ չնայած Ֆրանսիայի նախագահ Էմանուել Մակրոնի՝ Դոնալդ Թրամփի հանդեպ ունեցած վերապահումները գաղտնիք չէին որևէ մեկի համար (ի դեպ, Թրամփն էլ հետ չի մնացել այս գործում՝ բազմիցս քննադատելով Ֆրանսիայի հավատարմությունը բրյուսելյան միգրացիոն քաղաքականության դիկտատին և երկրում անվտանգության մակարդակի նվազմանը), այդուհանդերձ, պարզ դարձավ, որ Ֆրանսիան որոշել է Եվրոպայի բարդ գործընկերոջը հին ընկերների ակումբ վերադարձնելու խրթին գործն իր ուսերին առնել՝ այդ ընթացքում ստվերելով նույնիսկ նախարարների խորհրդի ամենամյա հանդիպման շրջանակներում Փարիզում գտնվող՝ Գերմանիայի կանցլերին:

Միանգամից նշենք, որ Մակրոնի այս դիրքորոշումը պիտի ոչ թե Թրամփի հանդեպ փոփոխված նախընտրության, պարզունակ դյուրահավատության կամ միայն ընդհանուր եվրոպական շահերին կույր հավատարմության, այլ համաշխարհային գործընթացներում Ֆրանսիայի նոր ու հավակնոտ դերակատարման համատեքստում ընկալել: Ընդ որում՝ բոլոր առումներով. տնտեսությունից մինչև քաղաքականություն, մշակույթից մինչև սիրալիր մարդկային հարաբերությունների հաստատման գիտակցում: Ի վերջո, Մակրոնն ինքն էլ փորձառու բանկիր է և հրաշալի է հասկանում ակադեմիական շրջանակների՝ Թրամփին վերագրվող բլեֆը, թե ԱՄՆ–ն մեկուսացման քաղաքականություն է վարում: Դատելով G20–ի հանդիպումներից ու Մակրոնի, այսպես ասենք՝ Թրամփի նկատմամբ ստանձնած հոգածու պահվածքից, նա հասկացել է, որ ԱՄՆ նախագահը, գործարարի իր ջիղով, վայրկյան անգամ չի մնա այնտեղ, որտեղ գոնե փոքր շահ չունի և կհրաժարվի ցանկացած գործարքից, որը հակառակ կլինի իր շահերին:

Մակրոնն, ուրեմն, արտակարգ է հաշվարկել. հրավիրել Թրամփին Փարիզ՝ Բաստիլի գրավման և Առաջին աշխարհամարտին ԱՄՆ մասնակցության 100–ամյակին նվիրված տոնակատարություններին ներկա գտնվելու խորհրդանշական պատրվակով, շոյել նրա ինքնասիրությունը շքեղ ընդունելությամբ և այն ամենով, ինչ մոտ է Թրամփի սրտին, և այդ ընթացքում նպաստավոր պայմաններ ստեղծել ոչ թե նախկին կաղապարումներով բարդ զրույցի, այլ գործարարի ու ֆինանսիստի շահավետ բանակցությունների համար:

Ռուսաստան, Ուկրաինա, Սիրիա (որի առնչությամբ, ի դեպ, Մակրոնն անակնկալ հայտարարություն արեց, թե Ֆրանսիան նույնպես հրաժարվում է Ասադի ռեժիմը տապալելու ցանկությունից), ՆԱՏՕ–ում համագործակցություն, երկկողմանի գործակցություն, առևտուր, հակաահաբեկչական պայքար, վերջապես՝ Փարիզյան կլիմայական համաձայնագիր: Սրանք հարցեր են, որ հայտնվել են նախագահների ուշադրության կենտրոնում, և մեծ էր զարմանքը, երբ Թրամփը հայտարարեց, թե, հնարավոր է, վերանայի իր մոտեցումը համաձայնագրի առնչությամբ: Կարճ ասած՝ չնայած առայժմ բանակցությունների արդյունքների մասին ընդհանուր տեքստեր են ասվում, և առանձնապես հստակություն չկա, բայց ակնհայտ է, որ Մակրոնը կշարունակի իր ջանքերը՝ Մերկել–Օբամա բարեկամությունը վերածելով Թրամփ–Մակրոն զգոն գործընկերության և նույնիսկ Brexit–ին գնալու իր քաջության պատճառով Թրամփի սիրտը գրաված Բրիտանիայի վարչապետ Թերեզա Մեյին ու անգլո–սաքսոնական հնարավոր նախաձեռնությունները ստվերելով:

Կհաջողի՞՝ պարզ չէ: Համենայն դեպս, Մակրոնը ստեղծեց դրա հնարավորությունը: Նա բացառիկ պոլիտկոռեկտություն հանդես բերեց՝ ասուլիսի ընթացքում հնչած բոլոր տհաճ հարցերի առնչությամբ պատասխանելով, թե հարգում է նախընտրական շրջանում իր բոլոր խոստումներն այժմ կյանքի կոչող ԱՄՆ նախագահին, երբ անընդհատ ընդգծեց, որ չի կամենում խառնվել մեկ այլ երկրի ներքին գործերին, և երբ Թրամփն իրեն հատուկ պարզությամբ կամ անքաղաքավարությամբ հաճոյախոսեց Ֆրանսիայի առաջին տիկնոջը, թե՝ 64–ամյա տարիքում հրաշալի տեսք ունի: Այնպես, որ՝ Ֆրանսիայի քինդեր սյուրպրիզը, որին բոլորը մեղադրում էին կանցլեր Մերկելի ձեռքով Օլանդ դառնալում, պատրաստվում է թռիչքի: Ինչ ՕԳԳ–ով՝ կտեսնենք: