Բաքուն պետք է զգուշանա «Իսկանդեր»-ից, դրանով հնարավոր է հարվածել Ադրբեջանի ՊՆ շենքին, նախագահի նստավայրին. Ֆելգենգաուեր

Ադրբեջանը պետք է զգուշանա Հայաստանի զինանոցում առկա «Իսկանդեր» զենիթահրթռիային համակարգից: Tert.am-ի հետ զրույցում այս մասին ասաց ռուսաստանցի ռազմական փորձագետ Պավել Ֆելգենգաուերը՝ խոսելով Ադրբեջանի պաշտպանության նախարար Զ. Հասանովի հայտարարության մասին, թե իրենք «Իսկանդեր»–ից չեն վախենում և ունեն 50 անգամ ավելի շատ հրթիռներ, քան Հայաստանը:

Ռազմական փորձագետը նշեց, որ Հասանովի խոսքից այդքան էլ հասկանալի չէ, ինչ նա նկատի ունի, արդյոք այն, որ Ադրբեջանում ունեն զենք, որով կարելի է նույն հեռավորության հարված հասցնել, թե ունեն զենք, որով կարող են հարվածել «Իսկանդեր»–ին: Ըստ Ֆելգենգաուերի՝ խոսքն ամենայն հավանականությամբ հակահարվածային զենքի առկայության մասին է, որովհետև Ադրբեջանի պաշտպանության նախարարն իր խոսքում ասում է, թե 50 անգամ ավելի շատ հրթիռներ ունենք:

Այս առումով Պավել Ֆելգենգաուերը նկատեց, որ տեսականորեն աշխարհում կլինեն զենքեր, ինչպես իսրայելական ավելի հզոր օրինակը, բայց խոցել ռուսական «Իսկանդերը», Ադրբեջանը դժվար թե կարողանա, որովհետև չունի: 

«Մասնագիտացված հակահրթիռային համակարգ Ադրբեջանը չունի: Ներկայումս «Իսկանդերին» գերազանցող զենքերից են «THAAD»-ը, վիետնամական «Patriot»-ը, բայց որքանով տեղյակ եմ Ադրբեջանն այս զենքի տեսակներն իր զինանոցում չունի»,- ասաց փորձագետը: 

Պավել Ֆելգենգաուերը նկատեց, որ Հասանովն ամենայն հավանականությամբ այսպիսով ուզեցել է ցույց տալ, որ Ադրբեջանում կան զենքի տարբեր տեսակներ, որ իրենց բանակը հարուստ է սպառազինությամբ:

««Իսկանդերը»-ը բարձր ճշգրտության զենք է, այն դիպուկ հարված կարող է տալ անշարժ օբյեկտներին:

Այնպես որ, պետք է զգուշանալ «Իսկանդեր»-ի հարվածներից, որոնք կարող են լինել հատուկ նշանակության շենքերի ուղղությամբ: Դրանով կարելի է հարվածել Բաքվի նախագահի նստավայրին: Ադրբեջանը պետք է զգուշանա սրանից, որ հնարավոր է հասցնել հարված Ադրբեջանի պաշտպանության նախարարության շենքին, ռազմական օբյեկտներին, գլխավոր շտաբի շենքին, նախագահի նստավայրին»,- ընդգծեց ռուսաստանցի ռազմական փորձագետը: